Nigɛ dɔ ta, i b'o bila ele ni dugu cɛ ka kɛ i n'a fɔ nigɛkogo. O kɔ, i b'i ɲaa sin dugu nin ma. O la, a daa be tugu, o be kɛ ele le sababu la. O bena kɛ taamasiɲɛ ye Isirayɛlidenw fɛ.
«La i numanbolo kan, i bena Isirayɛlidenw ka kojugu to i yɛrɛ kan. K'i lanin to i gɛrɛn kan, i bena u ka kojugu doni ta i yɛrɛ kan loon o loon fɔɔ i wilituma.
O loon nunu mana dafa, i be yɛlɛma ka la i kinibolo kan, ka Zuda mara mɔgɔw ka kojuguw doni ta. Ne y'a latigɛ ko tile bi naani kɔnɔ, loon kelen be jati u ka saan kelen kojugu nɔɔ na.
« * Bile ni * orizi ta, ani sɔsɔ, ni ɲɔɔn, k'u don minan kelen kɔnɔ, ka buru kɛ n'o ye, i bena to ka min ɲimi k'i lanin to i gɛrɛn kan tile kɛmɛ saba ni bi kɔnɔntɔn nunu kɔnɔ.
Ne y'a fɔ ko: «Ayi, Matigi, Masaba! Ne ma deli ka n yɛrɛ nɔgɔ ka ye. Kabini ne denmisɛn tuma na fɔɔ ka n'a bila bii la, ne ma deli ka sogosu ɲimi, wara ye sogo min dumu k'a tɔɔ to, ne ma deli k'o fana ɲimi. Sogo nɔgɔnin si ma don ne daa la ka ye.»
O kɔ, a y'a fɔ ne ye ko: «Adamaden, ne bena dumuniko gwɛlɛya Zeruzalɛmu kɔnɔ. U kɔnɔ gwannin bena dumuni suma k'a dumu. U siranninba bena u ka minji suma.