“Mo, wiri boro, mo gúmba pai wa nebi kuti Gogo, ki ya, Ya Gbia MBORI wẽ: Ako Gogo, mo ngére, mi gbarasi rimoro, nga gbia abazogo nga ga Meseke ko na ga Tubara ko;
Mo ati ku ri abaagangara Yisaraere yo, mo na gamo bakere arimbasa aboro dunduko na agu aboro du fuo ro; mi afú ro fu angbatunga azire gomoro ni úmozi na fu anya nvuo ami riti ro.
“Mi ki yugu pa kparakpara ziazia rimore i ini he dagba gimi aboro Yisaraere yo; ka mi aída nga i gbarasi kparakpara ziazia rimore berewe ya; arikaaboro aína ha ya mi nga Yekova, gu Ziazia Ko du dagba aYisaraere.
“Si du agu yo naraka rogo abaakporo Yisaraere yo, i akúra ka ndu ka maa we ti amarã vura ki zokodi he, na avurakube na bakikii avurakube, amboto na aguanza, angbondo na abaso, i ki ginda we kuti ni tipa agarã saba;
si du zingo kua nyake ati yo amánga nga yo te, watadu de gu rogo abire yo a te, bambiko i agínda gayo awe kina ri amarã vura; i agbarasa agu yo nagbarasi yo, ki gbu agu yo nagbu yo, wo poi Gbia MBORI.
“Ti gu rago re mi afú ba fu Gogo tipa kpisida aboro rogo ho ringara Yisaraere yo, gu Ngboongboo Aboronunguro ku uroyo pati baime; si adé gangi ti andununguro, bambiko yo i ka kpisida Gogo ni na gako rimbasa dunduko; i ayámba ha nga Ngboongboo Amona-gogo.
Ho agi yo ka susa ni re rogo ringara gu boro ki bi meme boro, ni amáa úyugohe ho pati he, daho akpisidi aboro ka kpisida ha ni ku rogo Ngboongboo Amona-gogo yo.
“Tipa ro, wiri boro, wo poi Gbia MBORI: mo gúmba pai fu angbatunga azire dunduko, na fu anya nvuo dunduko ki ya, ‘Oni tíria tironi ki ye, oni dungura tironi rogo pavuru arago dunduko sa motumo pumbo nga gu mi ambakada ha tipa roni, bakere pumbo motumo ku ri abaagangara Yisaraere yo, oni ki niri pasio ki nimbiri kure.
Oni ari pasio airanyaka, ki nimbiri kure abazogo nga ga kpotosende yo ga abaakandoro, na ga wiri akandoro, na ga ameme, ga abaabagara, ami dunduko nga anya nzeme nga ga Basana ra.
Arikaaboro ki ini he ya ngbatunga aYisaraere andu ni zizi yo tipa gayo irairapai, bambiko i agu ri gimi andika si du mi aoko kpakpure ti yo ti ni, ki fu yo ku be avurayo, i dunduko ki tiwi be basape.
“Si du ya Gbia MBORI wẽ: Mi akáraga Yakoba gene zia yo ko yo awere, ki ini pai fu ngbatunga aYisaraere dunduko; mi ki du na ringo tipa kparakpara ziazia rimore.
Si du i aina ha ya mi nga Yekova gayo Mbori bambiko mi akedi yo ni zizi yo ku dagba arikaaboro yo, mi ki dungura yo berewe kina ku rogo gayo ringara. Mi ambú nga gu ni dagba yo yo ni nye dagba arikaaboro yo berewe te;