Ngam maajum waɗ annabaaku, wi': Ndaa nii Allah Jawmiraawo wi'i: Ɓe ngiɗno nattingo on e halkugo on koo toy fuu, ɓe ngiɗno on laato maraaɓe ummaatooje goɗɗe. Yimɓe ɓe'e njanci on, kuɗi on.
Ngam maajum, onon kooseeje Isra'iila, nane wolde Allah Jawmiraawo. Ndaa nii Allah Jawmiraawo wolwi dow kooseeje e towndiije e gaaruuji e waadiiji e nokkuuje bilaaɗe e berniiji accaaɗi fuu, haa ummaatooje taariiɗe njaɓti ɗum kuuje, njanci ɗum.
Ngam maajum waɗ annabaaku dow lesdi Isra'iila. Yeccu kooseeje e towndiije e maahoy e waadiiji ko min Allah Jawmiraawo mbi'anmi bee tikkere kaajal am ngam daliila jancooje ummaatooje dow lesdi ndi'i.
Mi ɗuɗɗinanan on yimɓe e dabbaaji, ɗum ɗuuɗan ko ɓuri naane, ɗum heɓan ɓikkoy ɗuuɗkoy. Mi waɗan ɓe njooɗo dow mooɗon bana ɓe njooɗorino naane, mi woonanan on ko ɓuri naane boo. Nden kam on paaman min woni Jawmiraawo.
Ngam maajum yeccu yimɓe Isra'iila ko min Allah Jawmiraawo mbi'anmi ɓe: Ko mi tammi waɗugo, mi waɗataa ɗum ngam mooɗon, ammaa ngam daliila innde am seniinde nde lasbinɗon caka ummaatooje fuu.
To mi waŋginani ummaatooje no innde am mawnde senori, nde lasbinɗon caka maaje, ɗe paaman min woni Jawmiraawo. Min Allah Jawmiraawo wi'i ɗum. Mi huuwtiniran on ngam waŋginango ɗe senaare innde am.
Ndaa nii Allah Jawmiraawo wi'i: “Nyalaade nde mi laɓɓini on diga aybeeji mon fuu, mi accan on on njooɗo nder berniiji mon fahin, on nyiɓto bille maaji.
Nden ummaatooje taariiɗe on luttuɗe fuu paaman min Jawmiraawo nyiɓti berniiji bilaaɗi, min jubi gese laatinooɗe ladde. Min Jawmiraawo wi'i ɗum, mi waɗan ɗum boo.”