1
Osolobuẹ gwa m oku imẹ ahụa nke itenẹi wẹ kpụnhan ẹnyi Babilọnụ, nke akpọhịn iri imẹ ifọn nke iri. Ọ sị m,
2
“Nwa-ịhịan, detu ihiẹn tannị wụ, tannị-nịnị, makẹni eze Babilọnụ e kehunmẹgụọ Jerusalẹm tannị-nịnị.
3
“Ta nị ebọn isi-ikẹnni ilu, sị wẹ: Lee ihiẹn Osolobuẹ Nwọn Ihiẹn Ile ku: ọ sị, ‘Dọ ite ye ọkụn; dọ a ye; hu mirin ye imẹ ẹ.
4
Ja anụ ye imẹ ẹ, bu ebe ile rị mma imẹ anụ che ẹ — kẹ ọrụ a kẹ ẹka a. Kpọn ọkpụkpụ ka mma jun ẹ;
5
atụnrụn ị kachanrịn mma k'i k'e werikwọ. Nu nkụn ye ẹ — i kpọngụ ọkpụkpụ ndị hụ che alị ite. Shi ẹ n'ọ gbọ-gbọ-gbọ d'e ru ni ya lẹ ọkpụkpụ ndị hụ e ghegụ.
6
“ ‘Lee nwan ihiẹn Osolobuẹ Nwọn Ihiẹn ile gi ẹ e ku: Nsọngbu lalanị alịnị e gbu ọchụn, iteni tụgụ ẹnwụnrụn, ẹnwụnrụn hụn jụ n'ọ pụkọ! Gụpụha ọkpụrụkpụ-anụ ndị hụ ohu-ohu, ahọkwọlẹ wẹ ahọ.
7
Makẹni ẹdeke ndị o gbu rị imẹ ẹ: elu ọmụma ihiẹn ọwụlẹ rịlẹni k'o huye ẹ, o huyen'ẹ akpakalị nị ẹjan kpumẹ ẹ.
8
Igi kpasu ọnụma m lẹ mmẹgwarị, a lagụọ m ẹdeke hụ tọ ẹrịra elu ọmụma hụ, makẹ ihiẹn gha e kpumẹ ẹ.
9
Lee nwan ihiẹn Osolobuẹ Nwọn Ihiẹn Ile ku: Nsọngbu lalanị alị hụn e gbu ọchụn! Mmẹ nwẹn k'e kpọn nkụn w'e gi kpọ a ọkụn jun.
10
Kpacheni nwan nkụn ahụn, y'e bi ọkụn y'ẹ. Shi anụ ahụn ọhụnma, gi ihiẹn e mẹ anụ a sụọ ụsụọ gwọ a. Shi ẹ nị mirin ẹ tahịchanrịn kẹni ọkpụkpụ ndị hụ rẹnhin.
11
Dọ nwan okpokoro ite hụ ye elu ikeke-ọkụn ahụn n'ọ nụ ọkụn, chan, unyin rịn'a a rịnranpụ, nchara ọ gba a pụ.
12
“ ‘Kanị e mẹ wẹ elu, mẹ alị, onwọnni hụn ghanị; nchara ekweni pụ, ọkụn asadẹni ẹka wepụ a.
13
“ ‘Ẹnwụnrụn ị tụ wụ eje-obibi i. Ebe o mẹni a chanchangụọ m'ị, kanị unyin i apụnị, y'e nwunchankọzị d'e ru n'e mẹgụ m'ị ihiẹn kẹ olulu m han.
14
“ ‘Mmẹ wụ Osolobuẹ e kugụọ a. M k'e mẹrịrị a. Ogẹn m e rugụọ. Elekọ m ẹnya azụụn; emẹkọ m omikẹn; elekọ m ụnụ ẹnya ihun. Obibi i lẹ ihiẹn ị rị e mẹ kẹ m'e gi kin i ikpe. Ya kẹ Osolobuẹ ku.’ ”
15
Osolobuẹ gwa m oku, sị m,
16
“Nwa-ịhịan, m'e d'e gi ube-ohu napụ ị ihiẹn hụn a sụọnị ị. Ka, akwanlẹ ụya; akwanlẹ ẹkwan; eziẹnlẹ ẹnya-mirin.
17
A sụnhụ udẹn, kanị ẹlẹ hụn w'a nụ; akwankwọlẹ onyẹni jẹnkọ d'a nwụnnị, afụpụlẹ isi i, agbụpụlẹ akpụkụ ị; ekpumẹlẹ ihun; erilẹ ihiẹn-oriri w'e buhẹni onyẹ umẹ mẹ.”
18
Eki e fọn ụtụntụn, m nọ gwa wẹ ya, o ru ẹnyasị nwunyẹ m nọ nwụnhụn. Eki e fọn, m nọ mẹ kẹ Osolobuẹ dọn gwa m.
19
Wẹ nọ sị m, “Y'a gwakọ ẹnyi kẹ ihiẹn ndịnị ị rị e mẹ dọn gbashịarị ẹnyi?”
20
Ya m nọ sị wẹ, Osolobuẹ sị m:
21
Sị ebọn Izrẹlụ, “Lee ihiẹn Osolobuẹ nwọn ihiẹn ile ku: M'e d'e mẹrụ Ụlọ-nsọ m — ikẹn ụnụ hụn ụnụ gi a nyan isi, hụn a sụọ ụnụ ụsụọ olegha, a sụọ ụnụ ụsụọ obi. Wẹ k'e gi ọpịa-agha gbupụ ụmụ ụnụ ikẹnnyẹ lẹ ikpoho họdụ imẹ Jerusalẹm.
22
Ụnụ nwẹn sikọ d'e mẹ kẹ m dọn nwan mẹ. Ụnụ ekpukinkọ ẹtu-ọnụ; ụnụ erikọ ihiẹn-oriri hụ ndị umẹ mẹ e ri.
23
Ụnụ sikọ d'a fụma isi, yiri akpụkụ; ụnụ akwankọ ụya, ụnụ akwankọ ẹkwan. Njọ ụnụ k'a gha gbawa ụnụ obi; udẹn-udẹn kẹ ụnụ k'a gha a sụn imẹ igunrun ụnụ.
24
Izikẹlụ kẹ ụnụ sikọ d'e leri: ihiẹn o mẹ kẹ ụnụ k'e mẹ. Ogẹn ihiẹnni e gi mẹ, ụnụ a marịn nị mmẹ wụ Osolobuẹ nwọn ihiẹn ile.
25
“Yụ nwẹn, Nwa-ịhịan, ụhụọhịn m k'a napụ wẹ Ụlọ hụ wẹ gi e dọn ẹnya, hụn wụzị ịghọghọ wẹ lẹ ọghọ wẹ, ihiẹn ahụn a sụọ wẹ ụsụọ olegha, ihiẹn ahụn obi w'a chọ, napụzịkwọ wẹ ụmụ wẹ ikẹnnyẹ lẹ ikpoho —
26
ụhụọhịn hụ, onyẹ wanahịnnị k'a bịa d'a gwa ị ihiẹn mẹni.
27
Ogẹn ahụn kẹ ọnụ ị e gi shịapụzị, yụ lẹ onyẹ hụ e ku oku, y'a gbakọzị nkịtịn. Ị k'a wụrụnị wẹ ahịma. Ogẹn hụ, wẹ k'a marịn nị mmẹ wụ Osolobuẹ.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc