×

Ika Bible 2018

Izikẹlụ 25

1
Osolobuẹ gwà m oku, sị m:
2
“Nwa-ịhịan, bu ihun zinmẹ alị ndị Amọnụ n'i bu amụma ihiẹn k'e mẹni wẹ.
3
Sị ndị Amọnụ, ‘Gọn ni ntịn ihiẹn Osolobuẹ Nwọn Ihiẹn Ile ku. Osolobuẹ Nwọn Ihiẹn Ile sị: Ebe o mẹni ụnụ sị “Ẹhẹn!” makẹni wẹ mẹrụ Ụlọ-nsọ m, makẹni wẹ kpọnchanpụ ndị Izrẹlụ alị wẹ a gba okpokoro, makẹni wẹ kpụnrụn ndị Juda shi alị ọzọ,
4
m k'e bu nwan ụnụ che ẹka alị ndị rị ẹbamịn ọwụwa-ẹnyanwụn weri. Wẹ k'a bịa d'e ziẹntọ alị ụnụ, tumẹsọnmẹ ọdụ wẹ ye imẹ igunrun ụnụ, biri; wẹ k'e ri mkpụrụ osisi ụnụ, ra mirin-ẹran anụ ụnụ.
5
M k'e mẹ Raba wụ isi-alị ụnụ wụrụ ọfịa anyịnyan-mkpukpuke nọ a kpa nni, mẹ alị ụnụ Amọnụ wụrụ ebe ewu lẹ atụnrụn nọ a kpa. Ogẹn ahụn kẹ ụnụ e gi marịn nị mmẹ wụ Osolobuẹ.
6
“ ‘Osolobuẹ Nwọn Ihiẹn Ile sị: Ufiri ẹka ụnụ kpọ ogẹn eje-ihiẹn gi kunrun alị Izrẹlụ, ya lẹ egu ụnụ tẹn ogẹn hụ, a ghọghọ, a mụ wẹ ẹmụ,
7
m k'a tịnpụ nwan ẹka mẹ ụnụ ihiẹn, we ụnụ ye alị ndị ọzọ gbukwarị. M k'e tikpọchanrịn ụnụ, ụnụ a wụbehi alị nọkẹ ndị ọzọ. M k'e tikpọ ụnụ, ụnụ e gi ẹ marịn nị mmẹ wụ Osolobuẹ.’
8
“Lee ihiẹn Osolobuẹ Nwọn Ihiẹn Ile ku: Ebe alị Mụabụ lẹ alị Sẹẹ nọ sị, ‘Lee ni-o, alị Juda nọhụ kẹ alị ndị ọzọ,’
9
m k'a kwapụ nwan alị Mụabụ ẹka-nku, kpu isi-uvun ẹ oghe ghahanị ịnapụ a alị a ndị rị okẹn — hụn wụ ọghọ a — alị Bẹt-Jẹshimọtụ lẹ Baalụ-Miọnụ lẹ Kiriataim.
10
M k'e we Mụabụ cheni ndị Amọnụ, we wẹ ye alị ndị rị ibẹka ọwụwa-ẹnyanwụn weri, makẹ wẹ ghazị a nyanhan alị Amọnụ;
11
m k'e ye ndị Mụabụ afụnfụn. Ogẹn ahụn, wẹ k'a marịn nị mmẹ wụ Osolobuẹ.”
12
“Lee ihiẹn Osolobuẹ Nwọn Ihiẹn Ile ku: ‘Ebe o mẹni ndị Ẹdọm gi ihiẹn o mẹ ndị Juda mẹgwarị, ikpe a magụọ alị Ẹdọm ọda-ọda yeni mmẹgwarị hụ.
13
Osolobuẹ Nwọn Ihiẹn Ile sị nwan: M k'a tịnpụ ẹka mẹ Ẹdọm ihiẹn, gbunarịn wẹ ịhịan lẹ anụmanụ. M k'e mẹ ẹ gba okpokoro; ọpịa-agha k'e gbu wẹ, gha Tẹmanị d'e ru Dedanị.
14
M k'e mẹgwarị Ẹdọm. M k'e gi ndị nke m wụ Izrẹlụ mẹgwarị wẹ; wẹ k'e mẹ ẹ Ẹdọm kẹ olulu m han. Wẹ k'a marịn kẹ mmẹgwarị m nọ.’ Ya kẹ Osolobuẹ Nwọn Ihiẹn ile ku.”
15
“Lee ihiẹn Osolobuẹ Nwọn Ihiẹn Ile ku: ‘Ebe o mẹni ndị Filistia rị e mẹgwarị ndị Juda, e gi iwe ghalẹni a gụ e legberi wẹ, e mẹ ẹ ni wẹ tikpọ Juda ru alị,
16
Osolobuẹ Nwọn Ihiẹn Ile sị nwan: M'e d'a tịnpụ ẹka mẹ ndị Filistia ihiẹn. M k'e bepụ ndị Kẹrẹtị Filistia; m k'e tikpọpụ ndị họdụ mkpẹnrẹn-mirin hụ Filistia rị.
17
M k'e mẹgwarị wẹ ọhụnma-ọhụnma, gi ọnụma m ye wẹ afụnfụn ọda-ọda. M yegụ wẹ afụnfụn, a marịn wẹ nị mmẹ wụ Osolobuẹ.’ ”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes