ikpe a magụọ ị yeni ịhịan i gbu, y'a rụgụọ yeni mmọn ndị hụ ị kpụ. Y'e wezụnhangụọ ogẹn i; ogẹn i e rugụọ. E mẹgụọ m'ị wụrụ ihiẹn alị ndị ọzọ a mụ ẹmụ, ihiẹn alị ile a mụ ẹmụ.
Wẹ hụ imẹ i e buokin ịhịan ọnụ ebe wẹ n'ọ a chọ isi w'e gbu; ndị rị imẹ i hụ e ri ihiẹn-oriri ụlọ-mmọn ndị hụ rị elu ugu; wẹ hụ e mẹ arụ ichẹn-ichẹn imẹ i.
Imẹ i, onyẹ ohu hụ e sọn nwunyẹ ibe ẹ e mẹ arụ, hụn ẹbọ hụ e sọn nwunyẹ-nwa a e mẹ arụ — o tuni ihiẹn anaị; onyẹ ọzọ hụ e sọn nwẹnẹ ẹ okpoho a ranhịn, nwa nẹdi ẹ.
“Ịhịan hụ imẹ i a narịn ọgị-azụụn lẹ egho-azụụn e gbu ibe ẹ; a na okẹn-ọmụnịnwa a chọ okẹn erere, e ri ibe ụnụ erere, e mẹgbu wẹ, ụnụ a zọ mmẹ nwẹn. Ịya kẹ Osolobuẹ Nwọn Ihiẹn Ile ku.
“Ndị-amụma rịn'a a kịgbamagụọ, e mẹ kẹ ẹwọrọ rị e dẹnni, a dọrinrin anụ o gbu; wẹ hụ e gbu ịhịan; wẹ hụ e buru ihiẹn rị mma lẹ ihiẹn rị mkpa; wẹ hụ e gbunarịn ikpoho bu ọda rịn'a di wẹ.
“Ndị nchụn-ẹjan a e wiwichanrịngụọ Iwu m rị wẹ ẹka, mẹrụ ihiẹn m ile rị nsọ; onwọnzini ihiẹn rị nsọ lẹ ihiẹn-mmaka ẹnya wẹ; w'a ra kụzizi n'o nwọnghọ ihiẹn rụnị lẹ ihiẹn rụlẹni; achọzịnị wẹ nị wẹ marịn nị m tumẹsọnmẹ Ogẹn Ezumikẹn ichẹn-ichẹn, wẹ hụ e gi wẹ ile e budan m imẹ igunrun wẹ.
“Ndị alị hụ a bịangbu ịhịan ọbịangbu-ọbịangbu, a narịn ịhịan ihiẹn ẹ; wẹ hụ e mẹgbu ndị igbẹnnyẹ lẹ ndị elu rị a fụ, a bịangbu abịamabịa, a narịn wẹ ihiẹn runi wẹ.
“A chọgbamagụọ m imẹ wẹ nị m hụn akpụ onyẹ ohu, hụn nkẹ a tụnkin mgbọnni, hụn nkẹ e wuzoni alị ihun m dọnzi ihiẹn makẹ m gha e tikpọ a, onwọnni onyẹ m hụn.
Ya kẹ m nọ nwan hu olulu m kpu wẹ kẹ mirin, gi ọnụma m hụn a dụn kẹ ọkụn tikpọ wẹ la iwi; e mẹgụọ m wẹ gi isi wẹ buru ihiẹn ile wẹ mẹ. Ya kẹ Osolobuẹ Nwọn Ikẹn Ile ku.”