Pachâ teh, Asuria cha Lebanaw liata sidy tho châ ta, A chiah a ngiapa nata a nohdi buh a rôhpa a châ; Thokô a sâh ngaitapa châ ta, A kithlao vâ meihdo taihta a daihpa a châ.
Khazohpa sadô liata sidy thozy ta a kho leipa ei ta, Meisah thozy ta a chiahzy a kho veih ei; Asieh thozy ta a chiahzy a kho hra leipa ei ta, Khazohpa sadô liata tho kheihawhpa rai ta, Ano hawhta a ngiapa y veih ei.
Chihropa nata phopizy hry liata phopi nôchhie chaipazy ta thlu ei ta, ama siesai haw. Tlâhpizy liata nata saikaozy liata a chiahzy tla hôlô ta, chavah kaozy liata a chiahpizy a tlie hôlô. Khizaw phopi zydua ta a nohdi tawhta pua ei ta, ama siesai haw.
Chavah kiah liata thozy â sâh ngaitapa ta laiseih khao leipa ei sala, vâ meihdo taihta ama kithlao chaluah khao hra leipa ei sala, ti ta pasapa tho kheihawhpa hmahta ano tlu ta amâ sâh khao lei nawpa ta, he zydua he taopa a châ. Âmo cha alei ry khaohtlô lâ a zu hapa chyhsa sawzy yna lâ sie awpa ta, thina lâta hlâ hapazy ama châ.
“Abeipa Zehôvâh ta hetana heta a tah: Sidy tho Athihkhih lâ a zu noh ta ti athupazy cha mâchhiesana ta khu na ta, a chavahzy patu na ta, chavah hluhpizy cha loh khao leipa ta amâ chalih haw. Lebanaw chhao ano vâta zohmyhna ta khu na ta, lyurâhpa tho zydua ano vâta ama panao khai haw.
A paona pyu ta phopizy chalyusa na ta, khaohtlô lâ a tla hapazy hnohta Athihkhih liata ei thy pathlah nota phopizy ei chalyusa ei. Idâh tho zydua, Lebanaw tho pha chaipazy, ti ta pasapa tho zydua cha alei ry liata thlah palôhpa ta ama y.
“Idâh thokôzy hry liata rônahna nata palyupalihna liata nâ hawhpa he ahy a y tly? Châhrasala Idâh thozy chhaota alei ry lâ thypa châ aw chi ta, zaozi ta thiepa chopawtaileipazy hry liata nâ zia aw. “Cha hawhna chata Phiraoh nata a zawpi zydua cha ama châ aw,” Abeipa Zehôvâh ta a tah.