×

Ika Bible 2018

Izikẹlụ 20

1
Hụn mẹ ahụa ẹsa, nke akpọhịn iri imẹ ifọn nke isẹn, ụfọdụ ndị-ichẹn Izrẹlụ bịa d'a chọ uche Osolobuẹ, wẹ nọ weri oche ihun m.
2
Ya kẹ Osolobuẹ nọ gwa m oku, sị m:
3
“Nwa-ịhịan, gwa ndị-ichẹn Izrẹlụ oku. Sị wẹ: Lee ni ihiẹn Osolobuẹ Nwọn Ihiẹn Ile ku: Ụnụ bịa d'a chọ uche m? Ma isi m, anịkọ m ụnụ marịn uche m, mmẹ wụ Osolobuẹ Nwọn Ihiẹn Ile ku ẹ.
4
Y'a hangbukọ wẹ eṅẹn? Nwa-ịhịan, y'a hangbukọ wẹ eṅẹn? Nyanhannị wẹ arụ ile ndị nẹdi wẹ mẹ;
5
sị wẹ: Lee ihiẹn Osolobuẹ Nwọn Ihiẹn Ile ku: ụhụọhịn hụ m họrị Izrẹlụ, e weshi m ẹka elu kunni ebọn Jekọpụ enwẹn m, we enwẹn m ghọsị wẹ imẹ alị Ijiptu. M kishi ẹka elu sị wẹ, ‘Mmẹ wụ Osolobuẹ, hụn wụ Chuku ụnụ.’
6
E kunzịghọnị m wẹ enwẹn m ụhụọhịn hụ nị m k'a gha Ijiptu wepụha wẹ, we wẹ shi alị m chọtọnị wẹ, alị hụn mirin-ẹran lẹ mirin ẹnwụn jun, e hu, alị hụn kachanrịn alị ile mma.
7
M nọ sị wẹ, ‘Onyẹ-onyẹ imẹ ụnụ ya latọ ihiẹn ndị ahụn wẹ kpụ ọ rị e fe; egilẹ ni mmọn ndị hụ rị alị Ijiptu mẹrụ enwẹn ụnụ. Mmẹ wụ Osolobuẹ hụn wụ Chuku ụnụ.’
8
“Kanị e nupụnị wẹ m isi, jụ n'e gọnkọ wẹ m ntịn; onwọnni onyẹ kpọnpụ mmọn ndị ahụn rụnị ọ rị e fe, alatọnị wẹ mmọn ndị hụ wẹ rị a rụa alị Ijiptu. Ya m nọ sị nị m gi ọnụma sọn wẹ, gi olulu mẹ wẹ ihiẹn imẹ Ijiptu.
9
Kanị emẹni m'ẹ makẹ ufiri ẹfan m, amamgbe m'e budan ẹfan m ẹnya alị ndị hụ wẹ bi imẹ igunrun wẹ, alị ndị hụ m nọ idẹnya wẹ ghọsị ndị Izrẹlụ enwẹn m ghahanị iwepụha wẹ imẹ alị Ijiptu.
10
Ya m nọ gha Ijiptu wepụha wẹ, webanhan wẹ imẹ atụ.
11
M nọ yini wẹ uhi m, mẹ wẹ marịn ihiẹn m chọ nị wẹ e mẹ, hụn o mẹni onyẹ mẹ wẹ ọ rị ndụn.
12
M nọzị tumẹsọnmẹni wẹ Ogẹn Ezumikẹn m rị ichẹn-ichẹn n'ọ hụn ụzọ wụrụ ahịma rị ẹgbata mmẹ lẹ wẹ, kẹni wẹ marịn nị mmẹ wụ Osolobuẹ wepụha wẹ, dọn wẹ nsọ.
