Ki mi paragunnyu eutap Kamuktaindet ne Toroor eng' kenyiitap tiptem ak muut, kobooch ngap keluulech, eng' taunetap kenyiit, eng' peetuutap taman ne po arawet, eng' kenyiitap taman ak ang'wan kobooch ngap kebar nganaseet ak komutwaa anyo olooto eng' peetuunooto.
Ki imutwaa eng' ng'ang'utigap Kamuktaindet anyo emetap Israel ak kondea tulweet ne kooi miising', ole kimi itoondap teekseetap nganaseet eng' murot tai.
Ak ki imutwaa anyo yooto, ak ogeero, kimi yooto chii, ne ki uu itoondanyi itoondap sugunwet kotinyei porowetap katanit eng' eunnyi, ak tegat ne kikwaise; ak kitonone ormariichet.
Ak ki leenjo chiichooto, Ee, weeriitap chii, keer eng' konyeguk, ak igas eng' itiiguk, ak inde muguleldang'ung' tuguuk tugul che ta aboorun; amu kagimutun inyoo olito si kobiit aboorun tuguuchuuto: tetyi kootap Yahudik tuguuk tugul che igeere.
Ak ogeero, kimi inaatut ne kiyiem koot, ak kimi eutap chiichooto tegat ne kikwaise ne po mitainik lo che po euut eng' koindo, kakwautyet age tugul eng' chooto lo, ko kitesat tebeesindo agenge ne po euut: ki ikwa anyun tebeesindap inaatut, koek tegat agenge; ak ki ek kooindap tononennyi tegat agenge.
Ki it anyun ormariichet ne tokyingei kong'asiis, ak kolaany kobun lang'eiywot, ak ki ikwa seremut ne po ormariichet, ki ek tegat agenge tebeesindo: ak ki ek seremunooto tegat agenge tebeesindo.
Ak ki ek kooindap koot age tugul ne po oriit tegat agenge, ak ki tegat agenge tebeesindo; ak ki mitainik muut che po euut kobooch koot age agoi koot age; ak kitegat agenge seremut ne po oriit ne po ormariichet ne ki mi ole kibunei kebendi keterut ne po ormariichet ne tokyingei koot.
Yeityo kokwa keterut ne po ormariichet koek mitainik sisiit che po euut; ak ki ek tugatugikyik mitainik aeng' che po euut; ak kitokyingei keterut ne po ormariichet koot.
Ak ki somok kooriik che ki mi komosi ak komosin che po ormariichet ne kitokyingei kong'asiis; ki aechin tugul ko somok: ak ki aechin tugatugigap komosi ak komosin.
ak kimi tegeleiywot taitap koorichooto po oriit, ne po kakwautyet agenge ne po euut eng' komosi, ak tegeleiywot age ne po kakwautyet agenge ne po euut eng' komosin; ak ki mitainik lo che po euut koorichooto po oriit eng' komosi ak komosin.
Ak ki ikwa ormariichet kobooch koot parak ne po koot age agoi koot parak ne po koot age, ki ek tebeesindo mitainik tiptem ak muut che po euut; kong'etee kurgeet age agoi kurgeet age.
Ak ki tinyei koorichooto po oriit tirisyok che regerotiin, kobooto tugatugikwak che ki mi ormariichanooto komosta age tugul, ak ki uu nooto eng' keterut: ak ki mi tirisyok komoswek tugul ole po oriit: ak ki mi itoonwegap tiironigap sosik eng' tugatukyet age tugul.
Ki kimutwaa anyun anyo seremut ne ki mong'jin, ak ogeero, kimitoti kooriik che po oriit, ak ole ki kibunoti ole ki kimale koik, che ki kiyai koyiem seremut: ki mi kooriik sosomu olooto ki kimale koik.
Yeityo kokwa tebeesindo kobooch ormariichet ne tabanu ng'wony, agoi taitap seremut ne po oriit ole po saang', ki ek mitainik pogol che po euut eng' komostap kong'asiis ak eng' murot kaataam.
Ak kimi kooriikyik somogu che po oriit komosi ak komosin; ki aechin kakwautigap tugatugikyik kobooto che po keterunnyi, ak che po ormariichet ni kabo tai; ki kakwautik konom che po euut koindonywa ak kakwautik tiptem ak muut tebeesindo.
Ak ki aechin kakwautigap tirisyokyik, ak che po keterunnyi, kobooto che po itoonwekyik che po tiironigap sosik, ak che po ormariichet ne tokyingei kong'asiis; ak kitogostae lang'eiywot ne tinyei tuguuk tisap che kityegoti; ak kimi tainnywa keterunnyi.
Ak kimi ormariichet ne kebunei kebendi seremut ne po oriit ne kitokyingei ormariichet ne po murot kaataam ak kimi ormariichet ne kitokyingei ormariichet ne po kong'asiis; ak ki ikwa kong'etee ormariichet age agoi ormariichet age, koek mitainik pogol che po euut.
