“Chyhsa sawchapawpa y, Izi bei Phiraoh châta chaphôhtuna hla phi la, a hnohta hetana heta reih teh: “Phopizy hry liata Chakeibarôhneipa ta a pachâ chi ta, Châhrasala tilaipizy liata drâkao tlao na lyu; Na chavahzy chatlaosapa ta a pasiepasâ chi ta, Na pheizy ta tizy chahriapa ta, Ama chavahzy na panôsa tyh.
Alei liata cha thy aw na ta, Lyurâhpa liata ei cha pazaw aw; Avâ pavaw zydua na chô liata pahrâsa aw ei na ta, Alei chô râhsa zydua na hnohta lôhrâtlôpa ta ei paysa aw ei.
Phopi hluhpi ta noâh ama tah awpa ta cha tao aw na ta, Ama hmiakô liata ei zaozi ei pahieh tita, Nâma vâta ama beizy chhao ama chi ngaita aw. Na pao noh liata cha, Chyhsa to ta ama hrona pahlei awpa chipa ta, Khâ amâ chalyu aw.
Pasaiphazy zaozi ta Na zawpizy papaosa aw na ta, Phopi nôchhie chaipa hmâpa ta Na zawpizy ei papaosa aw; Izi rônahna cha parao aw ei ta, A chyhsa zydua ama leidia aw.
Izi râh cha roryhrapa ta tao aw na ta, A hneirôna zydua parua khaipa ta, A chhôh liata a pahrâpa zydua ei tusao khai ti ei ta, Kei he Abeipa ei châ tahpa ama pahno aw.
“Khazy kha Izi châta ama chaphôhtuna hla awpa cha a châ. Phopi zuahzy ta chaphôhtuna hla cha sa aw ei ta, Izi nata a zawpizy châta chaphôh ama tu aw, Abeipa Zehôvâh ta a tah.”
“Chyhsa sawchapawpa y, Izi nata phopi rônahpa zuahzy cha khaohtlô liata a tla hapazy hnohta alei ry lâ pathla la, Izi zawpizy cha hetana heta chakhei teh:
Izi nata a zawpizy kyh liata, beimachâ thatlôpazy nata âmo baotuhpazy ta, ‘Zaozi ta thiepa chopawtaileipazy a zu ei ta, amâ zia thlâh haw,’ tahpa ta Athihkhih tawhta ama reih aw.
Ama thlâzy cha khaohtlô chaopahrâ liata y ta, a thlâ chheipâh liata a sahlaozy y ei ta, ama zydua ta zaozi ta thiepa ta a paopa châ ei ta, ahrohpazy râh chichhihpa ta a taotuhpazy ama châ.
“Cha liata Elâmi y ta, a thlâ chheipâh liata a sahlaozy y ei ta, ama zydua zaozi ta thiepa ta a paopazy ama châ. Chopawtaileipa ta alei ry lâ a zupazy châ ei ta, ahrohpazy râh chichhihpa ta a taotuhpazy ama châ. Khaohtlô liata a tla hapazy hnohta nozapa ta ama y.
Sawvawhpazy hry liata ano nata a sahlaozy châta rakhô taopa ei ta, a thlâzy a kiapâh liata y ta, ama zydua ta chopawtaileipa, zaozi ta thiepazy ama châ. Ahrohpazy râh chichhihpa ta a taotuhpazy châ ei ta, khaohtlô liata a tla hapazy hnohta nozapa ta y ei ta, sawvawhpazy hry liata sopa ama châ.
“Cha liata Mese Tubâ nata a zawpizy y ei ta, a thlâzy a kiapâh liata y ta, ama zydua ta chopawtaileipa, zaozi ta thiepazy châ ei ta, ahrohpazy râh chichhihpa ta a taotuhpazy ama châ.
Chopawtaileipa thatlôpazy cha, ahrohpazy râh chichhihpa ta a taotuhpazy ama châpa vâta, Mese Tubâ nata a sahlaozy cha chopawtaileipa thatlôpa a pao hapazy hnohta a zia aw veih ei. Âmo cha adyuhna chaihrai chhaota Athihkhih lâ a zupa châ ei ta, ama zaozi a hua ei ta, ama ruzy chô liata ama moleina a ypazy ama châ.
“Cha liata Edômâ y ta, a beizy nata a beimachâ zydua y ei ta, ama thatlô ngaitapa chhao ta, zaozi ta thiepazy hry liata a zawh ei ta, khaohtlô liata a zu hapa chopawtaileipazy hnohta amâ zia.
“Cha liata maw lâta abeizy y ei ta, âmo nata Sidaw mo zydua cha, ama thatlôna hmâpa ta chichhihna a patlôsatuhpazy ama châpa vâta, thiepazy hnohta nozapa ta a zupazy châ ei ta, zaozi ta thiepazy hnohta chopawtaileipa ta a zia ei ta, khaohtlô liata a tla hapazy hnohta nozapa ta ama y.
“Phiraoh ta âmo cha a hmô nahta, a chyhsa a thipazy kyh liata hnangâhpa ta y aw ta, Phiraoh nata a pheisaih zydua cha, zaozi ta thiepazy ama hmô nahta, hnangâhpa ta ama y aw, Abeipa Zehôvâh ta a tah.
Ahrohpazy râh liata chichhihna patlôsa na ta, Phiraoh nata a zawpizy cha, zaozi ta thiepa chopawtaileipazy hry liata amâ zia aw, Abeipa Zehôvâh ta a tah.”