13
“Kanị ndị Izrẹlụ nọ pazịkwọ oku m imẹ atụ. Esọnni wẹ uhi m; a jụ wẹ ihiẹn ndị m sị wẹ e mẹ, hụn o mẹni onyẹ dọnmẹ wẹ ọ rị ndụn; e mẹrụ wẹ Ogẹn Ezumikẹn m ile, mẹrụ wẹ ọda-ọda. Ya m nọ sị nị m gi ọnụma sọn wẹ imẹ atụ, tikpọ wẹ.
14
Kanị emẹni m'ẹ makẹ ufiri ẹfan m, amamgbe m'e budan ẹfan m ẹnya alị ndị hụ m nọ idẹnya wẹ wepụha wẹ alị Ijiptu.
15
E te kịshighọdẹ m ẹka elu kun enwẹn m imẹ atụ ebahụn nị ewebanhankọ m wẹ imẹ alị hụ m ye wẹ hụn mirin-ẹran lẹ mirin-ẹnwụn jun, e hu, alị hụn kachanrịn alị ile mma,
16
makẹni emẹni wẹ ihiẹn ndị m sị wẹ mẹ, egini wẹ uhi m bi; e mẹrụ wẹ Ogẹn Ezumikẹn m rị ichẹn-ichẹn, makẹni obi wẹ rịchanrịn mmọn wẹ rị ichẹn-ichẹn —
17
kanị m nọ mẹni wẹ omikẹn, etikpọnị m wẹ, e gbupụnị m wẹ ile imẹ atụ ebahụn.
18
“M nọ gwa ụmụ wẹ oku imẹ atụ hụ, sị ‘Esọnlẹ ni omẹnalị ndị nẹdi ụnụ; egilẹni iwu wẹ bi; egilẹ ni mmọn ndị hụ wẹ e fe mẹrụ enwẹn ụnụ.
19
Mmẹ wụ Osolobuẹ hụn wụ Chuku ụnụ, sọn ni uhi m, e mẹ ni ihiẹn m sị ụnụ e mẹ.
20
E dọnmẹ ni Ogẹn Ezumikẹn m tumẹsọnmẹni ụnụ nsọ, nị wẹ hụn ụzọ wụrụ ahịma rị ẹgbata mmẹ lẹ ụnụ — kẹni ụnụ e gi ẹ a marịn nị mmẹ wụ Osolobuẹ hụn wụ Chuku ụnụ.’
21
“Kanị ụmụ wẹ nọ pazịkwọ oku m: Esọnni wẹ uhi m, emẹni wẹ ihiẹn ndị hụ m sị wẹ mẹ hụn o mẹni onyẹ mẹ wẹ ọ rị ndụn; e mẹrụ wẹ Ogẹn Ezumikẹn m rị ichẹn-ichẹn. Ya m nọ sị nị m gi ọnụma sọn wẹ, gi olulu mẹ wẹ ihiẹn imẹ atụ ebahụn.
22
Kanị m nọ sekin ẹka m, emẹni m'ẹ, makẹ ufiri ẹfan m, amamgbe m'e budan ẹfan m ẹnya alị ndị hụ m nọ idẹnya wẹ wepụha wẹ.
23
A kịshighọdẹ m ẹka elu kun enwẹn m imẹ atụ ebahụn sị wẹ nị m k'e feyịya wẹ ye alị ichẹn-ichẹn lẹ ebe rị ichẹn-ichẹn,
24
makẹni emẹni wẹ ihiẹn m sị wẹ mẹ, makẹni wẹ jụ uhi m, mẹrụ Ogẹn Ezumikẹn m rị ichẹn-ichẹn, bu ẹnya wẹ che mmọn ndị hụ ndị nẹdi wẹ fe.
25
E ye m wẹ iwu ndị rịlẹni mma hụn ghalẹni e ye ndụn;
26
e mẹ m wẹ gi oyiye ndị hụ wẹ rị e ye mmọn rụ — ẹjan ndị hụ wẹ gi nwa-ibuzọ wẹ a chụn, kẹni ize enwẹn wẹ ban wẹ, e gi w'ẹ marịn nị mmẹ wụ Osolobuẹ.
