×

BIBELE 1951

Ezekiele 18

1
Lentšu la Morena le ntletše la re:
2
Le hloma bjang ge mo nageng ya Isiraele le fela le hlaba ka seema sa go re: Botate ba lle matata, meno gwa šia a bana?
3
Morena Mong wa bohle o re: Ka bophelo bja ka, sona seema seo mo go Isiraele le ka se hlwe le hlaba ka sona.
4
Tsebang; bophelo ka moka ke bja ka. Bophelo bja botataweno ke bja ka; le bophelo bja bana ba bona ke bja ka; go tlo hwa bophelo bja e a sentšego.
5
Bjale ge motho a loka, a dira tše di swanetšego, a ya ka toko,
6
Ge a sa je didimo dithabeng, ge a sa rerelele medimo ya moloko wa Isiraele, a se senye mosadi wa wa gabo, a se batamele mosadi wa ditšhila,
7
Ge a sa pate motho, a buša tše a di adimilego, a se swarelele motho, a se hlakole, a hlallela wa tlala bogobe, a apeša e a lego fela,
8
A se nyake leruo ka go fora, a se nyake thuo ya kadimo, a gomiša seatla sa gagwe mo go lego bokgopo, a se hlaole motho mo tshekong,
9
A swara ka tsela ya ditaelo tša ka, a ya ka melao ya ka a e botegela, yo bjalo ke moloki, o tlo phela. O realo Morena Mong a bohle.
10
Fela, ge a ka tswala morwa e lego o šoro, wa go thula madi, a dira ngwanabo tše mpe tše, tše di boletšwego.
11
A lahla tsela ya tatagwe, a ja didimo dithabeng, a senya mosadi wa wa gabo,
12
A pateletša modiitšana le mmotlana, a dira tša bohodu, a se buše tše a di admimilego, a rerelela medimo, a dira mabohlola,
13
A ja batho ka go fora, a nyaka thuo ka kadimo, a yo bjalo a ka phela? A ka se ke a ba a phela. O tlo hwa ge a dirile mabohlola ao; mme molato wa madi a gagwe o mo go yena.
14
Bjale ge go ka ba le morwa e a bonago dibe tšohle tše tatagwe a di dirago, a di bona mme a lesa go di dira,
15
A se je didimo dithabeng, a se rerelele medimo ya diswantšho ya moloko wa Isiraele, a se senye mosadi wa wa gabo.
16
A se pateletše motho, a lesa thuo ya kadimo, a se dire tša bohodu, a hlallela wa tlala bogobe, a apeša yo a lego fela,
17
A se dire mmotlana ka thata, a se hume ka go fora batho, a se be wa thuo ya kadimo, a swara tsela ya taelo tša ka, a ya ka melao ya ka, yo bjalo a ka se ke a hwa ka molato wa tatagwe, yena o tlo phela.
18
Ge e le tatagwe, ka gobane yena o pateleditše ngwanabo, a mo hlakola ka go mo dira ka thata, a dira tše e sego botse setšhabeng sa gabo, le tsebe gore yena o tlo hwa ka baka la molato woo wa gagwe.
19
Bjale lena le re: Morwa o reng a sa rwešwe molato wa tatagwe? Ke ka gore morwa o dirile ka molao le ka toko, o hlokometše ditaelo tša ka, a dira a eya ka tšona; ke ka fao ge a tlo phela.
20
Go tlo hwa e a dirilego sebe. Morwa wa motho a ka se ke a rwala molato wa tatagwe; le tatago motho a ka se ke a rwala molato wa morwa wa gagwe. Moloki o tlo boelwa ke toko ya gagwe; yo mobe o tlo boelwa ke bobe bja gagwe.
21
Ge yo mobe a ka lahla dibe tša gagwe ka moka tše a bego a di dira, a hlokomela ditaelo tša ka ka moka, a dira ka molao le ka toko, gona o tlo phela, a ka se ke a hwa.
22
Diphapogo tša gagwe tšela a ka se ke a di balelwa: o tlo phela ka tša go loka tše a di dirilego.
23
A o re nka kgahlwa ke go hwa ga yo mobe? O realo Morena Mong a bohle. A ga ke re ke kgahlwa ke ge a lahla tsela ya gagwe, a phela?
24
Fela, ge moloki a ka lahla toko ya gagwe, a yo dira bokgopo, a dira mabohlola ohle a dirwago ke motho e mobe, a o re a ka phela? A ka se hlwe a balelwa tša toko tše a di dirilego, le setee sa tšona. O tlo hwa ka baka la tlhanogo le ka baka la dibe tše a di dirilego.
25
Lena le re: Tsela ya Morena ga e a loka! Kwang ge lena ba moloko wa Isiraele. Ka kgonthe, le re tsela ya ka ga e a loka? A ga ke re tsela tše di sa lokago ke tša lena?
26
Ge moloki a lahla toko a dira bokgopo, o tlo hwa ka molato woo; o tlo hwa ka baka la bobe bja gagwe bjo a bo dirilego.
27
Gomme ge e mobe a ka lahla dibe tša gagwe tše a bego a di dira, a dira ka molao le ka toko, yena yeo o phološa moya wa gagwe.
28
O lemogile go se loke ga gagwe, a boa mo a bego a arogile, a lahla dikarogo tše a ilego ka tšona, gomme o tlo phela, a ka se ke a hwa.
29
Ge ba moloko wa Isiraele ba re: Tsela ya Mong wa bohle ga e a loka! A ga di a loka ditsela tša ka? A ga ke re tše di sa lokago ke tša lena ditsela, lena ba moloko wa Isiraele.
30
Ke tla fela ke dira ka mokgwa wo ke ahlolela motho ka go ya ka ditsela tša gagwe, lena ba moloko wa Isiraele ka moka. O realo Morena Mong wa bohle. Boang ge, le lahle tsela ya dikarogo tšohle, gore di se tlo le rweša molato.
31
Kgaoganang le dikarogo tšohle tše le wetšego go tšona, le itirele pelo e mpsha le moya o mofsa. Le hwelang, lena ba moloko wa Isiraele?
32
Ka gobane ga ke kgahlwe ke lehu la e a hwago! O realo Morena. Boang ge le phele!
Sotho Bible 1951
Bible Society of South Africa 1986
:
Boloka Lintlha