Abiro mbedo dhogi gi mbedo, mi awichi, kendo aywayi oko kaachiel gi jogi duto mag lweny. Ogandani mar lweny, kod farese gi joidh farese morwakore gi lep lweny, ng’eny ahinya. Jalweny ka jalweny omanore gi kuode kod liganglane.
Bang’ higni mathoth, kinde nochopi ma ananyisie mondo imonj piny moro ma ji osebet kodakie gi kue maonge lweny, chakre ndalo mane oduoggie, kigologi kuom ogendini mang’eny. Inimonj gode mag Israel mane oselokore thim, kendo mane owe kokethore chon, to koro ji duto odakie gi kue.
Eka in idhi iyak kendo ipe gik mantie, kendo inimonj kuonde mane okethore chon, to tinde ji odakie. Gin joma ne osechoki kigolo kuom ogendini mamoko, ma koro nigi jamni kod mwandu mamoko. Pinygi nie dier pinje madongo.
Ununur kuom joga Israel, mana ka rumbi maumo piny. Ka kindeno ochopo, anaori mondo imonj pinya, to gima natimni nonyis ogendini ni an Ng’ama Ler, mi ging’eya, yaye Gog!
In e ng’at mane awuoyo kuome chon kane aoro jotichna ma jonabi mag Israel mondo owach pile ni e ndalo mabiro anakel ng’ato mondo omonj Israel.’ An Ruoth Nyasaye ema awacho kamano.”
Rech duto manie nam, gi winy manie kor polo, kod le mae thim gi gik mamol piny, kaachiel gi dhano duto mae piny notetni e nyima. Gode nomukre, kendo hohni bende noruombre piny, kendo ohingni duto nopodhi.
Anakume gi tuoche kod nek. Bende anahon koth mang’ongo gi pe madongo gi mach kod kite maliel kuome, kendo kuom joge mag lweny kod ogendini mathoth man kode.