उहाँले भन्नुभयो, “ए मरणशील मानिस, यदि मैले कुनै देशमा लडाइँ ल्याएँ भने के दशा हुन्छ? त्यो तेरा मानिसहरूलाई सुना। त्यस देशका मानिसहरूले आफ्नो बीचबाट एक जनालाई पहरेदार चुन्नेछन्।
तर यदि पहरेदारले शत्रु आएको देखेर पनि चेतावनी दिएन र शत्रु आएर कुनै एउटै मानिसलाई मार्यो भने पनि त्यो त आफ्नो पापमा मर्छ नै तर त्यसको मृत्युको निम्ति म त्यस पहरेदारलाई जिम्मेवार ठान्नेछु।
कुनै दुष्ट मानिस मर्नेछ भनेर मैले भनें तर तैँले चाहिँ त्यसलाई आफ्नो चालचलन फेरेर ज्यान बचाउन चेतावनी दिइनस् भने त्यो दुष्ट त पापमै मर्नेछ तर म त्यसको मृत्युको निम्ति तँलाई जिम्मेवार ठहराउनेछु।
परमप्रभु मसित बोल्नुभयो, “ए मरणशील मानिस, इस्राएलीहरूलाई तिनीहरू आफैंले भनेको कुरा दोहोर्याएर सुनाइदे, ‘हामी हाम्रा पाप र अपराधका बोझले थिचिएका छौं र आफ्नो सामर्थ्य हराउँदै छौं। अब हामी कसरी बाँच्ने?’
“अब ए मरणशील मानिस, इस्राएलीहरूलाई भन् कि जब एउटा असल मानिसले पाप गर्दछ, तब त्यसले पहिले गरेको सुकर्मले त्यसलाई बचाउनेछैन। यदि कुनै दुष्ट मानिसले दुष्ट्याइँ गर्न छोड्यो भने दण्ड पाउनेछैन र कुनै असल मानिसले पाप गर्न थाल्यो भने त्यसको ज्यान बाँच्नेछैन।
म कुनै असल मानिसलाई जीवन दिने प्रतिज्ञा गरूँला तर त्यसले आफ्नो अघिको सुकर्म भए पुग्छ भन्ने ठानेर पाप गर्न थाल्यो भने त्यसले गरेको एउटै पनि सुकर्म सम्झनेछैँन। त्यसको पापको कारणले त्यो मर्नेछ।
उदाहरणको लागि त्यसले बन्धकी राखेको सामान अथवा आफूले चोरेको माल फर्काइदियो र पाप त्यागेर जीवन दिने नियमहरू मान्यो भने त्यो मर्नेछैन तर त्यो निश्चय बाँच्नेछ।
त्यो आइपुगेको दिनको अघिल्लो साँझमा परमप्रभुको हात ममाथि परेको थियो। भोलिपल्ट बिहान त्यो मानिस आइपुग्नुअघि परमप्रभुले मलाई मेरो बोल्ने शक्ति फर्काइदिनुभयो।
उहाँले भन्नुभयो, “ए मरणशील मानिस, ध्वस्त भएको इस्राएल देशमा बास गरिरहेका मानिसहरूले मलाई यसो भन्दै छन्, ‘अब्राहाम एक जना मात्र थिए तर तिनलाई सारा देश दिइएको थियो। अब हामी धेरै भएका छौं, यसर्थ यो देश हाम्रो भयो।’
“म सार्वभौम परमप्रभुले जे भन्दै छु, त्यो तिनीहरूलाई सुनाइदे, तिमीहरूले आलै रगतसँगको मासु खान्छौ, मूर्तिहरू पुज्छौ र हत्या गर्छौ। तब कसरी यो देश हाम्रो हो भनी तिमीहरू ठान्दछौ?
“तिनीहरूलाई चेतावनी दिंदै यसो भन्, म सार्वभौम परमप्रभु जीवित परमेश्वर हुँ भन्ने स्वयम् साक्षी राखी भन्दछु, ती ध्वस्त भएका सहरमा बास गर्ने मानिसहरू मारिनेछन्। गाउँ-बस्तीमा बास गर्नेहरूलाई जङ्गली जनावरहरूले खानेछन्। सुरक्षित स्थान र गुफाहरूमा लुकेर बस्नेहरू रुढीले मर्नेछन्।
म त्यस देशलाई एउटा उराठलाग्दो गरी उजाड बनाउनेछु र जुन शक्तिमा तिनीहरू घमण्ड गर्थे, त्यसको अन्त हुनेछ। इस्राएलका डाँडाहरू जङ्गल बन्नेछन् र कोही मानिस त्यसका बीचबाट भएर जान सक्नेछैन।
परमप्रभुले भन्नुभयो, “ए मरणशील मानिस, तेरा मानिसहरू आपसमा सहरका पर्खालहरूछेउ वा आफ्ना घरका ढोकाहरूमा भेट हुँदा तेरो बारेमा कुरा काट्छन्। तिनीहरू एक-अर्कासित यसो भन्छन्, ‘हामी गएर परमप्रभुबाट अब कस्तो वचन आएको छ, त्यो सुनौं।’
तँ तिनीहरूको लागि प्रेमको गीत गाएर वा वीणा बजाएर मनोरञ्जन गराउने मानिसभन्दा अरू बढी केही छैनस्। तिनीहरूले तेरा कुरा त सुन्छन् तर एउटै पनि पालन गर्दैनन्।