|
| 1 |
|
| Nyakubaho akantaho omukono gwe yanshohoza, Mutima we yanshuumya omu ruhanga rwijwire amagufa goomire. |
|
| 2 |
|
| Yaanyehinguririza oruhanga orwabaire rurimu amagufa maingi munonga goomire. |
|
| 3 |
|
| Bwanyima yangira ati: Iwe muntu 'we, ebyo aga magufa gakaabaasa kugira amagara? Naanye naamugarukamu nti: Mukama Ruhanga, niiwe orikukimanya. |
|
| 4 |
|
| Kandi agaruka, angira ati: Hanuurira aga magufa, ogagire oti: Imwe magufa goomire 'mwe, nimuhurire ekigambo kya Nyakubaho. |
|
| 5 |
|
| Oku nikwo Mukama Ruhanga arikugambira amagufa naagira ati: Reeba, naaza kubatamu omwitsyo mugire amagara. |
|
| 6 |
|
| Naaza kubataho emitsi, mbagarureho enyama, mbashwekyeho oruhu, mbatemu omwitsyo, mugire amagara, haza mumanye ku ndi Nyakubaho. |
|
| 7 |
|
| Ntyo naahanuura nk'oku yandagiire; kandi ku naabaire ninkihanuura, naahurira okukomangana kw'ago magufa: gaateerana, eigufa na rigyenzi ryaryo. |
|
| 8 |
|
| Ku naagiire kugira nti: naareeba gaagiibwaho emitsi n'enyama, byashwekwa oruhu, kwonka bitaabamu mwitsyo. |
|
| 9 |
|
| Bwanyima yangira ati: Iwe muntu 'we, hanuurira omwitsyo, ogugire oti: Oku nikwo Mukama Ruhanga arikugamba naagira ati: Iwe mwitsyo 'we, ruga embaju ina ei emiyaga ereetwa, ohuuhe egi mitumbi egire amagara. |
|
| 10 |
|
| Ntyo naahanuura nk'oku yandagiire, omwitsyo gwagizamu yaagira amagara; yaayemerera eri ekimbuuro kihango munonga. |
|
| 11 |
|
| Bwanyima yangira ati: Iwe muntu 'we, aga magufa n'ab'eihanga rya Isiraeli. Reeba, nibagira bati: Twomire titukiine matsiko; tubeereire kimwe encuubwa. |
|
| 12 |
|
| N'ahabw'ekyo obahanuurire noobagira oti: Oku nikwo Mukama Ruhanga arikugamba naagira ati: Imwe bantu bangye 'mwe, reeba ndyaigura ebituuro byanyu, mbaihemu, mbagarure omu nsi ya Isiraeli. |
|
| 13 |
|
| Bantu bangye 'mwe, ku ndiheza kwigura ebituuro byanyu naabaihamu, muryamanya ku ndi Nyakubaho. |
|
| 14 |
|
| Kandi ndyabatamu Mutima wangye, mube abahuriire, mbate omu nsi yaanyu y'obuzaarwa, haza obwo nibwo murimanya ku nyowe Nyakubaho niinye naakigambire, kandi nkakikora; nikwo Nyakubaho arikugira. |
|
| 15 |
|
| Kandi Nyakubaho akagaruka yangira ati: |
|
| 16 |
|
| Iwe muntu 'we, kwata enkoni ogihandiikyeho oti: Yuda n'Abaisiraeli bagyenzi be; bwanyima okwate endiijo nkoni, ogihandiikyeho oti: Yosefu (enkoni ya Efuraimu), n'Abaisiraeli bagyenzi be. |
|
| 17 |
|
| Bwanyima oziteerane, zibe enkoni emwe zikuri omu ngaro. |
|
| 18 |
|
| Kandi abantu ku baraakubuuze amakuru gaabyo, |
|
| 19 |
|
| obagire oti: Oku nikwo Mukama Ruhanga arikugamba naagira ati: Reeba, naaza kutwara enkoni ya Yosefu (eri omu ngaro za Efuraimu) n'enganda z'Abaisiraeli bagyenzi be, ngiteerane n'eya Yuda, mbahindure enkoni emwe, babe bamwe bandi omu ngaro. |
|
| 20 |
|
| Ezo nkoni zi orikuhandiikaho, ku ziraabe zikuri omu ngaro nibakureeba, |
|
| 21 |
|
| obagire oti: Oku nikwo Mukama Ruhanga arikugamba naagira ati: Reeba, ndyaiha Abaisiraeli omu mahanga agu baagiiremu, mbataaruure nimbaiha embaju zoona, mbareete omu nsi yaabo y'obuzaarwa. |
|
| 22 |
|
| Ndyabahindura eihanga rimwe omu nsi y'enshozi za Isiraeli; bategyekwe omugabe omwe, barekye kuba amahanga, nobu kwakuba okucuubwamu obugabe bubiri. |
|
| 23 |
|
| Tibarigaruka kwehagaza n'emandwa zaabo, nobu kwakuba okukora ebihagaro nari okucumura. Ndyabajuna, barekye kugaruka kugwa omu bibi ebi baabaire bakozire, mbashemeze, reero babe abantu bangye, naanye mbe Ruhanga waabo. |
|
| 24 |
|
| Omwiru wangye Daudi aryaba omugabe waabo, boona bagire omuriisa omwe, bakuratire ebiragiro byangye, bate omutima aha bi naataireho, kandi babikore. |
|
| 25 |
|
| Baryatuura omu nsi ei naahaire omwiru wangye Yakobo, ei baishebo baabaire batwiremu; okwo niyo bariguma ebiro byona bo n'abaana baabo na baijukuru baabo. Kandi omwiru wangye Daudi niwe ariba omugabe waabo ebiro byona. |
|
| 26 |
|
| Ndyaragaana nabo endagaano y'obusingye, ebe endagaano y'ebiro byona. Ndyabaha omugisha, mbakanyise, nte omwanya gwangye Ogurikwera ahagati yaabo, gube ogw'obutwire bwona, |
|
| 27 |
|
| babe abantu bangye, naanye mbe Ruhanga waabo. |
|
| 28 |
|
| Reero ku ndita Nyaruju yangye ahagati yaabo, yaagumayo ebiro byona, amahanga nibwo garimanya ku nyowe Nyakubaho niinye naatoraine Abaisiraeli kuba abantu bangye ahabwangye. |
|
|
|
|