Ade, Asiiri rag n wẽnda wa Libã sɛɛdr tɩɩga, yẽnda rag n tara wil sẽn yaa neeba, n tar maasem wʋsgo. A rag n tãoome n yaa woko, t'a zugã rag n sãd n tat sawatã.
Koomã rag n kɩtame t'a bɩ. Ko-bundmã rag n kɩtame t'a tão n lebg woko. Ko-zoetmã rag n tigimda a sɛɛgẽ wã, n lebgd n zoet n kẽed tɩɩs a taabã fãa sẽn be weoogã pʋgã.
Yĩngr bõn-yɩgdɩ wã fãa rag n tʋɩta b tʋgd a wilẽ wã. We-rũmsã fãa rag n wat n dogda b kambã yẽnda tẽngre, la buud toay-toayã fãa neb rag n vɩ a maasmã tẽngre.
Wẽnnaam zẽedã zĩigẽ sɛɛdr tɩɩsã ba a yembr ka yɩɩd-a ye. Sɩprɛs tɩɩsã woglem dag n ka yɩɩd a wilã ye. La palatan ba a yembr vãad zɩ n yɩ bĩmm wa yẽnda ye. La Wẽnnaam zẽedã pʋgẽ, tɩɩg ba a yembr dag n ka be n wẽnd-a ye.
Bõn-kãng yĩnga, ade, maam a Zu-soab a Sẽn-Ka-Saab yetame: «Yẽnda rag n yaa woko, la yẽnda zugã woglem dag n yɩɩda tɩɩs a taabã sẽn bĩmã. Yẽnda rag n wukda a meng a woglmã yĩnga.
Sãamb sẽn yaa buud toay-toayã nin-toosã, wa n kɛ-a lame n bas-a beenẽ, la a wilã kaoome n dʋʋg tãmsã zutu, la tãn-londã fãa pʋse, t'a wil-bãoonegã kao n dʋʋg tẽngã ko-soayã fãa pʋse. Dũniyã nebã buud fãa sẽn dag n vɩ a maasmẽ wã loogame n bas-a.
Na n yɩɩ woto, tɩ tɩɩs nins sẽn be koom noorã ba a yembr da leb n tõog n bɩ n lebg wok ye. Bãmb ba a yembr zug woglem kõn leb n zʋʋg tɩɩs a taabã sẽn bĩmã ye. Tɩ-bɛdã sẽn paamd koomã ba a yembr ka na n tõog n bɩ n lebg wok ye. Bala, bãmb fãa na n kiime, b na n siga tẽngã zĩ-zulumsẽ, n naag ninsaalbã, ne sẽn sigd-b bok pʋgẽ wã.»
Ade, Zu-soab a Sẽn-Ka-Saab yetame: «Daar ning sɛɛdr tɩɩgã sẽn sig kɩɩm-kulgã, mam kɩtame tɩ bũmb fãa maan sũ-sãanga. Yẽnda yĩng kɩtame tɩ mam yẽd bog-zulumsã, la m gɩdg kʋɩlsã. Ko-kãsemsã koom yalsame. Mam kɩtame tɩ lik zĩnd Libã, wetã tɩɩs fãa kʋɩɩ yẽnda yĩnga.
Edɛn tɩɩsã sʋka, ãndã n wẽnd foom, f ziirã ne f kãosengã pʋga? B yaool n na n kɩtame tɩ fo naag Edɛn tɩɩsã fãa n sig tẽngã zĩ-zulumsẽ. Fo na n gãanda sẽn ka kẽ-b bãongã sʋka. Ad Faarõ ne a nebã baoosgo. Maam a Zu-soab a Sẽn-Ka-Saab n yeele.»