Ak ki imuta atokyigei murot tai, ak ogeero, kimi ormariichet ne tokyingei murot tai: ak ki ikwa tugatugikyik ak keterunnyi kogergeit ak mitainik chu kabo tai.
Ak ki tinyei tirisyok ormariichanooto kobooto keterunnyi eng' komoswek tugul che uu tirisyochu kabo tai: ki mitainik konom che po euut koindo, ak ki mitainik tiptem ak muut che po euut tebeesindo.
Ak kimi lang'eiywot ne tinyei tuguuk tisap che kityegoti, ketogostoi, ak kimi keterut tainnywa: ak ki tinyei tugatugikyik itoonwegap tiironigap sosik komosi ak komosin.
Ak kimi ormariichet ne kebunei kebendi seremut ne po oriit ne tokyingei murot tai: ak ki ikwa kong'etee ormariichet age agoi ormariichet age kotokyigei murot tai, koek mitainik pogol che po euut.
kobooto kooriikyik che po oriit, ak tugatugikyik, ak keterunnyi, ko uu mitainik chu kabo tai: ak ki tinyei tirisyok ormariichanooto kobooto keterunnyi eng' komoswek tugul: ki mitainik konom che po euut koindo, ak ki mitainik tiptem ak muut tebeesindo.
Ak kitokyingei keterunnyi seremut ne po saang'; ak kimi itoonwegap tiironigap sosik tugatugikyik: ak ki tinyei lang'eiywot tuguuk sisiit che kityegoti ketogostoi.
kobooto kooriikyik che po oriit, ak tugatugikyik, ak keterunnyi, ko uu mitainik chu kabo tai: ak ki tinyei tirisyok keterunnyi eng' komoswek tugul; ki mitainik konom che po euut koindo, ak ki mitainik tiptem ak muut che po euut tebeesindo.
Ak kitokyingei keterunnyi seremut ne sip kemong'jin; ak kimi itoonwegap tiironigap sosik tugatugikyik eng' komosi ak komosin: ak ki tinyei lang'eiywot tuguuk sisiit che kityegoti ketogostoi.
kobooto kooriikyik che po oriit, ak tugatugikyik, ak keterunnyi; ak ki tinyei tirisyok eng' komoswek tugul: ki mitainik konom che po euut koindo ak ki mitainik tiptem ak muut che po euut tebeesindo.
Ak kitokyingei tugatugikyik seremut ne sip kemong'jin; ak ki tinyei tugatugichooto itoonwegap tiironigap sosik eng' komosi ak komosin, ak ki tinyei lang'eiywot tuguuk sisiit che kityegoti ketogostoi.
Ak kimi ye neegitee keterutap ormariichet, mesosyek aeng'u eng' komosi ak aeng' eng' komosin, che kieng'jin kagoochinet ne kibeelei, ak kagoochinetap tengekto, ak kagoochinetap chalwokto.
Ak kimi mesosyek aeng'u eng' komosta age eng' ole po saang' eng' ole kitogostoe kebendi ormariichet ne tokyingei murot kaataam; ak kimi mesosyek aeng'u komosta age che ki po keterut ne po ormariichet.
Ak kimi mesosyek ang'wanu, che po koik che ki kiwai, che po kagoochinet ne kibeelei, ko kakwautyet agenge ak kebeberta ne po euut, koindo, ak ki kakwautyet agenge ak kebeberta ne po euut, tebeesindo, ak ki kakwautyet agenge ne po euut, kooindap tononennyi: ki kigonoree mesosyechooto tuguuk che ki kieng'e kagoochinet ne kibeelei kobooto tiseiywot.
Ak kimi saang'utap ormariichet ne po oriit kooriik che po oriit che po tyeniik eng' seremut ne po oriit, ne ki mi komostap ormariichet ne po murot kaataam; ak kitokyingei murot tai: kimi age komostap ormariichet ne po kong'asiis ne tokyingei murot kaataam.
Ak po koot ne tokyingei murot kaataam tisiik che tononjin riipseetap kaptisisyet: chuuto ko weeriitap Zadok, che salu weeriitap Lawi, che riikyin Kamuktaindet ne Toroor koboisyechin ineendet.
Ki imutwaa anyun anyo keterutap koot, ak ki ikwa tugatukyet age tugul ne po keterut, ki ek mitainik muut che po euut komosi, koek mitainik muut che po euut komosin: ak ki ek tebeesindap ormariichet mitainik somok che po euut komosi koek mitainik somok komosin.
Ki ek mitainik tiptem che po euut kooindap keterut, koek mitainik taman ak agenge che po euut tebeesindo; ak kimi tuguuk tamanu che ki kityegoti ketogosyin yooto: ak kimi tolochik ole neegitee tugatugik, kimi age komosi, komi age komosin.