|
| 1 |
|
| Siōng Chú ê khùi-la̍t chhiong-móa góa; I ê sîn chhōa góa khì chi̍t ê soaⁿ-kok; hit-ê soaⁿ-kok sì-kòe lóng sī kut-thâu. |
|
| 2 |
|
| I chhōa góa kiâⁿ-thàu kui-ê soaⁿ-kok. Góa khòaⁿ-kìⁿ kut-thâu piàn-móa soaⁿ-kok; hiah-ê kut-thâu lóng ta-khok-khok. |
|
| 3 |
|
| I tùi góa kóng, “Jîn-chú ah, chiah-ê kut-thâu kiám ōe koh oa̍h--khí-lâi?” Góa ìn kóng, “Chì-koân ê Siōng Chú, che chí-ū lí chai!” |
|
| 4 |
|
| I koh tùi góa kóng, “Lí tio̍h tùi chiah-ê kut-thâu thoân-ta̍t góa ê sìn-sit, kóng, ‘Ko͘-tâ ê kut-thâu, tio̍h thiaⁿ Siōng Chú ê ōe. |
|
| 5 |
|
| Chì-koân ê Siōng Chú tùi lín kóng: Góa beh pûn-khùi ji̍p-khì lín lāi-bīn, hō͘ lín oa̍h--khí-lâi. |
|
| 6 |
|
| Góa beh hō͘ lín siⁿ kun siⁿ bah, koh ēng phê kā lín pau--khí-lâi. Góa beh pûn-khùi ji̍p lín lāi-bīn, hō͘ lín oa̍h--khí-lâi. Án-ni, lín chiū chai góa sī Siōng Chú.’” |
|
| 7 |
|
| Góa chiū chun-chiàu Siōng Chú ê bēng-lēng thoân-ta̍t I ê sìn-sit. Teh kóng ê sî, hut-jiân góa thiaⁿ-kìⁿ khi-khi-kho̍k-kho̍k ê siaⁿ, kut-thâu kap kut-thâu liân-chiap--khí-lâi. |
|
| 8 |
|
| Góa chù-ì khòaⁿ, kut-thâu khai-sí siⁿ kun siⁿ bah, koh ū phê kā in pau--khí-lâi, m̄-kú bô oa̍h-khì. |
|
| 9 |
|
| Siōng Chú tùi góa kóng, “Jîn-chú ah, lí tio̍h tùi hong thoân-ta̍t góa ê sìn-sit, kóng, ‘Chì-koân ê Siōng Chú án-ni kóng: Hong ah, tio̍h tùi sì-bīn chhe--lâi, chhe ji̍p-khì chiah-ê hō͘ lâng thâi-sí ê lâng lāi-bīn, hō͘ in oa̍h--khí-lâi.’” |
|
| 10 |
|
| Góa chiū chun-chiàu Siōng Chú ê bēng-lēng thoân-ta̍t I ê sìn-sit; khùi chiū chìn-ji̍p kut-thâu lāi-bīn, in chiū oa̍h--khí-lâi, khiā--teh. In ê sò͘-bo̍k chhin-chhiūⁿ kun-tūi hiah-ni̍h chōe. |
|
| 11 |
|
| Siōng Chú tùi góa kóng, “Jîn-chú ah, chiah-ê kut-thâu chiū-sī Í-sek-lia̍t -lâng. In kóng, ‘Goán ê kut-thâu ta-khok-khok, bô ǹg-bāng bô chiân-tô͘.’ |
|
| 12 |
|
| Só͘-í, lí tio̍h tùi góa ê chú-bîn Í-sek-lia̍t thoân-ta̍t góa ê sìn-sit, kóng, ‘Chì-koân ê Siōng Chú án-ni kóng: Góa ê chú-bîn ah, góa beh phah-khui lín ê hûn-bōng, hō͘ lín tùi bōng chhut--lâi, chhōa lín tńg-khì Í-sek-lia̍t -tōe. |
|
| 13 |
|
| Góa phah-khui lín ê hûn-bōng, chhōa lín chhut--lâi liáu-āu, lín chiū chai góa sī Siōng Chú. |
|
| 14 |
|
| Góa beh chiong góa ê khùi pûn-ji̍p lín lāi-bīn, hō͘ lín oa̍h--khí-lâi. Góa beh kā lín an-tì tī lín ka-kī ê thó͘-tōe. Án-ni, lín chiū chai góa sī Siōng Chú. Góa kóng chhut-chhùi, it-tēng si̍t-hêng.’ Siōng Chú án-ni soan-pò͘.” |
|
| 15 |
|
| Siōng Chú tùi góa kóng, |
|
| 16 |
|
| “Jîn-chú ah, lí khì the̍h chi̍t tè chhâ-pang lâi, tī téng-bīn siá ‘ Iû-tāi ông-kok kap i ê jîn-bîn’; koh khì the̍h lēng-gōa chi̍t tè chhâ-pang, tī téng-bīn siá ‘ Í-sek-lia̍t ông-kok kap i ê jîn-bîn’. |
|
| 17 |
|
| Jiân-āu, chiong chit nn̄g tè chhâ-pang liân chòe-hé, hō͘ in tī lí ê chhiú-tiong chiâⁿ-chòe chi̍t tè. |
|
| 18 |
|
| Lí ê tông-pau nā mn̄g lí, ‘Lí kiám bô beh kā goán kóng che sī sím-mi̍h ì-sù?’ |
|
| 19 |
|
| Lí tio̍h kā in kóng, ‘Chì-koân ê Siōng Chú án-ni kóng: Góa beh kā tāi-piáu Í-sek-lia̍t hit-tè chhâ-pang liân tī tāi-piáu Iû-tāi hit-tè, hō͘ nn̄g tè tī góa ê chhiú-tiong chiâⁿ-chòe chi̍t tè.’ |
|
| 20 |
|
| “Lí tio̍h chiong lí ū siá-jī hit nn̄g tè chhâ-pang the̍h tī chhiú--ni̍h hō͘ in khòaⁿ. |
|
| 21 |
|
| Jiân-āu, lí tio̍h kā in kóng, ‘Chì-koân ê Siōng Chú án-ni kóng: Góa beh chiong góa ê chú-bîn Í-sek-lia̍t tùi in siū hòng-tio̍k ê lia̍t-kok tiong tòa--chhut-lâi; góa beh tùi sè-kài ta̍k kak-lo̍h kā in chū-chi̍p--khí-lâi, chhōa in tò-lâi ka-kī ê thó͘-tōe. |
|
| 22 |
|
| Góa beh hō͘ in tī Í-sek-lia̍t ê chèng-soaⁿ, chit-tè thó͘-tōe, chiâⁿ-chòe chi̍t ê kok-ka, chí-ū chi̍t ê ông thóng-tī; in bô koh sī nn̄g kok, bōe koh hun-lia̍t chòe nn̄g kok. |
|
| 23 |
|
| In bōe koh in-ūi pài ngó͘-siōng kap thang iàm-ò͘ⁿ ê mi̍h, í-ki̍p kî-tha ê chōe-kò phah lâ-sâm ka-kī. Góa beh kiù in thoat-lī pōe-ge̍k ê seng-oa̍h, kā in sóe chheng-khì. Án-ni, in beh chòe góa ê chú-bîn, góa beh chòe in ê Siōng-tè. |
|
| 24 |
|
| “‘Góa ê po̍k-jîn Tāi-pi̍t beh choh-ông thóng-tī in; in beh kui-sio̍k chi̍t ê bo̍k-chiá. In beh ho̍k-chiông góa ê bēng-lēng, chun-siú góa ê kui-lē. |
|
| 25 |
|
| In beh tòa tī góa sù hō͘ góa ê po̍k-jîn Ngá-kok hit-tè thó͘-tōe, chiū-sī in ê chó͘-sian tòa--kè ê hit-tè tōe. In kap in ê kiáⁿ-kiáⁿ-sun-sun beh éng-oán tòa tī hia. Góa ê po̍k-jîn Tāi-pi̍t beh choh-ông thóng-tī in, ti̍t-kàu éng-oán. |
|
| 26 |
|
| Góa beh kap in li̍p pêng-an ê iok; chit-ê iok beh chiâⁿ-chòe éng-oán ê iok. Góa beh hō͘ in an-ku-lo̍k-gia̍p, jîn-kháu ke-thiⁿ, koh siat-li̍p góa ê sèng-tiān tī in tiong-kan, ti̍t-kàu éng-oán. |
|
| 27 |
|
| Góa beh khiā-khí tī in tiong-kan. Góa beh chòe in ê Siōng-tè, in beh chòe góa ê chú-bîn. |
|
| 28 |
|
| Góa beh hō͘ góa ê sèng-tiān éng-oán tiàm tī in tiong-kan, lia̍t-kok chiū chai, sī góa Siōng Chú kā Í-sek-lia̍t hun-pia̍t-choh-sèng.’” |
|
|
|
|