×

Ika Bible 2018

Izikẹlụ 30

1
Osolobuẹ gwà m oku, sị m,
2
“Nwa-ịhịan, bu amụma sị: Osolobuẹ Nwọn Ihiẹn Ile sị: ‘Gomẹ ni! Makẹ eje-ụhụọhịn ahụn lalanị!’
3
Makẹni ụhụọhịn ahụn e rugụọ; ụhụọhịn Osolobuẹ a rịgụọ nsue! Igwere efọnkọ ụhụọhịn hụ! O k'a jọ alị ichẹn-ichẹn njọ ụhụọhịn hụ!
4
Agha k'a bịa Ijiptu. O k'a fụgbu alị Ẹtiopịa, ogẹn wẹ k'e gi gbu ndị Ijiptu; ogẹn wẹ k'e buru akụ-lẹ-ụba alị Ijiptu, tikpọ a ru alị.
5
“Ndị Ẹtiopịa, ndị Putu, ndị Ludu lẹ ndị Arebịa ile lẹ ndị Libia lẹzi ndị ile wẹ ile gba kịgbama kẹ ọpịa-agha sikọ d'e gbu.
6
Osolobuẹ sị: Ndị rị a kwadọn Ijiptu k'a dan, ikẹn hụn o gi a họnrọn a danru alị. Ọpịa-agha k'e gbu ndị rịn'a, ghakwọrị Mig'dọlụ d'e ru Swẹne wụ Aswanị. Ya kẹ Osolobuẹ Nwọn Ihiẹn Ile ku.
7
Ijiptu k'a gba okpokoro, o k'a kadẹ alị ndị ọzọ okpokoro a gba; obodo ndị rịn'a k'a la iwi o k'a kadẹ obodo ndị ọzọ iwi a la.
8
Wẹ k'a marịn nị m wụ Osolobuẹ, ogẹn m'e gi bi ọkụn ye alị Ijiptu, ndị ile e yen'ẹ ẹka a dan.
9
“O ru ụhụọhịn ahụn, ndị m k'e zi k'e gi ụgbọ-mirin jẹn d'a gwa ndị alị Ẹtiopịa ya, egun a tụgbu wẹ ebahụn ẹhụ fu wẹ; o k'a fụgbu wẹ ụhụọhịn hụ eje-ihiẹn k'e kunrun Ijiptu, makẹni o k'e mẹrịrị.
10
Osolobuẹ Nwọn Ihiẹn Ile sị: M k'e gi Nebukadineza eze Babilọnụ gbupụ igwerigwe Ijiptu.
11
Ya lẹ ndị-agha a — ndị alị hụ ẹfọ kachanrịn a jọ — kẹ m k'e wẹhẹ d'e tikpọ alị Ijiptu. Wẹ k'e sepụhanị Ijiptu ọpịa-agha, gbu ịhịan jun alị ahụn.
12
M k'e mẹ Iyi Naịlị Ijiptu tahị, re alị Ijiptu ye ndị-ejẹ; e gi m ndị alị ọzọ tikpọ alị Ijiptu lẹ ihiẹn ile rị imẹ ẹ la iwi. Mmẹ wụ Osolobuẹ e kuọl'a.
13
Osolobuẹ Nwọn Ihiẹn Ile sị: M k'e tikpọzịkwọ mmọn ndị ahụn wẹ kpụ, tikpọpụ ihiẹn ndị hụ nwọnlẹni isi wẹ kọma imẹ Mẹmfisi alị Ijiptu. Eze arịkọzị Ijiptu, m k'e rọngbarị alị Ijiptu ile egun.
14
M k'e tikpọ ọkpụlọ wẹ wụ Patrọsị la iwi, mụ ọkụn ye alị wẹ wụ Zụanị, ye alị wẹ wụ Tẹbẹsi afụnfụn.
15
M k'e hu ọnụma m kpu alị Sini wụ Pelusumu, ebe ndị Ijiptu a gbaban, e gbupụ m igwerigwe rị Tẹbẹsi.
16
M k'a mụ ọkụn ye Ijiptu; alị Pelusumu Ijiptu k'a rị imẹ afụnfụn a marịrị; Tẹbẹsi nkẹ sikọ nwan d'a dan; ndị iṅẹnrẹn k'a maye Mẹmfisi ebe eki rị elu.
17
Ọpịa-agha k'e gbu ikorọbịa Ọọnị lẹ Pi-Bẹsẹtị, wẹ k'a kpụnrụn ikpoho wẹ shi alị ọzọ.
18
Igwere efọnkọ imẹ Tapanhẹsị ogẹn m'e gi kpagipụ ẹgan Ijiptu kpọma ndị ọzọ, ikẹn ẹ ahụn o gi a họnrọn a gụ. Ihun elu k'e mẹ bii imẹ Ijiptu; wẹ k'a kpụnrụn ndị bi obodo ndị rịn'a shi alị ọzọ.
19
“Ẹrịra kẹ m k'a dọn ye Ijiptu afụnfụn, e gi w'ẹ marịn nị mmẹ wụ Osolobuẹ.”
20
Ogẹn o gi ru ahụa nke mmanaị, nke akpọhịn ẹsa imẹ ifọn ibuzọ, Osolobuẹ nọ sị m:
21
“Nwa-ịhịan, a kpagigụọ m Fẹro eze Ijiptu ẹka. Lee ẹ, wẹ eke kẹnmẹ ẹ n'ọ la mọbụ kpaye ẹ ihiẹn n'o kẹnrẹn kẹn'ọ nị a kwọndọn ọpịa-agha.
22
Osolobuẹ Nwọn Ihiẹn Ile sị nwan: Mmẹ lẹ Fẹro eze Ijiptu rọ. M k'a kpagi ẹ ẹka ẹbụọ, kẹ hụn rị ikẹn kẹ hụn kpagini, e mẹ m ọpịa-agha a dannahịn a.
23
M k'e feyịya ndị Ijiptu ye alị rị ichẹn-ichẹn; m k'e feyịya wẹ ye ebe rị ichẹn-ichẹn.
24
M k'e mẹ ẹka eze Babilọnụ kẹnrẹn, bu ọpịa-agha m che ẹ ẹka, kanị m k'a kpagi Fẹro eze Ijiptu ẹka, ọ sụn udẹn ihun eze Babilọnụ nọkẹ onyẹ wẹ rụ eje-ẹhụ.
25
M ke mẹ ẹka eze Babilọnụ kẹnrẹn, kanị ẹka Fẹro k'a lịlọhị. Wẹ k'a marịn nị mmẹ wụ Osolobuẹ ogẹn m'e gi bu ọpịa-agha m che eze Babilọnụ ẹka, o gi ẹ mẹ alị Ijiptu ihiẹn.
26
M k'e feyịya ndị Ijiptu ye alị rị ichẹn-ichẹn; m k'e feyịya wẹ ye ebe rị ichẹn-ichẹn, ogẹn hụ kẹ w'e gi marịn nị mmẹ wụ Osolobuẹ.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes