Chabij che: ‘Are' wa' cubij ri Ajawaxel: Ri in quink'alajisaj wib chi nu banom nu c'ulel chawe, juyub re Seir, quenc'äjisaj c'u a wäch tolonic catinya' canok xukuje' pa etzeletajic.
Are c'u ri in, quinban ri chi'nic ri kas cäban na rumal ri nu c'aslemal chi cätinjach na pa ri cämical, catterenex c'u rumal ri cämical. At ajchak'mac re cämical, are c'u ri cämical catuterenej na.
Quinban c'u na chi ri e a juyub xukuje' tak ri e u wi' tak ri a juyub, ri e a beya' xukuje' tak ri e a nima', quenoj can chque ri cäminakib ri quecäm pa ri ch'o'j.
Catinjalwächij can pa jun chaki'j uwo sak re chbe k'ij sak, man c'o ta c'u jachin jun cajeki' ta chi na chquipam tak ri a tinimit. C'äte ri' qui ch'ob na ri ix chi in ri' ri Ajawaxel.
Are' c'u ri in, ri Ajawaxel, quinban ri chi'nic ri kas cäban na rumal ri nu c'aslemal chi je quenbana' na chawe ruc' ri kas oyowal, ri quiäk rayinic xukuje' etzelen wächaj ri xacoj che ri Israel. Aretak chenc'äjisaj a wäch, ri e are' caquich'ob chi na nu wäch.
C'äte ri' cawil na chi in, ri Ajawaxel, xintatabej conojel ri yok'onic ri xebaq'uiak paquiwi' tak ri e u juyub ri Israel. Ri at xabij: ¡E jun chaki'j uwo sak; camic cujcuinic quekabik'o!
Ri at xatquicotic aretak xsachisax u wäch ri ulew ri xuc'am ri Israel che rechbal, je c'u cac'ulmaj na at xukuje': catux can jun chaki'j uwo sak, juyub Seir, ulew re Edom. C'äte ri' quich'ob na chi in ri' ri Ajawaxel.’ ”