Kuom mano, un gode mag Israel, winjuru gima an Ruoth Nyasaye awacho ni gode madongo gi matindo kendo ni aore kod holni, kaachiel gi kuonde mane owe kokethore kod mier mane odong’ gundni, mane ogendini mokiewo gi jo-Israel oyako kendo onyiero.
“Ruoth Nyasaye ohero jo-Israel ahinya, omiyo asewuoyo ka an gi mirima mager kuom ogendini mokiewo kodgi, to moloyo asewuoyo kuom jo-Edom. Ne gimako piny ka gin gi siboi kod sunga marach e chunygi, mi gikawo legene.
“Kuom mano, kor wach ni piny Israel, kinyiso gode madongo gi matindo kod aore gi holni ni an Ruoth Nyasaye aherogi, omiyo asewuoyo gi mirima mager, nikech ogendini mamoko duto oseyanyogi marach.
Anami ji kaachiel gi jamni medre, kendo unubed mang’eny kaka ne un chon, mi ubed gi nyithindo mathoth. Unudag kuno kaka ne udak chon, mi ami udhi nyime maber moloyo. Eka unung’e ni an e Ruoth Nyasaye.
To kamoro amora mane gidhiye, ne gikeloe wichkuot ni nyinga maler, nikech ji ne wacho niya, ‘Jogi gin jo-Ruoth Nyasaye, to ne oriembgi e piny mane omiyogi.’
“Koro nyis jo-Israel ni an Ruoth Nyasaye awachonigi kama: Gima abiro timo ok abi timo nikech un, jo-Israel, to abiro timo mana nikech nyinga maler, ma usekelone wichkuot kamoro amora ma usedhiye e kind ogendini duto.
Ka anyiso ogendini kaka nyinga maduong’ mane ukelone wichkuot, en nying maler, to eka gining’e ni an e Ruoth Nyasaye. An Ruoth Nyasaye ema awacho kamano. Gima abiro timonu ema nonyis ogendini ni an Ng’ama Ler.
To un jo-Israel, adwaro ni mondo ung’e ni ok natim gigo duto nikech un, to adwaro ni mondo une wichkuot kuom gik ma utimo. An Ruoth Nyasaye ema awacho kamano.
mi ji duto nowach niya, “Piny ma yande thimni tinde chalo gi puoth Eden, kendo mier mane omukore mi oyaki kendo owe gundni, tinde ochiel motegno, kendo ji odakie.”
“An Ruoth Nyasaye amedo wacho niya, ‘Abiro timo gik moko madongo kata moloyo mago. Abiroo yie jo-Israel okwaya mondo akonygi, mi ami ginya mathoth mana ka kueth rombe.