“Nwa-ịhịan, kwanma Fẹro eze Ijiptu, sị a: Ị rị e mẹ ẹwọrọ-ẹwọrọ ebe alị ndị ọzọ rị; kanị ị rịhụ kẹ eje-anụ rị imẹ ohimin: ị hụ a zụnlihi imẹ Iyi i, e gi ụkụ e gberụrụ mirin, a rụrụ mirin Iyi hụ.
M k'e mẹ ihiẹn mẹn'i ri alị bu ọda ọnụ; ndị-nze wẹ k'e mẹhunmẹ ọda-ọda yeni egun, ogẹn m'e gi gi ẹ fe wẹ ọpịa-agha ẹnya; onyẹ-onyẹ k'a rị a ma piripiri yeni ndụn a ụhụọhịn ọdịdan ị.
M k'e gi ọpịa-agha ndị odogun-agha gbuchanrịn igwerigwe i, Ijiptu, ọpịa-agha ndị odogun-agha alị hụ ẹfọ kachanrịn a jọ. Wẹ k'e tikpọ ihiẹn ile Ijiptu gi a họnrọn, gbupụ igwerigwe ẹ ile.
“Ẹbụ w'e gi kwan ịhịan rọ. Wẹ k'a gha a bụ a; ikpoho alị ichẹn-ichẹn k'a gha a bụ a. Ijiptu lẹ igwerigwe ẹ ile kẹ wẹ k'a bụsọnmẹn'ẹ. Ya kẹ Osolobuẹ Nwọn Ihiẹn Ile ku.”
Wẹ rị nwan ili wẹ ebe kachanrịn e mi imẹ alị; ndị itu wẹ fihunmẹ wẹ imẹ ili. Wẹ ile a nwụnhụngụọ, ọpịa-agha e gbugụọzị wẹ. Ndị nwẹn te e rọn ndị rị elu-ụwa egun.
“Alị Ẹlam nkẹ hụzị ili, ya lẹ igwerigwe ndị agha a ile fihunmẹn'ẹ ebẹhụ; a nwụnchanrịngụọ wẹ. Ọpịa-agha e gbuchanrịngụọ wẹ. A lagụọ wẹ nwan ebe kachanrịn e mi imẹ alị, wẹ ile felẹni Osolobuẹ. Wẹ te e rọn ndị rị elu ụwa egun, kanị ifẹnrẹn rị nwan e mẹgbu wẹ imẹ ili lekẹ ndị ọzọ.
“Mẹshẹki lẹ Tubalụ hụzị ili, ya lẹ igwerigwe ndị agha a ile fihunmẹn'ẹ ebẹhụ. Wẹ ile wụ ndị felẹni Osolobuẹ. Ọpịa-agha e gbuchanrịngụọ wẹ. Wẹ te e rọn ndị rị elu-ụwa egun.
Elini wẹ wẹ ọhụnma kẹ ụfọdụ ndị odogun-agha ibe wẹ felẹni Osolobuẹ, hụn wẹ bu ihiẹn-ọgụn wẹ cheni wẹ imẹ ili, bu ọpịa-agha wẹ cheni wẹ gi firi isi. Ndị odogun aghanị hụzịdẹ e gi ọkpụkpụ wẹ họdụnị e bu ihiẹn wẹ mẹ, ihiẹn egun te gi tụgbu elu-ụwa ile.
Ọsụọn'a e gigụọ m Fẹro rọngbarị elu-ụwa egun, wẹ k'e bu Fẹro li imẹ igunrun ndị ahụn felẹni Osolobuẹ wẹ gi ọpịa-agha gbu, ya lẹ igwerigwe ndị agha a ile. Ya kẹ Osolobuẹ Nwọn Ihiẹn ile ku.”