Soaala nug pãng waa n zẽk-m lame n ta Zerizalɛɛm. Yɩɩ tõnd yembda yʋʋmd pisi la a nu soaba sẽn waa n sɩngdẽ, yʋʋmda pipi kiuuga rasem sẽn sõd piiga, Zerizalɛɛm wãab poore yʋʋm sẽn maan piig la a naase, a raara tã-tã wã. Naaba-Wẽnd lika b menga
la m yamẽ, ne yĩngr vẽnegre, m yãeeme tɩ b talla maam n ta Israyɛl, n dʋʋs maam tãn-lug-lug a ye zugu. M yãee tãnga sigdga nug-rɩtgo, bũmb sẽn tonde wa tẽng ne a roto.
Be la b tall-m n ta la m yãenda neda. Raoa neng ra pɩnda wa zũudu sẽn duugi. Nin-kãng ra zãada beren-dɩgr wĩir a nugẽ, n paas rasaar la yaa rasaar sẽn tar n magda. Raoã ra yɛsa tẽnga noore.
Nin-kãng n yeel maam: «Ezekiyɛl, puk f nini la yoog f tʋba. Ges m sẽn na n wilg-f bũmb ninga neere. Yaa bõn-kãng gesg yĩnga la m tall-f n wa ka. F sã n yãend-a la f na n yaool marsã n wilg Israyɛl kambã f sẽn yãende.»
Ad-m sẽn yãende: lalg n da gũbg wẽnd doogã. Raoã ra zãada a magdga. Magdga woglem yaa kãntɩɩs a yoobe. (Paasda nug yakemde tɩ marsã kãntɩɩga paam pĩnd soaba woglem.) Raoã maga lal-gũbrã taglem la a zãndlem. Fãa ra yaa kãntɩɩs a yoob-yoobe.
B ra ninga peem-lees sẽn pɩgdg ne raado, ro-bõonesa, yɩng lalsã, lals niyns sẽn welg-b ro-bõonesa ne taabã, la taoor zãonga lalse. Peem-leesa ra yaa yalems pʋgẽ n yɩɩd yɩnga. B ra ning-b-la zãonga lalsã n gilgi. Koms vãad la b ra gʋl pugẽ lalsa zutu n paas b neerem.
Ro-bõones a yoobe n da tong be: a tãab kɩreng a ye, a tãab kɩreng a to, n paas zãongo la lalsa sẽn da me tagd-tagdã, la fãa maga wa sẽn da be pipi noorã: woglma yaa kãntɩɩs pis-nu, yalma yaa kãntɩɩs pisi la a nu.
Noor n da be pipi zakã n tot ne nug goabg soabã tɩ b tõe n tũ be n kẽ pʋgẽ zakã; noor a to me n le be yaanga. Raoã maga vɩʋʋg ning sẽn be noor ne a to la a paama kãntɩɩs koabga.
Dẽ poore raoã tall-m lame n kẽ pʋgẽ zakã. D tũu rɩtg noorã. A maga lalsa sẽn me tagd-tagdã, a zãongã, b yalem wala b woglma ra yaa wala pipi noora rẽnna.
Ro-bõonesã, lalsa sẽn da welgd-b ne taabã, zãongã, fãa ra yaa a ye ne noya a taaba rẽnna. Noora ne zãongã ra ninga peem-leese sẽn ya yalemse n gilgi. Woglma yaa kãntɩɩs pis-nu, yalma yaa kãntɩɩs pisi la a nu.
A ro-bõonesã, lalsa sẽn da me tagd-tagdã, a zãongã, fãa ra yaa a ye ne noy a taaba rẽnna. B ra ninga no-kãng ne a zãongã peem-lees bɛda n gilgi. Woglma maga kãntɩɩs pis-nu, yalma kãntɩɩs pisi la a nu.
la no-kãng me yaa wa a taaba. A wogma ra yaa kãntɩɩs pis-nu t'a yalma ya kãntɩɩs pisi la a nu la yẽ me ra tara ro-bõonese, lals sẽn me tagd-tagdo, zãongo la peem-lees n gilgi.
Noor kãngẽ zãongã, te-roagens a yiibu n da be kɩreng a ye t'a yiib me be kɩreng a to. Yaa bãmb zutu la b ra koot maanda rũmsi: yũ-nood maand bɩ sugr kosgo, bɩ yel-wẽnd dolb maando.
Te-roagens a naasa sẽn ya yũ-noog maanda kʋʋb yĩnga ra mee ne kug sẽn peese. B voglma ya kãntɩɩg la pʋɩ-sʋka, b yalma: kãntɩɩg la pʋɩ-sʋka, b zãndlema: kãntɩɩga, la yaa bãmb zug la b da rɩgend sʋʋsa sẽn tar n koot maanda rũmsi, yũ-noog maando la maand a taaba.
Raoã tall-m lame n kẽes pʋgẽ zaka. Rot a yiib n da be be, a ye nug goabg noorã t'a meng neng teesd rɩtgo. A to wã ritg noorã t'a neng teesd nug goabga.
Roog ning neng sẽn tees nug goabga yaa sẽn tʋmd-b maan-kugra rẽnna. A tol n paasame t'a Levi kamba sẽn yaa a Sadok yagens bala n da tõe n kẽ ro-sõnga pʋg n tʋm maan-kʋʋra tʋʋma.
A tall-m lame n kẽes wẽnd dooga zãongẽ. A maga zãonga lals niyns sẽn me tagd-tagdã: kãntɩɩs a nu kɩreng a ye, kɩreng a to wã kãntɩɩs a nu. Kʋɩlenga yalem: kãntɩɩs a yoobe, a tãab kɩreng a ye, a tãab kɩreng a to.
Zãong ning sẽn tũud n paam wẽnd dooga noorã woglem yaa kãntɩɩs pisi t'a yalem ya kãntɩɩs piig la a yiibu. Rʋʋda teeds piiga n yaool n kẽ. Lal-gils bɛd a yiibu n da be noorẽ, a ye goabga, a ye rɩtgo.