1
O ru ụhụọhịn ibuzọ imẹ ifọn nke ẹtọ imẹ ahụa nke mmanaị wẹ kpụnhan ẹnyi alị Babilọnụ, Osolobuẹ nọ sị m,
2
“Nwa-ịhịan, sị Fẹro eze Ijiptu lẹ igunrun ẹ: ‘Onyẹ han kẹ yụ?’
3
Ka nyanhankwọ Asiria, hụn te wụ okẹn-osisi sida ẹgboko Lẹbanọnụ; ọ wa agalaba ndị magbu enwẹn wẹ mma, nkewụnị ẹgboko nwẹn hụdẹ igungun ẹ; ọ pụ ẹka ọhụnma-ọhụnma, suenahịn osisi ile.
4
Mirin hụ e mẹ ẹhụ a rị a mma, mirin rị imẹ-imẹ alị hụ e m'ẹ e sue; Iyi hụdẹ e huhunmẹchanrịn ukun ẹ, besọnmẹ ote wẹ d'e ruchanrịn ukun osisi ile rị ọfịa hụ.
5
Ya ọ nọ suekarị osisi ile rị ọfịa ahụn; agalaba a nọ hi ogbe; agalaba a ile nọ suepụ, makẹni mirin hụ e ru mkpọgụn a ọhụnma.
6
Nnụnụ ile a kụ ẹkụ yesọnmẹ agalaba a, anụ ile rị ọfịa a nọ igungun ẹ a mụ ụmụ; okẹn alị ile e biri igungun ẹ.
7
O te maka mma yeni usue ẹ lẹ agalaba a ndị hụ, makẹni mkpọgụn a sueru ebe mirin rị ọda-ọda.
8
Onwọnni osisi sida rị imẹ ugbo Chuku hụn kan'a, onwọnzikwọnị osisi-paịnị agalaba a han kẹ nke ẹ, onwọnni osisi-pleni agalaba a nọ kẹ nke ẹ; onwọnni osisi maru ẹ mma imẹ osisi ile rị imẹ ugbo Chuku.
9
E mẹ m'ẹ ma mma, ye ẹ agalaba bu ọda, osisi ile rị Idẹni, imẹ ugbo Chuku nọ kanman'a.
10
“ ‘Osolobuẹ Nwọn Ihiẹn Ile sị: Makẹni Ijiptu pụ-ẹka, suenahịn osisi ile, ọ nọ bọnmẹmẹ.
11
M k'e bu ẹ che ẹka onyẹ a kị alị ichẹn-ichẹn. O k'e mẹshirịrị a ikẹn, kẹ njọ a han. A chụpụọlẹ m'a.
12
Ndị alị ọzọ hụ ẹfọ kachanrịn a jọ e gbutugụọ a, la a tọ; agalaba a ndị hụ hi-ogbe a dantọsọnmẹ elu-ugu lẹ imẹ ọdanmgbugbu, dangwungwọn yesọnmẹ mgbugbu ndị rịn'a. Alị ile rị elu ụwa a ghagụọ okpuru ẹ pụha, la a tọ.
13
Nnụnụ ile e feni e berisọnmẹ elu ẹ ebẹhụ ọ dantọ, anụ ile rị ọfịa a nọdịsọnmẹ agalaba a ndị hụ.
14
“ ‘Ya wụ onwọnzini osisi ọwụlẹ rị mkpẹnrẹn mirin sikọ d'a pụzị ẹka ẹnịna, mọbụ suenahịn osisi ndị ọzọ ile ẹnịna. Ndị rị e nwọnhẹn mirin ọhụnma e suehankọzị ẹrịra. Makẹni, wẹ ile sikọ d'a nwụnhụn, lashi imẹ-imẹ alị, nọkẹ ịhịan mmaka hụn a lashi mgbugbu hụ.
15
“ ‘Lee ihiẹn Osolobuẹ Nwọn Ihiẹn Ile ku: Ụhụọhịn ahụn o shi alị mmọn, e mẹghọ m wẹ kwan a ọda-ọda: E gi m mirin rị imẹ-imẹ alị kpumẹ ẹ; e kwọndọn m Iyi ẹ, mirin ẹ ndị hụ ile ehuzini; e mẹzighọ m ẹgboko Lẹbanọnụ kwan a; osisi ile rị ọfịa e gizighọ ufiri ẹ shinwụn.
16
E gighọ m ọdịdan a mẹhunmẹ alị ndị ọzọ kẹ m wetu ẹ che imẹ ili, we ẹ cheni ndị lashigụ imẹ mgbugbu hụ. Ya kẹ obi nọ ru ndị rị imẹ-imẹ alị alị, wẹ lẹ osisi ile rị Idẹni lẹ osisi ndị kachanrịn mma lẹ ndị rịzị mma hụn rị ẹgboko Lẹbanọnụ — osisi ile mirin e ruzi ọhụnma-ọhụnma.
17
Ịya lẹ alị ndị te rị igungun ẹ, ndị ya lẹ wẹ te wị e mẹgbama wịzị lashi ili ahụn, buru ndị ọzọ wẹ gi ọpịa-agha gbu.
18
“ ‘Ijiptu! Elee osisi rị Idẹni ma mma nwọn ikpẹn kẹ yụ?! Kanị wẹ k'e wetukwọ yụ nwẹn kẹ osisi ndị hụ rị Idẹni che imẹ-imẹ alị; i k'e dinẹyeni ndị felẹni Osolobuẹ, ndị wẹ gizi ọpịa-agha gbu. “ ‘Ọhụn wụ ihiẹn k'e mẹ Fẹro lẹ igunrun ẹ ile. Ya kẹ Osolobuẹ Nwọn Ihiẹn Ile ku.’ ”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc