×

Ñanderuete Ñe’ẽ Porã 2015

4

1
Nde, kuimba’e ra’y, ejapyhy peteĩ ñay’ũ pehẽngue oñembopepapyréva (ladríllo) ha emoĩ ne renondépe ha ehai hese pe táva Jerusalen ra’ãnga.
2
Emongora soldádo atýpe, ha emopu’ã ijerekue rehe yvy aty, ñemo’ãha ramo, ha henondépe remoĩta soldádo atyguasu ha ijerekue rehe umi tembiporu oity hag̃ua pe táva tápia rehe.
3
Ejapyhy avei peteĩ páila hierroguigua ipéva, ha emoĩ pe táva ha ne pa’ũme, ku táva tápia yvatéicha; ha emoĩ nde rova pe táva gotýo, ha nde reikóta táva oñemongoráva ramo: péva oikóta techaukaha ramo Israel retãme g̃uarã.
4
Upéi reñenóta nde yke asúpe, Che amoĩta nde ári Israel retã ñañangue. Ha umi ára reñeno aja nde yke asu gotýo nde regueraháta Israel ñañangue.
5
Che aipapa ndéve g̃uarã heko ñañangue añokuéra ha ohupitýgui 390 áño, nde reñenóta avei 390 ára (día) nde yke asu gotýo, ha péicha nde regueraháta nde ári Israel retã ñañangue.
6
Ko’ã mba’e rire, reñenóta nde yke akatúape ha regueraháta nde ári Juda retã ñañangue 40 ára pukukue; peteĩ ára amoĩ ndéve peteĩ áño rehe.
7
Ha upéi remoĩta nde rova pe táva Jerusalen oñemongoráva rehe, ha nde jyva nandi reheve reavisáta ichupekuéra.
8
Ha eikuaa porãke. Che roñapytĩta, ani hag̃ua rejere mamove gotýo, oñemboty peve umi ára ñemongora reheguáva.
9
Ha ejapyhy ndejupe g̃uarã trígo, cebáda, kumandá, lentéja, sórgo ha avéna, ha emoĩmba peteĩ mba’yrúpente, ha ejapo ichuguikuéra pan nde re’u hag̃ua umi ára reñeno aja nde yke asúpe ha péva rekarúta 390 ára pukukue.
10
Ne rembi’u re’útava ipohyiva’erã 254 grámo peteĩ árape g̃uarãnte; emboja’o pe tembi’u re’u hag̃ua sa’i sa’ípe.
11
Ha pe y rey’útava reha’ãta avei, 0,6 lítronte meme árape, ha emboy’u sa’i sa’ípe.
12
Ha re’úta pan cebáda oñembojypyréva tanimbu guýpe; ha embojy hesakuéra renondépe tetãygua repotikueguiguáva tatápe.
13
Ha Ñanderuete he’i: Peichagua pan oñemongy’apyréva Israel ñemoñarenguéra ho’úta, tetãnguéra apytépe amondotahápe.
14
Ha che ambohovái che Jára, che Ruetépe: Che ánga noñemongy’ái araka’eve, che mitã ára guive ko ára kóva peve nda’úi mymba ro’o omano reiva’ekue ni oñemondyryrypava’ekue, ha araka’eve che jurúpe ndoikeiva’ekue so’o iky’áva.
15
Ha Ñanderuete ombohovái chéve: Eikuaa porãke, Che ahejáta reiporu vaka repotikue pe tetãygua repotikue rendaguépe rembojy hag̃ua ne pan.
16
Ha upéi he’i chéve: Kuimba’e ra’y, eikuaa porãke, Che amopokã pokãvéta pe pan Jerusalénpe; ha oje’úta pe pan oñeha’ãmbyréva jepy’apy ha kyhyjepópe.
17
Ág̃a opa ramo pan ha y, oma’ẽta ojuehe ñemondyipópe, oñehundi peve iñaña reko rupi.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015
:
Guardar notas