27
“Nwa ịhịan, gwa nwan ndị Izrẹlụ oku, sị wẹ, ‘Lee ihiẹn Osolobuẹ Nwọn Ihiẹn Ile ku: Ndị nẹdi ụnụ kparisọnmẹ m, e gi ẹkanaị e sọn m:
28
e webanhan m wẹ imẹ alị ahụn m kun enwẹn m kwe wẹ nkwa, wẹ nọ kwama ese elu òke ọwụlẹ wẹ hụn n'o jẹn elu lẹ ukun osisi ọwụlẹ duni, e gi ẹjan ndị hụ a kpasu m iwe; a mụyeni mmọn nsẹnsi, e hu manya wẹ e yeni wẹ.
29
M hụ a sị wẹ: Kị ụnụ rị e jẹnni ihun mmọn ndịnị rị ebe jẹn elu?’ ” (Ebe-jẹn elu kẹ w'a kpọkwọ nwan ụlọ-mmọn ndị hụ d'e ru tannị.)
30
Osolobuẹ sị, “Sị nwan ikpụlọ Izrẹlụ: Lee ihiẹn Osolobuẹ Nwọn Ihiẹn Ile ku: Nị ụnụ mẹrụ nwan enwẹn ụnụ nọkẹ ndị nẹdi ụnụ? Nị ụnụ wezi nwan enwẹn ụnụ kwanị mmọn ndị ahụn rụnị nọkẹ wẹ?
31
Ụnụ hụ e ye mmọn ndị hụ oyiye, a dụnnị wẹ ụmụ ụnụ ikẹnnyẹ ọkụn, e gi mmọn ndị hụ e mẹrụ enwẹn ụnụ d'e ru tannị. Ndị Izrẹlụ, nị m nịzị nwan ụnụ jụma m uche m? Ma isi m, anịkọkwọ m ụnụ marịn uche m! Mmẹ wụ Osolobuẹ Nwọn Ihiẹn Ile ku ẹ.
32
“Ihiẹn hụ ụnụ rị e ro aghakọ, ihiẹn hụ ụnụ rị a sị enwẹn ụnụ, ‘Nị ẹnyi nọ kẹ alị ndị ọzọ, ebọn ndị rị alị ndị ọzọ, ndị hụn e fe mkp'osisi lẹ ọmụma.’
33
Ma isi m, mmẹ k'a kị ụnụ, gi ẹka-ikẹn lẹ ẹka zeni lẹ ọnụma mẹ ẹ — mmẹ wụ Osolobuẹ Nwọn Ihiẹn Ile rị a gwa ụnụ ya!
34
M k'e gi ẹka-ikẹn lẹ ẹka zeni lẹ ọnụma wepụha ụnụ imẹ alị ndị hụ wẹ feyịya nwan ụnụ ye,
35
e wẹhẹ m ụnụ imẹ atụ alị ndị ọzọ rị ichẹn-ichẹn, nọ ebahụn ma ụnụ ikpe elee-m elee-i.
36
Kẹ m dọn ma ndị nẹdi ụnụ ikpe imẹ atụ Ijiptu kẹ m k'a dọn ma ụnụ nwẹn, mmẹ wụ Osolobuẹ Nwọn Ihiẹn Ile ku ẹ.
37
M k'a gụndẹ ụnụ webanhan, kẹ onyẹ e du anụ dọn e gi ọkpọ a gụnye anụ a ụlọ, e gi m iwu rị nkwerigbama mmẹ lẹ ụnụ kẹnmẹ ụnụ.
38
M k'a gha alị ụnụ shiẹnpụchanrịn ndị ile rị imẹ ụnụ hụn a pa oku m lẹ ndị e feni m isi. M k'e wepụha wẹ alị wẹ bi, kanị abanyekọ wẹ alị Izrẹlụ, ụnụ e gi ẹ marịn nị m wụ Osolobuẹ.
