Ɣän bä räl kɛnɛ ri̱ŋ la̱th puɔ̱ɔ̱nydun, kä bä yɛ cu kum kɛ guɔ̱p. Kä bä yiëë cu la̱th rɛydun, kä bia cu tëk. Kä bi yɛn ɛ cu ŋa̱c ɛn ɣöö ɛ ɣän Kuoth Nhial.”
Inɔ, cua̱ ruac go̱o̱kä lat ce̱tnikɛ mëë ca la̱r ɣä. Kä min cä ruac go̱o̱kä lat, nikɛ pɛ̈th cu rɔal päl mi te gak gak. Kä cu cɔ̱w rɔ̱ mat kɛɛl, cu cɔa̱a̱ ɔ wä cɔ̱ɔ̱kädɛ.
Kä cu Kuoth Nhial ruac kɛ ɣä wëë i̱, “Lätni yiëë ruac go̱o̱kä, lat ruac go̱o̱kä gat ran, läri jɛ yiëë ɛn ɣöö mɛmɛ lar ɛ Kuäär ni Kuoth Nhial wëë i̱, ‘Lö, yiëë, ku mal ben pekni ɣɔaa da̱ŋ ŋuaan, ŋo̱kni nɛy ti ca näk ti yiëë, kɛ ɣöö dee kɛ tëk.’ ”
Kä cuɛ ɣä jiök i̱, “Gat ran, cɔ̱w ti̱ti̱ kɛ ji̱ thuɔk duël I-thɛ-rɛl diaal. Kä cukɛ wee i̱, ‘Kɛn cɔ̱w kɔ diaal cikɛ kööt, kä ci ŋa̱thda kɛ ti bi ben thil. Kɔn cakɔ tɛ̈m raar a thil diɛw.’
Ɣän bä yiëëdä la̱th rɛydun, kä bia cu tëk, kä bä yɛ cu la̱th ni muundun pa̱ny. Kä bi yɛn ɛ cu ŋa̱c ɛn ɣöö ɛ ɣän Kuoth Nhial ruac ɔ, kä bä jɛ la̱t,’ ” ruac ni ɣän Kuoth Nhial.
läri jɛ kɛ ɛn ɣöö ci Kuäär ni Kuoth Nhial mɛmɛ lar wëë i̱, ‘Ɣän cä thia̱k kɛ nöŋ kɛɛtdä min lot ni ji̱ I-thɛ-rɛl, kä bä jɛ mat kɛɛl kɛ kɛɛt in lot ni ji̱ Juda. Ɣän bäkɛ mat ala kɛɛt kɛl, kɛ ɣöö bikɛ la kɛɛt kɛl tetädä.
Kä bäkɛ cu jakä do̱r kɛl ɛn muun, wuɔ̱thni päämni I-thɛ-rɛl. Kä bi kuäär kɛl te wi̱i̱diɛn ala kuääriɛn kɛn diaal. /Ca rɔ̱ bi̱lɛ nyɔk kɛ mi bikɛ la döör da̱ŋ rɛw, kä /ca rɔ̱ bilɛ nyɔk kɛ dääk kä kuääri da̱ŋ rɛw.
Kä bikɛ cieŋ muun ëë cä ka̱m ja̱ŋdä ni Je-kɔb, min cieŋ gua̱ndɔɔŋnikun thi̱n. Kɛn kɛ gaatkiɛn kɛ gaat gankiɛn bikɛ cieŋ ɛn wani amäni cäŋ kɛl. Kä bi ja̱ŋdä ni Dee-bid a rueecdiɛn amäni cäŋ kɛl.