Yi bi kpaŋsiri bɛn ka yaa la, yi bi tibiri bɛn biɛri la, yi bi niŋdi tana lɔri bɛn nya dansi la, yi bi taɣiri bɛn yirigi la na, yi mi bi bo bɛn bɔrigi la shee. Amaa yi zaŋla kiŋkansi mini ninkuunsi su ba.
M piɛri maa daa wurim kpe yɔɣu nti be zoya zaa mini daboli kam zuɣu dari ginda. M piɛri maa daa wurim kpe yɔɣu m-be dunia ŋɔ luɣilikam ni, ka so kani ŋun ni lihi bo bɛ shee.
Yawɛ ŋun nyɛ ti Duuma ŋɔ yɛliya: Mani ŋun be ŋɔ zuɣu, m piɛri leela biŋgbahira ni gbahiri shɛba, ka leei mɔɣu ni biŋkɔbiri bindirigu, piɛgul’ ni kani zuɣu. M piɛguliba maa bi bo m piɛri maa shee, amaa ka lee dihirila bɛmaŋa ka bi dihiri m piɛri maa.
Yawɛ ŋun nyɛ ti Duuma ŋɔ ni yɛli shɛm m-bɔŋɔ: M bi lan ʒe piɛguliba maa nyaaŋa. N ni deei m piɛri bɛ sani, ka bɛ ku lan dihi piɛri maa, ka piɛguliba maa ku lan dihi bɛmaŋa yaha. N ni fa m piɛri bɛ noya ni, ka bɛ ku lan nyɛ bɛ bindirigu.’ ”
Kaman piɛguliba ni vihiri bɔri bɛ piɛri shee shɛm saha shɛli bɛ yi ti wurim kpe yɔɣu la, lala ka n yɛn bo m piɛri maa shee. Sagbani mini zibisim titali dali, n ni lihi bo ba bɛ ni daa wurim kpe yɔɣu m-be luɣ’ shɛlikam zaa n-tiligi ba.
N ni yihi ba zuliya shɛb’ ni na, ka yihi ba tiŋgbɔn’ shɛŋa ni laɣim taba n-zaŋ ba tahi bɛmaŋmaŋ’ tiŋgbɔŋ ni. N ni ti dihiri ba Izraɛl zoya zuɣu mini kom ni be luɣ’ shɛŋa ni ni niriba ni be luɣ’ shɛŋa zaa ni tiŋgbɔŋ maa ni.
N ni ti zaŋ bindiri’ viɛla dihiri ba. Izraɛl zoya zuɣu nti yɛn nyɛ bɛ mɔri ŋubbu shee. Nimaani ka bɛ ni ti do momah’ viɛla tiŋgban’ ni, ka bɛ ti ŋubiri mo’ viɛla Izraɛl zoya zuɣu.
N ni bo bɛn bɔrigi la shee, ka taɣi bɛn yirigi la labisina, ka zaŋ tana lo bɛn nya dansi la, ka kpaŋsi bɛn gbarigi la. Amaa bɛn bara, ka mali yaa la, n ni ku ba. N ni zaŋ din tuhi dihi ba.
Amaa yinim’ bɛn nyɛ m piɛri ŋɔ, Yawɛ ŋun nyɛ ti Duuma ŋɔ ni yɛli shɛm m-bɔŋɔ: N ni ti kari saria wuhi din be piɛɣu min’ o kpee sunsuuni, ka wuhi din be piɛlahi mini buhi sunsuuni.
Yi ni ŋubiri mo’ viɛla ŋɔ di bi saɣi? Ka wula ka yi lan nɔri mo’ shɛŋa din kpalim ŋɔ sɔŋdi tiŋa? Yi yi nyu ko’ viɛlli, di lan kpami ni yi zaŋ yi naba saɣim ko’ shɛli din kpalim?
N ni ti lo ba suhudoo alikauli, ka kari mɔɣu ni biŋkɔb’ biɛri zaa tiŋgbɔŋ maa ni din ni chɛ ka bɛ ti be mɔɣu maa ni, ka gbɛri nimaani ka barina shɛli kani.
Bɛ puri ni tihi ni ti wali wala, ka tiŋgbani ni bindira niŋ. Bɛ ni ti be bɛ tiŋgbɔŋ maa ni ni alaafee. N yi kabisi dapuhi din pa bɛ nyiŋgoya zuɣu la, ka fa ba ninvuɣ’ shɛb’ bɛn zaŋ ba leei daba nuu ni bahi, bɛ ni baŋ ni mani n-nyɛ Yawɛ.
Zuliya shɛb’ ku lan kana ti ŋme ba tɔbu ka di bɛ nɛma, ka tiŋgbɔŋ maa ni biŋkɔbiri ku lan gbahi ba. Bɛ ni ti beni ni alaafee ka so ku lan kpɛhi ba dabiɛm.