On cemmbiɗinaay tampuɗi, on kurgaay nyawɗi, on kaɓɓaay kosɗe maaji gewɗe, on lortinaay caŋkitiiɗi, on ɗaɓɓitaay majjuɗi boo. Ammaa on toonyi ɗi bee caatal.
Fakat bana mi geeto, min Allah Jawmiraawo, mi ɗon wi'a: Kuuje ladde njaɓti baali am, nyaami ɗi ngam gaynaako walaa. Waynaaɓe am kakkilanaay baali am, nduraay ɗi. Ɓe nduri ko'e maɓɓe tan.
Min Allah Jawmiraawo mbi'anmi on: Mi honan on! Mi hoocan baali am diga juuɗe mon. On meetataa durugo ɗi, ngam taa on ndura ko'e mon. Mi hisnan baali am diga kunnduɗe mon, mi accataa on on nyaama ɗi.”
bana gaynaako hakkiliranta baali mum caŋkitinooɗi, to o ɗon dari caka maaji. Mi wartiran ɗi diga nokkuuje ɗe ɗi caŋkiti fuu nder nyalaade duule nyiɓɓuɗe.
Mi wurtinan ɗi lesɗe ummaatooje goɗɗe, mi mooɓta ɗi, mi hoora ɗi haa lesdi maaji. Mi duran ɗi dow kooseeje Isra'iila, non boo nder waadiiji e koo toy yimɓe njooɗoto nder lesdi fuu.
Mi ɗaɓɓitan majjuɗi, mi wartiran caŋkitinooɗi, gewaaɗi kosɗe boo, mi haɓɓan kosɗe maaji, mi semmbiɗinan tampuɗi, ammaa mi halkan payɗi e marɗi semmbe. Mi duran tokkere am fodde kiita ngooŋɗuka.
Leɗɗe e gese ndiman ɓiɓɓe, koo moy jooɗoto jam nder lesdi mum. Mi rimɗinan yimɓe am diga juuɗe ɓilluɓe ɓe, mi yewan kaɓɓirɗe maɓɓe. Nden kam ɓe paaman min woni Jawmiraawo.