Ngwana motho! Ke lefetša tše Batiro ba di boletšego ba era Jerusalema ba re: Kgonenee! Magoro a ditšhaba a robagantšwe! Bjale go buletšwe nna! Go tlo huma nna ge go senyegile motse woo!
Gobane Morena Mong wa bohle o re: Ke nna e! Ke tliša Nebukadinetsara kgoši ya Babele moo Tiro, yena kgoši ya magoši a leboa. O tla ka dipitsi le koloi le banamedi ba tšona, makokokoko a dira.
O tlo ribegetšwa ke marole a mabitsi; mešito ya tšona le ya makoloi, e tlo šišinya merako ya gago, mohla ba go tsena ka dikgoro wa go tsena motse o thopiwa.
Ba tlo thopa mahumo a gago, ba tšea matlotlo a gago, ba uša maboto a gago, ba rutla nywako yago ya mathabo. Dikago tša gago, dikota tša gago, le lona lerole la gago, ba tlo di lahlela lewatleng.
Morena Mong wa bohle o bolela a era Tiro, o re: A dihlakehlake, di ka se šišinyege ka modumo ge o ewa, ka go gokga ga ba hlabilwego, ge mo go wene go gailwa!
Ba tlo thuntšha sello ba go llela, ba re: Joo, ga wa senyega ge! Modulabathobamawatle, motsemoretiwa, o bego o ne maatla mawatleng; bona le baagi ba wona, ba bego ba boifša ke ba agilego mawatleng ka moka.
Ke ka gobane go boletše Morena Mong a bohle, a re: Mohla ke go dira motse wa lešope, wa se hlwe o dulwa, mohla ke rotola meetse a bodiba a go ribegetša, mafulamagolo a go khurumetša.
Ke tlo go fološa, wa ya go badulasekoting, go setšhaba sa bogologolo, kua nageng ya fasefase, felo ga marope a neng le neng a batheogelasekoting, o se sa tlo dula batho, ke se sa go thakga mo nageng ya ba phelago.