×

現代台語譯本羅馬字版

以西結書 30

1
Siōng Chú tùi góa kóng,
2
“Jîn-chú ah, lí tio̍h kóng ū-giân; lí tio̍h kóng Chì-koân ê Siōng Chú án-ni kóng: Chhám ah, hit-ji̍t! Lín tio̍h tōa-siaⁿ ai-khàu.
3
Hit-ji̍t kàu lah! Siōng Chú ê ji̍t pek-kūn lah! Hit-ji̍t sī o͘-hûn-bi̍t-pò͘, lia̍t-kok siū hêng-hoa̍t ê ji̍t-chí.
4
Ai-ki̍p beh tú-tio̍h chiàn-loān, Kó͘-si̍t ōe kám-siū thòng-khó͘. Ai-ki̍p -lâng siū tô͘-sat ê sî, jîn-bîn ê châi-hù beh hō͘ lâng chhiúⁿ--khì; i ê kun-ki oân-choân siū thiah-húi.
5
Kó͘-si̍t -lâng, Hut -lâng, Lū-tí-a -lâng, A-la-pek -lâng, Kò͘-phó͘ -lâng, í-ki̍p kap Ai-ki̍p kiat-bêng--ê lóng beh kap Ai-ki̍p -lâng chòe-hé sí tī to-ē.
6
“Siōng Chú án-ni kóng, ‘Tùi pak-pō͘ ê Bi̍t-toa̍t kàu lâm-pō͘ ê Sek-hut-nî, só͘-ū chi-chhî Ai-ki̍p ê lâng lóng beh sí tī to-ē; Ai-ki̍p khoa-iāu ê koân-sè beh kàng-kē pìⁿ-chòe pi-bî. Góa — Chì-koân ê Siōng Chú án-ni soan-kò.
7
Ai-ki̍p beh pìⁿ-chòe sè-kan siōng pha-hng ê só͘-chāi, bô chi̍t ê siâⁿ-tìn ōe pí Ai-ki̍p ê siâⁿ-tìn koh-khah hong-hòe.
8
Góa pàng-hé sio Ai-ki̍p ê sî, só͘-ū pang-chān Ai-ki̍p --ê mā beh siū châu-bia̍t. Hit-sî, in chiū chai góa sī Siōng Chú.
9
“‘Hit-ji̍t, góa beh phài sù-chiá chē-chûn khì Kó͘-si̍t -lâng hia; an-ún chū-chāi ê Kó͘-si̍t -lâng beh kiaⁿ-hiâⁿ, beh ū chhin-chhiūⁿ Ai-ki̍p só͘ siū ê thòng-khó͘ lîm-kàu in. Khòaⁿ leh, chiah-ê sū liâm-piⁿ beh hoat-seng!’
10
“Chì-koân ê Siōng Chú án-ni kóng, ‘Góa beh thong-kè Pa-pí-lûn -ông Nî-pò͘-kah-nî-sat, châu-bia̍t Ai-ki̍p ê jîn-bîn.
11
I beh tòa-niá lia̍t-kok tiong hiong-ok ê kun-tūi lâi húi-bia̍t Ai-ki̍p. In beh ēng to kong-kek Ai-ki̍p -lâng, hō͘ si-thé móa-sì-kòe.
12
Góa beh hō͘ Nî-lô-hô ta-khok-khok, kā Ai-ki̍p kau tī siâ-ok ê lâng chhiú-tiong. Góa beh thong-kè gōa-kok-lâng húi-hoāi Ai-ki̍p ê it-chhè. Góa Siōng Chú án-ni soan-kò.’
13
“Chì-koân ê Siōng Chú án-ni kóng, ‘Góa beh húi-bia̍t ngó͘-siōng, tùi Bēng-húi-su tû-khì sîn-siōng; Ai-ki̍p bô koh ū kun-ông; góa beh hō͘ Ai-ki̍p -lâng oa̍h tī kiaⁿ-hiâⁿ ê tiong-kan.
14
Góa beh hō͘ Ai-ki̍p ê Pa-te̍k-lô pìⁿ-chòe hong-po͘, ēng hé sio Só-an, hêng-hoa̍t tōa-siâⁿ Tí-pí-su.
15
Góa beh chiong góa ê tōa siū-khì piàⁿ tī Ai-ki̍p siōng kian-kò͘ ê iàu-sài Sìn, mā beh siau-bia̍t Tí-pí-su ê jîn-bîn.
16
Góa beh pàng-hé sio Ai-ki̍p; Sìn beh thòng-khó͘ ká-kún. Tí-pí-su ê siâⁿ-chhiûⁿ beh siū kong-phòa, Bēng-húi-su beh kui-ji̍t siū tùi-te̍k kong-kek.
17
Hi-lī-pho-lí kap Pí Pek-si̍t ê siàu-liân-lâng lóng beh sí tī to-ē, hiah-ê siâⁿ ê chū-bîn hō͘ lâng lia̍h--khì.
18
Góa húi-hoāi Ai-ki̍p ê koân-sè, hō͘ i khoa-iāu ê khùi-la̍t chiong-chí ê sî, Tap-pí-le̍k ji̍t--sî beh pìⁿ-chòe o͘-àm, o͘-hûn kā i jia-khàm, só͘-ū ê chū-bîn lóng beh siū-lia̍h chòe hu-ló͘.
19
Góa beh án-ni hêng-hoa̍t Ai-ki̍p, in chiū chai góa sī Siōng Chú.’”
20
Tē-cha̍p-it nî chiaⁿ-ge̍h chhoe-chhit, Siōng Chú tùi góa kóng,
21
“Jîn-chú ah, góa í-keng phah-tn̄g Ai-ki̍p -ông ê chi̍t ki chhiú-kut, bô lâng kā i i-tī, pau-chat, hō͘ i ū-la̍t thang gia̍h to.
22
Só͘-í, góa — Chì-koân ê Siōng Chú án-ni kóng, ‘Góa beh kap Ai-ki̍p -ông choh-tùi, phah-tn̄g i nn̄g ki chhiú-kut, kā ióng--ê kap tio̍h-siong--ê lóng phah-tn̄g, hō͘ i chhiú-lāi ê to lak-lo̍h thô͘-kha.
23
Góa beh kā Ai-ki̍p -lâng hòng-tio̍k khì lia̍t-kok, sì-sòaⁿ tī choân sè-kài ta̍k só͘-chāi.
24
Jiân-āu, góa beh hō͘ Pa-pí-lûn -ông ê chhiú ióng-chòng ū-la̍t, kā góa ê to kau hō͘ i. M̄-kú góa beh phah-tn̄g Ai-ki̍p -ông ê chhiú-kut, hō͘ i tī Pa-pí-lûn -ông bīn-chêng chhin-chhiūⁿ siū-siong beh sí ê lâng haiⁿ-haiⁿ-chhan.
25
Góa beh hō͘ Pa-pí-lûn -ông ê chhiú ióng-chòng, hō͘ Ai-ki̍p -ông ê chhiú soe-lám sûi--lo̍h-khì. Góa kā góa ê to kau hō͘ Pa-pí-lûn -ông, i gia̍h to kong-kek Ai-ki̍p ê sî, in chiū chai góa sī Siōng Chú.
26
Góa beh kā Ai-ki̍p -lâng hòng-tio̍k khì lia̍t-kok, sì-sòaⁿ tī choân sè-kài ta̍k só͘-chāi; hit-sî, in chiū chai góa sī Siōng Chú.’”
Chinese TTVR
The Bible Society in Taiwan
:
保存笔记