Dithabeng tša Isiraele ke mo o tlogo wa, o na le dira tša gago ka moka, le ditšhaba tše di nago nago; ke tlogo gafa wa ba mojo wa manong, le wa maaka ka moka, le wa dibata tša naga.
Ina la ka le lekgethwa ke tlo le tsebatša setšhabeng sa ka sa Isiraele, ke se hlwe ke dumela ge le ka gobošwa. Ke mo ditšhaba di tlogo tseba ge Mokgethwa wa Isiraele e le nna Morena.
Baagi ba metse ya Isiraele ba tlo tšwa ba gotetša mello ka dibetša, le ka diphemo, le ka dikotse, le ka mara le mesebe, le ka melamo, le ka marumo. Ba tlo fetša nywaga e šupago ba gotša mello ka tšona.
Go ka se iwe dikgonyeng hlageng; di ka se rengwe sekgweng; mello ba tlo gotša ka dibetša; e tlo ba gona go thopolola tše di thopilwego, le go hlakola bahlakodi ba bona. O realo Morena Mong wa bohle.
Mehleng yeo ke tlo kgaolela Gogo felo ga mabitla nageng ya Isiraele, moedi wa baeti wa lewatleng ka thoko ya bohlabela. Ke mo go tlogo kgaotša maeto a Gogo, ge go epelwa yena le madira a gagwe ka moka; felo fao ba tlo re ke Moedi wa makoko a Gogo.
Go tlo fela go hlaolwa banna ba go ralala le naga, ba epela bafeti bala ba go šalela ntle, gore ba ntšhe naga tšhila. Ba tlo thoma go tsoma ge go fetile kgwedi tše di šupago.
Baraladi ba naga ge ba ralala, e tlo re ge e mongwe wa bona a hwetša mašapo a motho, o tlo tsema seka sa leswika, gore baepedi ge ba fihla, ba ye ba a epele moeding wa makoko a Gogo.
Ge e le wene ngwana motho, Morena Mong wa bohle o re: Bitša manong ka moka a diphego, le dibata ka moka tša naga, o re: Rapang le tleng, le kgobokane le etšwa mathoko ohle, le bokanele sedimo sa ka, se ke le hlabetšego sona, sedimo se segolo dithabeng tša Isiraele; le je dinama, le nwe madi.
Ke mo borena bja ka ke tlogo bo bea mo go bantle bohle. Mme bantle bohle ba tlo bona moahlolelo wa ka wo ke dirago ka wona, le letsogo la ka le ke le beilego go bona.
Bantle ba tlo tseba gobane ba moloko wa Isiraele ba be ba išitšwe bothopša ka molato wa bona wa ge ba ntlhanogela, nna ka ba fularela, ka ba gafela diatleng tša manaba a bona, ba wa ka lerumo ka moka ga bona.
Ge ke ba gomiša ditšhabeng, ke ba phutha dinageng tša manaba a bona, ke mo ke tlo tšwelela ke le yo Mokgethwa ke na le bona, baditšhaba tše ntši ba di bona.
Ke mo ba tlogo tseba ge nna Morena Mong wa bohle ke le Modimo wa bona, ge ke ba iša bothopša ditšhabeng, ka buša ke ba kgobela mo nageng ya gabo, ke se šadiše le o tee wa bona.