|
| 1 |
|
| Mpaho Ruhanga angira ati: Iwe muntu 'we, rya ogu muzingo, ogyende, ogambire ab'eihanga rya Isiraeli. |
|
| 2 |
|
| Ntyo nyashama, ampa ogwo muzingo kugurya. |
|
| 3 |
|
| Kandi angira ati: Iwe muntu 'we, rya ogu muzingo ogu naakuha ogwigute. Ntyo naanye ngurya, gunnurira nk'obwoki. |
|
| 4 |
|
| Reero angira ati: Muntu 'we, irooko oze omu b'eihanga rya Isiraeli, obagambire ebi ndikwenda kubagambira. |
|
| 5 |
|
| Manya tiwaatumwa ha bantu b'orurimi rw'endunga-mahanga kandi orugumire; kureka aha b'eihanga rya Isiraeli. |
|
| 6 |
|
| Ti ha b'amahanga maingi ag'endimi zitarikumanywa kandi ezigumire, ezi otarikubaasa kwetegyereza ebigambo byazo. Buzimazima kuri naaba nkutumire aha bantu nk'abo, bakaakuhuriire. |
|
| 7 |
|
| Kwonka ab'eihanga rya Isiraeli tibarikwija kukuhurira ahabw'okuba tibarikwenda kumpurira. Manya ab'eihanga rya Isiraeli boona n'entahurira kandi n'engangaazi. |
|
| 8 |
|
| Reeba, naiwe naakuhindura ogangaire obone kubabaasa. |
|
| 9 |
|
| Kandi naakuhindura ogumire nk'eibaare ry'enkangabuye. Otatiina abo bagomi n'obu kwakuba okuhahaaza omutima. |
|
| 10 |
|
| Kandi yaagaruka yangira ati: Muntu 'we, ebigambo byona ebi naaza kukugambira obihurire kandi obiteho omutima. |
|
| 11 |
|
| Reero ogyende, oze omu b'eihanga ryawe abaazaahiibwe, obagambire eki Nyowe Mukama Ruhanga ndikwenda kubagambira, yaaba bahurira nari banga. |
|
| 12 |
|
| Ebyo ku byahwaire, Mutima yankiriza, reero Nyakubaho ow'ekitiinwa ku yaimukire ahu yaabaire ari, naahurira orwari rw'abarikugira bati: Nyakubaho aheebwe ekitiinwa omu butaaho bwe. |
|
| 13 |
|
| Okwo kukaba kuri okuhoorera kw'amapapa g'ezo nyamaishwa nigakoranaho, kandi n'endigito ya nyamuziga eziziri aha rubaju, ezaabaire nizirigita nk'omutsitsa. |
|
| 14 |
|
| Mutima ku yankiriize yantwara hare, naagyenda ngwirwe kubi munonga ninganya, amaani ga Mukama gaanyiziraho kimwe. |
|
| 15 |
|
| Ntyo naahika Telabiibu omu baazaahiibwe, abaabaire batwaire aha rubaju rw'omugyera Kebari, naamarayo ebiro mushanju mbarimu nyeshobeire. |
|
| 16 |
|
| Ebiro mushanju ku byahwaire, Nyakubaho yangira ati: |
|
| 17 |
|
| Iwe muntu 'we, nkuhindwire omurinzi w'eihanga rya Isiraeli. Ku oraagume waahurira eki naagamba obanteisize. |
|
| 18 |
|
| Ku ndigambira omuntu enyabibi nti: Buzimazima ori ow'okufa, haza iwe otamuhane kureka emitwarize ye emibi, ngu abone kujuna amagara ge; haza ogwo muntu enyabibi yaafeera omu bibi bye, niiwe ndimubuuza. |
|
| 19 |
|
| Kwonka ku oriteisa omuntu enyabibi, yaayanga kureka ebibi bye, nari emitwarize ye emibi, aryafeera omu bibi bye, haza iwe oryaba ojunire amagara gaawe. |
|
| 20 |
|
| Ekindi, omuntu ohikiriire ku arireka okuhikiriira kwe, yaakora ebibi, naanye naamureka kyamurugiramu okugwa, aryafa. Ahabwawe okutamuteisa, aryafa azizire ebibi bye, n'ebirungi ebi yaakozire tibiriijukwa, haza niiwe ndimubuuza. |
|
| 21 |
|
| Kwonka ku oryehanangiriza omuntu ohikiriire okutakora kibi, nawe atakikore, buzimazima aryaba ohuriire kandi naiwe oryaba okirize amagara gaawe. |
|
| 22 |
|
| Mbwenu okwo niyo amaani ga Mukama gaanyiziireho kimwe, akangira ati: Imuka oze omu ruhita, mbe niyo naagambira naiwe. |
|
| 23 |
|
| Naanye ntyo nyimuka, nza omu ruhita. Ku nza kugira nti, ndeebayo ekitiinwa kya Nyakubaho, ekiri nk'eki naareebire aha rubaju rw'omugyera Kebari. Ntyo ngwa njuumaire. |
|
| 24 |
|
| Kwonka Mutima wa Ruhanga anzamu, anyemereza, agamba naanye, nangira ati: Irooko oyekingirane omu nju yaawe. |
|
| 25 |
|
| Mbwenu iwe muntu 'we, reeba niinyija kukutaho emiguha, ngikubohese, oremwe kushohora kuza omu bantu. |
|
| 26 |
|
| Kandi niinyija kukuramatiza orurimi aha nkanka, obe ekiteta, obure agateisa abo bagomi. |
|
| 27 |
|
| Kwonka ku ndaabe nyine eky'okukugambira, niinyija kukubaasisa kugamba, obagambire eki Nyowe Mukama Ruhanga ndikwenda kubagambira. Mpaho orikwenda kuhurira, ahurire, n'otarikwenda kuhurira, arereere; ahabw'okuba n'abagomi. |
|
|
|
|