‘Abeipa Zehôvâh ta hetana heta a tah,’ tah teh: “Nâ, Izi bei Phiraoh, Chavahzy liah liata tisadâh rarôh ypa, ‘Nile chavah he kei eih châ ta, Keima châ tlai ta ei taopa a châ,’ a tahtuhpa y, Moh teh, ei châ dyuh hih.
Na kâh ruzy liata keipa ta cha paao aw na ta, Na vo liata chavah ngazy ei pabaisa aw; Na chavahzy tawhta châ daophi aw na ta, Na vo liata a baipa, Na chavah nga zydua chhaota ei châ daophi aw.
Râhchawhpa liata cha thy aw na ta, Na chavah nga zydua chhaota ei cha thy aw. Lyurâhpa liata tla aw chi ta, Na ri lapa châ leipa aw ta, Pabupa châ hra aw va chi. Nama rizy cha, Lei sahrâhpa nata vâ pavawzy hnohta, Nie awpa ta ei pie aw ei.”
“Chavâta Abeipa Zehôvâh ta hetana heta a tah: Pachâ teh, na chô liata zaozi vaw patlôsa aw na ta, chyhsapa nata sa zy nâ tawhta ei chhawh pathlah khai aw ei.
Chatanachata Izi râh cha roryhrapa nata râh rypa vaw châ aw ta, kei he Abeipa ei châ tahpa ama pahno aw. “‘Nile he keima eih châ ta, kei ta ei taopa a châ,’ na tahpa vâta,
pachâ teh, châ dyuh na ta, na chavahzy ei dyuh hih. Izi râh cha, Mikadô tawhta Syne taihta nata Kusi râhri tlôna taihta, râh rypa nata roryhrapa râh ta ei tao aw.
Izi râh cha roryhrapa râhzy hry liata roryhrapa râh miakha ta tao hra aw na ta, a khihpizy cha khihpi rypazy hry liata kô sypalih chhôh a rypa ta a y aw. Izi mo cha phopizy hry liata hiepatla aw ei na ta, râhzy liata ei papai aw ei.
Khinarâh zydua liata nawraih chaipa châ aw ta, râhzy chô lâta anosasyh ta a cheihchalo beih khao aw vei. Thata panawhsa aw ei na ta, râhzy chô liata ryureih beih khao aw veih ei.
Izarei pathlazy ta baona ama hia tita, Izi moleina amâ thei ha tyhpa vâta, amâ ngâchhâpa châ khao aw veih ei. Chatanachata Abeipa Zehôvâh ei châ tahpa ama pahno aw.”
“Chyhsa sawchapawpa y, Babylaw bei Nebukaneza ta a pheisaihzy Tyre chô liata rai thata pahriasa ta, chyhsa to luh tlyh khai ha ta, ama ngiatlâh â hlia khai haw. Chatanachôta ano nata a pheisaihzy ta ama hriapasana vâta Tyre tawhta athôhna khâpa hmah hmô hlei veih ei.
Chavâta Abeipa Zehôvâh ta hetana heta a tah: Pachâ teh u, Izi râh cha Babylaw bei Nebukaneza pie aw na ta, a hneirônazy siekhei khai aw ta, râh hneirônazy la khai aw ta, a hrao khai aw. Cha hraona sôh cha a pheisaihzy hlao châta a châ aw.