Bu-zẽn dãmba toolem sẽn yɩɩd buud a taab rẽnna, kɛɛg-a lame la b bas-a lame n looge. A wil bɛdã, a wil bõonega kaoome n dʋr tãnga zug la bãadẽ. Neb niyns sẽn da vɩ a maasmẽ wã zoe n loogame.
Maana woto tɩ tɩɩg ba a ye sẽn be koom noore, n tɩg koom, da le tõog n zẽk a wilã n ta sawato, tɩ rẽ wa ne a wilg-m-meng ye. Bala tɩɩsa wa ninsaalba, fãa gill yaa kũum n so, fãa gill na n gãanda tẽnga ne sẽn deng-b bʋg-tenga.›
Ad-m sẽn yete, maam, Naaba-Wẽnde: ‹Kʋka sẽn sig bʋg-teng daare, mam kɩtame tɩ bũmb fãa kelem a kʋʋre; m paga tẽngr kʋɩlga koom, a ka le zoet ye, ko-nif ba a ye ka le bund ye. A kʋʋra yãbr yĩnga, m pidsa Libã tãmsa ne lika, la m kʋɩɩsa weta tɩɩs fãa.
Mam sẽn kɩt tɩ tɩɩga lʋɩ, n kẽng n tɩ naag ne kɩɩmsã, bu-zẽna wʋma a lʋɩɩsã, n yɛɛse, n sɩng rigbu. Sẽn kɩdem-b sũ-noogo yaa bʋg-tẽng rãmba, yaa Eden tɩɩsã, tɩɩs sẽn tar neerem wʋsgo, tɩɩs sẽn tɩg-b koom n yɩɩd fãa, Libã tẽn-peelmẽ.
Eden tɩɩg ba a ye ka kolg foo ne neerem la bedrem ye. B na n yaool n naaga foom bʋg-tẽnga, tɩ f gãe be ne nin-dẽgdo la sẽn pa-b zabrẽ. Woto n na n yɩ Ezipt dĩma ne a neba pʋɩɩre. Yaa maam, Naaba-Wẽnd, n yete.› »