Due apar mar higa manyien, ma en higa mar apar gang’wen bang’ kawo Jerusalem, kane wasetieko higni piero ariyo gabich e tuech, ne awinjo ka teko mar Ruoth Nyasaye obiro kuoma, mi oting’a.
Ruoth Nyasaye ne otera machiegni gi udigo, mi apo kaneno ng’at moro marieny ka mula. Ne ochung’ e dhorangach, koting’o tol mipimogo gik moko, kod rapim mar bao e lwete.
Ng’atno nowachona niya, “Wuod dhano, rang maber, kendo chik iti malong’o, mondo iwinj weche duto ma abiro wachoni, nimar mano ema omiyo osekeli ka. Bang’e idhi inyis jo-Israel gimoro amora ma iseneno ka.”
Gima ne aneno ne en Hekalu, kendo ne nitie ohinga molwore. Ng’at mane aseneno cha nogolo rapim mar bao ma borne mita adek, mi opimogo ohinga. Borne noromo mita adek to lach mar kore bende mita adek.
E tok dhorangajno ne nitie yo ma ji kadhoe man gi udi mag rito adek e bathe koni gi konu. To ot ka ot ne borne kod lachne mita adek maromre, kendo lach mar kor ot mane ni e kindgi ne mita ariyo gi nus. Kisekadho ut ritogo, to nitie yo madhi e ot maduong’ momanyore gi Hekalu. Bor mar yorno ne mita adek.
Bang’e ng’atno nopimo lach mar rangach, chakre e kor ot ma katok od rito achiel gi ka iye nyaka kor ot ma katok ot machielo momanyore kode, monwang’o ni oromo mita apar gariyo gi nus.
Ne nitie dirise matindotindo e kor udi maoko mag udi duto, kendo e kor udi maiye manie kind udi. Kor udi ma yo ka iye, momanyore gi yo makadho e kind udino ne ogorie yiend othidhe.
Ng’atno nokawa mokadho koda e dhorangach nyaka e laru moro. Kuno ne nitie udi piero adek momakore gi ohinga maoko, to e nyim udigo ne nitie kama ochanie kite mopamore
Ne nitie rangach moro moting’ore gi malo mane idonjogo e laru ma iye. Ng’atno nopimo kind rangach maiye gi maoko, mi oyudo ni bor mae kindgi romo mita piero abich.
Udi mag rito adek mane ni e bath yo koni gi koni, kod kor udi mane ni e kindgi, kaachiel gi ot maduong’, duto ne romre gi mago mane nie rangach ma yo wuokchieng’. Bor duto mar rangach gi utene ne mita piero ariyo gabich, to lachne mita apar gariyo gi nus.
Ot maduong’ kod dirise gi kido mag yiend othidhe mane ogor, ne chalo gi mago manie rangach ma yo wuok chieng’. Kaeri bende ne nitie raidhi man gi ondembe abiriyo midhigo e dhorangach, kendo ot maduong’ ne ni tung’ mogik, kuma omanyore gi laru.
Ne nitie rangach moro machielo midonjogo e laru maiye momanyore gi rangach maokono, mana kaka ne nitie e rangach ma yo wuokchieng’. Ng’atno nopimo bor manie kind rangach maoko gi maiyeno, moyudo ni oromo mita piero abich.
Ne nitie raidhi man gi ondembe abiriyo madhi e dhorangajno, kendo ot maduong’ mane ni kuno bende ne ni tung’ mogik, kama omanyore gi laru. Ne ogor yiend othidhe e kor udi maiye momanyore gi yo makadho e kind udi.
Ne en gi ot maduong’ momakore gi laru mamoko. Yiend othidhe bende ne ogor e kor udi momanyore gi yo makadho e kind udi. Raidhi man gi ondembe aboro ne dhi nyaka e dhorangajno.
Ute mag rito gi ode maduong’ kod kor udi maiye ne romre gi mago mane ni e rangeye mamoko. Ne nitie dirise kuonde duto, koda ka e ot maduong’. Borne duto bende ne mita piero ariyo gabich, to lachne mita apar gariyo gi nus.
Ot maduong’ ne omanyore gi laru maoko, kendo yiend othidhe nogor e kor udi manie bath yo makadho e kind udi. Raidhi man gi ondembe aboro ne dhi nyaka e dhorangajno.
Dhorangajno bende ne nigi udi mag rito, gi kor udi maiye mogor, gi ot maduong’, kod dirise kuonde duto. Borne duto ne mita piero ariyo gabich, to lachne mita apar gariyo gi nus.
Ot maduong’no ne omanyore gi laru maoko, kendo yiend othidhe ne ogor e kor udi manie bath yo makadho e kind udi. Raidhi man gi ondembe aboro ne dhi nyaka e dhorangajno.
E laru maoko ne nitie ot moro momakore gi rangach maiye, odno ne nigi dhoot madonjo e ot maduong’ mane omanyore gi laru. Kanyo ema ne ilwokoe jamni monegi, midwaro timogo misenghni miwang’o pep.
Ne nitie mesni ang’wen ei ot maduong’no, ariyo e bath ot konchiel, kendo ariyo e bathe komachielo. Ewi mesnigo ema ne inegoe jamni mitimogo misengni mopogore opogoore, kaka misengni miwang’o pep, kod mag golo richo, kod mago mipwodhogo richo mag gowi.
Mesni ang’wen mane ilosoe misengni miwang’o pep ne mag kite mopa. Borgi modhi malo ne nus mita to borgi kod lachgi ne mita achiel achiel maromre. Gik moko duto mane itiyogo kuom yang’o jamni mitimogo misengni ne iketo ewi mesnigo.
E bath rangach ma yo nyandwat e laru maiye, ne nitie ot moro mochomo yo milambo. Bende e bath rangach ma yo milambo ne nitie ot machielo machal gi mano mochomo yo nyandwat.
to ot mochomo yo nyandwatno en mar jodolo matiyo e kendo-mar-misango. Jodologo duto nyaka bed jo-Lawi ma nyikwa Zadok. Gin kende ema oyienigi dhiyoe nyim Ruoth Nyasaye mondo gitine.”
Eka ng’atno nokawa, motera e ot ma e dhood Hekalu. Ne opimo dhoot midonjogo ei Hekalu, mi oyudo ni borne oromo mita ariyo gi nus, to lachne mita abiriyo. Lach mar kor udi mage ne romo mita achiel gi nus koni gi koni.
Bor mar ot mane ni e dhootno ne romo mita apar, to lachne mita auchiel. Raidhi man gi ondembe apar ne nie dhoodno. Bende e bath dhoot koni gi koni ne nitie siro achiel achiel.