E mai purani ikhardola Aola, a laki phei ikardola Aolibia, e dui cherdile murne ta avila len chaurre ta chorra. Von ikhardona: Samaria e Aola, ta Jerusalem e Aolibia.
Ta ni mukla o kurvaluko kai cherda ando Ejipto, soke sovte laia ande po ternipe, ta von chichidie lake kolina cheake, ta cherde sa o kurvaluko kai mangle laia.
Von dikhle sar saia bi patavenchar, lie lake chaurren ta lake chorren ta mundarde la e jarniea ta cherdili asundi maskar e diskinie, soke sa llangle katar e duk kai nakhla e Aola.
Volila e asirionen kai zivina pasa late, sudura ta gazda e boñikonenge, kai lenge patave ta lenge ezgode e marimake sea glamne, llene kai llana pe gra, saurre sea terne ta sukar.
kai pe lengo maskar sea kavisa ta pe lengo soro ezgode but sukar ta saurre sea sargo sudura, sargo e llene katar e Babilonia, kai biandile ande Kaldea,
Ta gia saia sar e llene katar e Babilonia thodepe laia ande lako than e volimako, ta poganisarde la ta i voi poganisaili lenchar lligo ni gadosaili lendar.
Goleke o Del o Gazda phenda gia e Aolivake: Ka cherav te aven pe tute gola kai volin tut, gola kai gadosailan lendar, ta ka cherav te thovenpe truial tutar,
e llene katar e Babilonia ta sa e kaldeura, e llene katar o Pekod, katar e Soa ta katar e Koa, ta sa e llene katar e Asiria lenchar, llene terne ta sukar, gazda ta sudura, llene lache ta glamne, kai saurre llan pe gra.
Ta ka aven pe tute ande bordona e marimake, ta but forura. Eskudura ta challa sastrune ka aven pe tute truial tutar ta me ka thovav angla lende e kris ta prema lenge zakonura ka krisin tut.
Ka cherav te perel pe tute mi joli, ta ka aven tuia silne, ka chinen cho nak ta che kan ta so ka achel tut ka avel chindo e jarniea ta ka perel. Von ka len che chaurren ta che chorren ta so ka achel tutar phabardo ande iag.
Ka cherav te na izdral ios cho lio pe ezgode bilache, ta cho kurvaluko kai andan katar o Ejipto, ta ni ka thove che akha ios pe gola ezgode ta ni ka de tut go lli ios katar o Ejipto.
ka murzin pe tute ta ka len tutar sa so lian pe cho rado ta ka muken tut nangi ta puchardi, ta ka dikhol o gadope katar cho kurvaluko ta sa o bilachipe kai izdraian te chere ta cho kurvaluko.
Gia phenda o Del o Gazda: Ka pie katar o baro ta bulo taso che pheako kai andre sai thodol but, ka maren tutar espurnia e phuvia ta ka muken tut ando lallao.
Goleke, gia phenda o Del o Gazda: Soke bristrailan mandar, ta chudian man pala che zea, goleke terpisar sa cho bilachipe ta cho kurvaluko. Dav tut mo alav kai gia ka cherav le.
Ta i bichalde te ikharen llene duratar, ta von avile, ta soke avila chuke volipe pe lende, jaladan tut, ta makhlan che akha ta lachardan tut te dikho sukar,
Ta asundona e avazura katar e llene kai veselinape laia ta e llenenchar avile e sabeura katar o pusto, ta thode kore pe lenge va ta sukar korone pe lenge sore.