1
Ase rituko rie ritang’ani ri’omotienyi, omwaka o ikomi nomo, ring’ana ri’Omonene rigacha asende, rigantebia:
2
“Aye mwanyabanto, omochie o Turo ogokeire ogosarigwa kwa Yerusalemu na goteba: Ahaa! Ahaa! Egeita ki’abanto giatagoirwe, kianyigokeire. Bono inche ninyetenenkie, ekiagera Yerusalemu osarekire.
3
“Ase ayio, aya naro Omonene Nyasae agoteba: Aye Turo, rora, inche nabeire mamincha yao, nindete abanto b’ebisaku ebinge mono bakorwanie, buna emerindo y’enyancha ekoimokerera igoro.
4
Abwo mbasarie chindwaki chia Turo, batagore nemerobiri y’ogotengerera. Inche nincheche riroba riaye rionsi, erinde aase agwo atigare are egetare gioka.
5
Omochie oyio nobe aase abarubi bakwanekera ebionga biabo agwo ase egati y’enyancha. Ninche Omonene Nyasae nakwanire. Omochie oyo nosakorwe nabanto b’ebisaku.
6
Abanto b’emechie yaye emeke ere ase engegu mbaitwe nemioro. Erio nario baramanye ng’a inche ninche Omonene.
7
“Aya naro Omonene Nyasae agoteba: Rora, nindete omoruoti ore omonene kobua abaruoti bande bonsi, Nebukadinesaro, omoruoti o Babeli, ache korwa sugusu amo ne chibarasi, ne chigari, na abariini be chibarasi, na omoganda omonene bw’abarwani esegi.
8
Omoruoti oyio naite nemioro abanto b’emechie yao emeke ere ase ense yao. Ere nigo araagache orwaki rw’ogwekengera rogoetanane, na areme eburi bosio bwao, naende aagache ekerama kebe eng’aya agwekengera.
9
Natege egekorero ki’ogotagorera chindwaki chiao achisarie, natagore emerobiri y’ogotengera nebisire biaye.
10
Chibarasi chi’omoruoti oyio nigo chire chinyinge mono, nachiimokie ebuse enyinge egotube kegima. Ekero arabe ogosoa ase ebiita biao buna abanto bagosoa ase omochie otagoirwe, chindwaki chiao nigo chiratengeche ase okwoga kw’abariini chibarasi ne chigari ao ao.
11
Chibarasi chiaye nchitiringe chinchera chiao chionsi nebitaago biabo, omoruoti oyio naite abanto bao nemioro, naende atagore amatenenerio ao amanene anga chisiiro agwe inse.
12
Abanto abwo mbakoure obotenenku bwao bwonsi, na mbaire ebinto biao bi’oboonchoreria; mbatagore chindwaki chiao ne chinyomba chiao chingiya. Nigo baraimokie amagena, ne chibao, na amaroba, babirute ase chinyancha ime.
13
Ninsirie amariogi ’amatera are ime yao, na ay’amakano naro, taigugwa naende.
14
Ninkoonchore obe egetare gioka ase abarubi bakwanekera ebionga biabo. Aye Turo tokoagachwa naende, ekiagera ninche Omonene nakwanire ayio. Nabo Omonene Nyasae atebire.
15
“Aya naro Omonene Nyasae agotebia Turo: Inee! Ekero aye oraiyerigwe inse na gosarigwa, ebisinka tibigotengechigwa neriogi erio, na ase okweumia kw’abanto baakirwe ekero ogoitwa okonene korabe ase egati yao?
16
Erio abagambi bonsi bare ase ense ere enyancha mbarabare mbarue ase ebirogo biabo bi’obonene, barusie emiambaro yabo, naende barusie chianga chiabo chire nebieni ao ao. Barabwo mbabe bakoiguswa, nigo baraikaranse inse ase amaroba, babe bakona‐koiguswa na goichana igoro yao.
17
Erio barabwo mbakoreere, babokie amagombo batebe: “Aye omochie omenyire nabanto be chinyancha, naki gwasarigwe! Aye omochie omanyekanete mono, aye kwarenge ne chinguru ase enyancha, nigo gwaichanetie bonsi abamenyete ime yao na kobaondokia.
18
Bono ebisinka mbiiguswe ase rituko ri’ogokwa kwao, ee, ebisinka bire ase enyancha mbigoichanere ekero orasirigwe.
19
“Aya naro Omonene Nyasae agoteba: Ningosirie obe omochie ore bosa buna emechie etamenyiri. Nindete chindiba chigotube, na amache amange agotube boigo.
20
Ningotugute gochia ase embeera ime, ogende ase abanto ba kare bachiete. Ninkobeke omenye ime ye riroba, aase agwo asaretigwe kare, obeere amo nabanto abwo bagendete ase chimbeera ime. Aye tokomenywa naende, korende inche ninkore amang’ana amanene ase ense y’abare moyo.
21
Ningosirie ase enchera y’okoondokia mono, tokogenderera kobao; abanto mbakorigie, korende tibagokonyora naende nonya ng’ake. Nabo Omonene Nyasae atebire.”
Gussi Bible 2020
OLD EKEGUSII BIBLE PROTESTANT EDITION Bible Society of Kenya, 2020