39
“Ụnụ ndị Izrẹlụ, Osolobuẹ Nwọn Ihiẹn Ile sị: Jẹnmẹkwọ nị d'e femẹ mmọn ụnụ — onyẹ lẹ mmọn a, onyẹ lẹ mmọn a! Kanị, omẹgụ, ụnụ k'e gọnrịrị m ntịn, ụnụ egikọzị mmọn ụnụ ndị hụ lẹ oyiye ụnụ e ye wẹ budan ẹfan m rị nsọ.
40
Makẹni, mmẹ, Osolobuẹ Nwọn Ihiẹn Ile, rị e ku ẹ nị Izrẹlụ ile k'a nọrịrị elu-ugu nsọ m, elu ugu rị Izrẹlụ, fe m ofufe, wẹ ile k'a nọrịrị imẹ alị Izrẹlụ ebẹhụ fe m. M k'a nabanhan wẹ ebẹhụ, nọ a lemẹzi ẹnya ihiẹn ụnụ a tụhanị m lẹ oyiye ndị hụ kachanrịn mma ụnụ e ye lẹ ihiẹn ndị ọzọ ile rị nsọ ụnụ gi e fe m.
41
M k'a nabanhan ụnụ nọkẹ nsẹnsi e kun fuẹin ogẹn m'e gi wepụha ụnụ imẹ ndị alị ichẹn-ichẹn lẹ alị ichẹn-ichẹn wẹ feyesọnmẹ nwan ụnụ, a nọ m idẹnya ndị alị ichẹn-ichẹn ghọsị ụnụ nị m rị nsọ.
42
Ụnụ jẹnkọ d'a marịn nị mmẹ wụ Osolobuẹ, ogẹn m'e gi webanhan ụnụ imẹ alị Izrẹlụ, alị ahụn m kịshi ẹka elu kun enwẹn m nị m k'e ye ndị nẹdi ụnụ,
43
ụnụ a nyanhan obibi ụnụ lẹ ihiẹn ndị hụ ile ụnụ gi mẹrụ enwẹn ụnụ, ize enwẹn ụnụ a ban ụnụ makẹ eje-ihiẹn ndị hụ ile ụnụ mẹ.
44
“Ụnụ sikọ d'a marịn nị mmẹ wụ Osolobuẹ, ogẹn m e gi dọnzi ihiẹn makẹ ẹfan m, hụn nkẹ m'e gi mẹ ụnụ ihiẹn eje-obibi ụnụ lẹ arụ ụnụ chọ. Ya kẹ Osolobuẹ Nwọn Ihiẹn Ile ku.”
45
Osolobuẹ gwa m oku, sị m,
46
“Nwa-ịhịan, bu ihun zinmẹ ẹbamịn ndịdan; ku ihiẹn k'e mẹ wẹ ile rị azụụn hụ; bu amụma ihiẹn k'e mẹ ẹgboko rị Nẹgẹvụ ebẹhụ.
47
Sị ẹgboko rị Nẹgẹvụ, ‘Gọn ntịn ihiẹn Osolobuẹ ku! Osolobuẹ Nwọn Ihiẹn Ile sị, M'e d'e bi ọkụn ye i, o k'a dụnpụchanrịn osisi ile rị imẹ i, kẹ ndị rị ndụn kẹ ndị kpọ nkụn. Okẹn ọkụn ahụn anịkọ wẹ tinyụn. O k'a mara ihun ndị ile rị gha ẹbamịn ndịdan ebẹhụ d'e rukwọrị ẹbamịn-ugu.
48
Ịhịan ile k'a hụn a nị mmẹ wụ Osolobuẹ mụye ọkụn hụ; ọkụn hụ anịkọ wẹ tinyụn.’ ”
49
M nọ sị, “Euu Osolobuẹ Nwọn Ihiẹn Ile! Wẹ rị nwan e ku oku m, a sị, ‘Ẹlẹ ilu-ilu k'ọ rịhụ e lu?!’ ”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes