Ne bena i yɛlɛma ka nigɛ don i daa la, k'i wajibiya ka bɔ i ka yɔrɔ la, e n'i ka kɛlɛdenw bɛɛ lajɛnnin: soow ni sotigiw, minw labɛnnin be ka ɲa kɛlɛ kama, ani jamaba, nigɛkunbɛnnanbabatigiw ni misɛnmantigiw, u bɛɛ be se murujankɛlɛ la kosɔbɛ.
Waatijan nata la, saan caaman tɛmɛnin kɔ, u bena i wele ka taga kɛlɛ la ka Isirayɛli jamana kɛlɛ. A mɔgɔ minw tora kɛlɛ tɛmɛnin kɔ, olu siginin tun be jamana minw na, u bena bɔ yen ka na lajɛn Isirayɛli kuluw kan, o yɔrɔ minw lakolon tun tora kabini waatijan. O y'a sɔrɔ, kabini u bɔra siya wɛrɛw cɛma, u bena to hɛrɛ la o yɔrɔ la.
I ben'a fɔ ko laminikogow te jamana min duguw la, ko i be taga o kama. Ko i bena taga bari mɔgɔw la minw siginin be hɛrɛ la u ka duguw kɔnɔ, laminikogo te minw na, koon n'a sɔgɔnan te minw na.
Dugu minw tun cira ka kɔrɔ, ni mɔgɔw segira ka bɔ siya wɛrɛw cɛma ka na sigi u kɔnɔ, i ko i bena taga olu kɛlɛ k'u ka fɛɛnw cɛ, ko i bolo bena se u ma. Begɛn ni nafolo b'u fɛ, u siginin be jamanaw cɛmancɛ la.
Sabakaw ni Dedankaw, ani Tarisisi jagokɛlaw n'a dafɛdugu mɔgɔw bena i ɲininga ko: ‹Yala i nana janko k'u ka nafolo cɛ le wa?› Ko: ‹Yala e y'i ka kɛlɛdenw lajɛn janko ka dugu kɔnɔ fɛɛnw cɛ le wa, ka taga n'u ka warigwɛ n'u ka sanu ye, k'u ka begɛnw n'u ka nafolo cɛ ka taga n'a ye, ka taga ni nafoloba ye wa?›
E ni kɛlɛden caaman ka bɔ siya caaman na, aw bɛɛ bena yɛlɛ soow kan ka kɛ kɛlɛbolo barikaman ye, aw bena bɔ fɔɔ yɔrɔjan, kɔgɔdugu ɲafan fɛ i ka jamana kɔnɔ ka na.
Gɔgi, i bena na ne ka jama Isirayɛli kɛlɛ i n'a fɔ sankaba be dugukolo datugu cogo min na. O bena kɛ waatijan nata la. Ne bena i ci ka taga ne ka jamana kɛlɛ janko siyaw ka ne lɔn ni ne tɛmɛna i fɛ k'a yira ko ne ye senuman ye tuma min na.› »
Matigi, Masaba ko: «Ne ka baarakɛlaw Isirayɛli kiraw tun kumana mɔgɔ min koo la ne barika la kabini tumajan, ele lo. U y'a fɔ saan caaman kɔnɔ ko ne bena i ci ka taga Isirayɛlidenw kɛlɛ.
Jigɛw ni kɔnɔw ni kongosogow ni fɛɛn fofotaw ni dugukolo kan mɔgɔw bɛɛ bena yɛrɛyɛrɛ ne ɲakɔrɔ. Kuluw bena cici, faraw bena kɛ mugu ye, kogow bɛɛ bena ben duguma.
Ne bena Gɔgi kiti ka fɔɲɔbana ni mɔgɔfagalaw bila a la. Ne bena sanji ni sanbɛrɛ, ni tasuma ani kiribi mananin caaman jigi Gɔgi n'a ka kɛlɛdenw kan, ani siya caaman min bena kɛ n'a ye.