×

Ekitabo Erikwera 2008

Ezekieli 30

1
Kandi Nyakubaho akagaruka yaagira ati:
2
Iwe muntu 'we, hanuura noogira oti: Oku nikwo Mukama Ruhanga arikugamba, naagira ati: Muboroogye nimugira muti: Eshi eryo izooba riryagwerwa akagwe!
3
Manya eryo izooba riri haihi; eizooba rya Nyakubaho riri haihi; riryaba eizooba ry'ekibunda, obunaku obu amahanga gariheebwa ekifubiro.
4
Abantu baitwa, obutungi bwayo bwanyagwa, n'emisingi yaayo yaasheenyagurika. Abanyaetiopiya baryaitwa obusaasi.
5
Etiopiya, Puuti, Luudi, Buharabu yoona, Libiya n'abantu b'omuri egyo nsi abariba baragaine endagaano y'okukwatanisa, baryaitwa nabo.
6
Oku nikwo Nyakubaho arikugamba naagira ati: Abantu abarikuha Misiri emikono baryagwa, amaani agarikugireetera kwehimbisa garyaikaikana, n'abantu baayo baitwe rurara okwiha Migidooli okuhitsya Syene. Nikwo Mukama Ruhanga arikugira.
7
Eryahindurwa amatongo ahagati y'ezindi nsi ezaahindwirwe, n'endembo zaayo ziryaba ahagati y'ezaacwekyereziibwa.
8
Ku nditweka omuriro omuri Misiri abarikugirwanaho baafa, obwo nibwo barimanya ku ndi Nyakubaho.
9
Eryo izooba entumwa z'amaguru ziryandugaho, zize kutiinisa Abanyaetiopiya abataine ki beetaireho, bagire obusaasi aha izooba eri Misiri eritungiraho ekifubiro; kandi reeba, eryo izooba ryaza kwija.
10
Oku nikwo Mukama Ruhanga arikugamba naagira ati: Ndyamaraho obutungi bwa Misiri, ninkoresa Nebukadenezaari omugabe wa Batubooni.
11
We aryahurura n'engabo ze zitaine saasi okukira agandi mahanga, ncwekyereze ensi zikwaitse zaarurara, ziteere Misiri, zigiijuze emitumbi.
12
Ndyayomya omugyera Nailo, reero Misiri ngirekurire abantu babi, ndeete abanyamahanga bagihindure amatongo n'ebigirimu byona. Nyowe Nyakubaho niinye naakigamba.
13
Oku nikwo Mukama Ruhanga arikugamba naagira ati: Ndyacwekyereza emandwa, mmareho baaruhanga b'ebishuba n'omuri Menfisi; omuri Misiri tiharigaruka kubayo mutegyeki; abantu baayo ndyabaitsa obwoba.
14
Patiroosi ndyagihindura amatongo, Zoani ngitwekyemu omuriro, na Tebesi ngihe ekifubiro.
15
Ndyagirira Siini ekiniga kingi, ekigo kya Misiri ekigumire, n'enyanja y'abantu b'omuri Tebesi mbamareho.
16
Ndyatweka omuriro omuri Misiri, Siini egire obusaasi bwingi, Tebesi bagifumure, engo zaayo zikumbagare.
17
Abatsigazi b'omuri Aveni na Pibeseeti baryagwa aha rugamba, n'abakazi baamwo batwarwe bari enkwatwa.
18
Ku ndimara omuri Tehapaneheesi obutegyeki bwa Misiri, n'okweraata amaani kwabo kwahweraho kimwe, omushana guryahinduka omwirima, eshwekwe ebicu, n'abaishiki baayo batwarwe bari enkwatwa.
19
Haza ku ndifubira ntyo Misiri, nibwo barimanya ku ndi Nyakubaho.
20
Bwanyima omu mwaka gwa ikumi na gumwe, omu kwezi kw'okubanza, aha kiro kyakwo kya mushanju, Nyakubaho akangira ati:
21
Iwe muntu 'we, mpenzire omukono gwa Faraaho omugabe wa Misiri; kandi tigukabungirwe nobu kwakuba okugushemba kugutambira, ngu gubone kugira amaani g'okukwata rurara.
22
Nikyo Mukama Ruhanga arikugirira ati: Reeba, naaba omuzigu wa Faraaho, omugabe wa Misiri, kandi niinyija kumuhenda emikono yombi, oguhuriire n'oguhendekire, mmunagise rurara ei akwaitse.
23
Ndyataataanisiza Abanyamisiri omu mahanga, mbanagye omu nsi zaago.
24
Ndyaha emikono y'omugabe wa Babulooni amaani, mmute rurara omu ngaro; kwonka Faraaho we ndyamuhenda emikono atsindire ou maisho ge nk'ohutaire obuhuta bw'okumwita.
25
Ndyaha amaani emikono y'omugabe wa Babulooni, kwonka eya Faraaho eryagwa. Aho niho barimanyira ku ndi Nyakubaho. Ku ndikwatsa omugabe wa Babulooni rurara yangye, aryabangira ensi ya Misiri omukono kugirwanisa;
26
ndyataataanisiza Abanyamisiri omu mahanga, mbanaganagye omu nsi zaago. Haza obwo nibwo barimanya ku ndi Nyakubaho.
Nyankole Bible 2008
The Bible with Apocrypha in Runyankore-Rukiga, new revised joint translation The Bible Society of Uganda, 2008
:
Save Notes