×

Maayong Balita 2012

EZEQUIEL 19

1
Ang Ginoo nagsugo sa akon sa pagkanta sining masubo nga ambahanon para sa duha ka mga prinsipe sang Israel:
2
Ang imo iloy isa ka maisog nga leon nga babayi! Ginasagod niya ang iya mga tutoy sa tunga sang mabangis nga mga leon nga lalaki.
3
Ginpadaku niya ang isa ka tutoy kag gintudloan sa pagpangdakop; nagpangaon sia sing tawo.
4
Ang mga kapungsoran nakabati nahanungod sa iya kag gindakop sia paagi sa tugalbong. Gindala nila sia sa Ehipto nga nakaw-itan.
5
Naghulat ang iloy tubtob nadulaan sia sing tanan nga paglaom. Dayon ginpadaku naman niya ang isa sang iya mga tutoy kag ini nangin-isa ka mapintas nga leon.
6
Sang pagdaku niya nag-upod sia sa iban nga mga leon. Nakatuon man sia sa pagpangdakop kag nagapangaon sia sing mga tawo.
7
Ginguba niya ang mga pamakod, ginlaglag niya ang mga banwa. Ang mga pumoluyo sa duta ginkugmat kon magngurob sia.
8
Ang mga kapungsoran nagtipon sa pagpakig-away sa iya; ang mga tawo nag-abot halin sa tanan nga lugar. Ginladlad nila ang ila mga lambat kag gindakop nila sia sa ila siod.
9
Ginbutang nila sia sa daku nga hawla, kag gindala sia sa hari sang Babilonia. Ginbantayan nila sia, agod ang iya pagngurob indi na mabatian liwat sa mga kabakuloran sang Israel.
10
Ang imo iloy kaangay sang isa ka balagon sang ubas nga natanom sa tupad sang sapa. Tungod kay bugana ang tubig, madabong ang iya mga dahon kag madamo ang iya bunga.
11
Mabakod ang iya mga sanga, kag bagay himuon nga setro sang hari. Ang balagon sang ubas nagtaas kag naglambot sa mga panganod. Ang tagsatagsa nakakita sang iya kadabong kag kataas.
12
Pero may mga kamot nga naggabot sini sa kaakig kag ginhaboy ini sa duta. Ginpalaya sang salatan ang iya mga bunga, nagkalabanggi ang iya mga sanga, nalaya ini kag gintutdan.
13
Karon gintanom ini liwat sa desierto, sa mamala kag kigas nga duta.
14
Ang iya puno dinakop sang kalayo, ginsunog sini ang iya mga sanga kag mga bunga. Ang iya mga sanga indi na gid magbakod liwat, kag indi na gid manginsetro sang hari. Amo ini ang masubo nga ambahanon nga ginkanta sing liwatliwat.
Ilonggo Bible 2012
Maayong Balita nga Biblia Philippine Bible Society, 2012
:
Save Notes