eyata gblɔ nya ɖi gblɔ bena: Ale Aƒetɔ Yehowa gblɔ esi: Esi wogblẽ mi, eye wole tsyo dam ɖe mia ŋu le goawo katã me, ne miazu dukɔ susɔeawo tɔ, eye amewo le nu ƒom le mia ŋu hele aɖeɖi ƒom mi la,
Aƒetɔ Yehowa be: Matsɔ nye ŋuʋaʋã ƒe dzobibi aƒo nu kple dukɔwo ƒe susɔea kpakple Edom blibo la, amesiwo tsɔ nye anyigba wɔ wo ɖokui tɔe, woƒe dzi le nu kom nyrenyrenyre, eye wole alɔme ɖem, le esi wotsɔe na wòzu nuhaha la ta.
Eyata gblɔ nya ɖi ɖe Israel-nyigba ŋu, eye nagblɔ ma towo kple togbɛwo, balimewo kple gbadzaƒewo bena: Ale Aƒetɔ Yehowa gblɔ esi: Kpɔ ɖa, meƒo nu le nye ŋuʋaʋã kple nye dziku me bena: Esi mietsɔ dukɔwo ƒe ŋukpedoame la,
Mana amegbetɔwo kple lãwo nasɔ gbɔ ɖe mia dzi, woakeke ta, eye wòadzi; mana ame nanɔ mia dzi abe tsã ene, eye mawɔ nyui na mi wu tsã, ne miadze sii be, nyee nye Yehowa.
Eye esi wova dukɔwo dome la, wodo gu nye ŋkɔ kɔkɔe la, le afisiafi, si woyi, ale be wole gbɔgblɔm le wo ŋu bena: „Yehowa ƒe dukɔe nye esia, eye eƒe anyigba dzi woɖu tso“
Eyata gblɔ na Israel ƒe aƒe la bena: Ale Aƒetɔ Yehowa gblɔ esi: Israel ƒe aƒe, menye mia ta mele ewɔm ɖo o, ke boŋ nye ŋkɔ kɔkɔe, si mieɖo gui le dukɔwo dome, afisi míeyi la lae.
Eye makɔ nye ŋkɔ gã, si wodo gui le dukɔwo dome, esi miawo miedo gui le wo dome la ŋuti, eye dukɔwo adze sii bena, nyee nye Yehowa, ne mekɔ ɖokuinye ŋu le wo ŋku me ɖe mia ŋuti, Aƒetɔ Yehowa ye gblɔe.
eye woagblɔ bena: „Anyigba, si nye gbegbe tsã la, zu abe Eden-bɔ ene, ame le ɖu, siwo nye aƒedo kple gbegbe, eye wogbã wo ƒu anyi tsã la me, eye wozu du sesẽwo.“
Eye dukɔ mamlea, siwo ƒo xlã mi godoo la, adze sii bena, nye Yehowa ye tso du, siwo wogbã ƒu anyi, eye mede anyigba, si nye gbegbe la; nye Yehowa ye ƒo nu, eye mawo edzi hã.