Ago ngot kogeer riibindet konyonei rotwetap chok, ama kuut iryageet, ama kiteechi piik, ak konyo rotwetap chok, ak kobar chii age tugul eng' kwenunnywa; kebare amu tengektanyi, ago amage korotiikyik eutap riibindet.
Ago, ngot iteechi kiptengekyot agobo ooreennyi, si koweek kometo oranooto, ama meto ooreennyi, komeei ineendet amu tengektanyi, ago kaisaru saboondang'ung'.
Ee inyee, weeriitap chii, mwachi kootap Israel ileenji, omwae ko uu ni ole: “Kanamech pistaosyekyok ak tengekwogikyok, ak kichuchui amu chooto; kimuktoi ano anyun kesapche?”
Mwachi icheek ileenji, ko uu ye asabe, mwaei Kiptaiyat Kamuktaindet ne Toroor, koma paibaitune meetap kiptengekyot; ago abaibai ngo week kiptengekyot kometo ooreennyi, ak kosap: oweege, oweege, omete ortinwekwok che yaach; amu nee si obegu, ee kootap Israel?
Ee, inyee weeriitap chii, mwachi lagogap piiguk, ileenji, ma saru chiito ne po iman imanda eng' peetuutap pistoennyi; ago ma namei kiptengekyot tengekto eng' peetuut ne kaweek kometo tengektanyi: amaimuuchi kosap ineendet ne po iman eng' imandanyi eng' peetuut ne yaei tengekto.
Ye aleenji ne po iman, isabe iman; ngot komong' imandanyi, yeityo koyai tengekto, koma kibwaati agot agenge eng' poisyonikyik che po imanda; ago meei amu tengektanyi ne ki yai.
ngot koweekta kiptengekyot kiit ne kiname pesendo, ak koweekta kogeny kiit ne kirebei, ak kowendote ng'atuutigap saboondo, amata koyai tengekto; kosabei iman ineendet, ma meei.
Ki nyoonjo chiito age ne kiga chilil komong' eng' Jerusalem, ki nyo eng' kenyiit ne po taman ak aeng', kobooch ngap keluulech, eng' arawetap taman, eng' peetuut ne po muut ne po arawanooto, koleenjo, Kagebar nganaseet.
Ki mi anyun eutap Kamuktaindet ne Toroor paragunnyu koskoleny, kotomo koit ineendet ne kichilili; ak kiga kogoono Kamuktaindet ne Toroor ang'alaal, ye kingo itu chiichooto karon ole ki ami, ak ki ang'alaal, ki mata konamaga kuut.
Ee, weeriitap chii, mwaei icheek che menyei komoswek che karatwek eng' emetap Israel, kole, ki chiichak Abraham, ak ki punji emet: ago ki chaang' acheek; ki kigoonech emet kobunjech.
Mwachi anyun icheek ileenji, mwaei Kiptaiyat Kamuktaindet ne Toroor ko uu ni kole: Oame panyeek kobooto korotiik, ak otokyini konyekwok kanamonikwok, ak otumdoi korotiik: tos oname emet kobunjook?
Mwachi anyun pichooto ko uu ni ileenji, mwaei Kiptaiyat Kamuktaindet ne Toroor kole: Ko uu ye asabe, ki pare iman rotwetap chok icheek che mi komoswek che karatwek, ak agoochini koam tyong'ik ineendet ne mi kewanin, ak kobar koroito icheek che mi irimoik ak che mi kebenonik.
Ak kobwonjin ko uu ye pwoonei piik, ak kotep ng'wony eng' taing'ung' ko uu piikyuk, ak kogas icheek ng'aleeguk, ago ma yaei: amu iboortoi chamyet ne oo eng' ng'aleekwak, ago isubi mugulelwekwak kelunennywa.