Kä cuɛ ɣä nööŋ guäth mi cua̱ nyuuth Kuɔth ben nɛn thi̱n, muun I-thɛ-rɛl. Kä cuɛ ɣä nyuɔ̱ɔ̱r wi̱i̱ pa̱a̱m mi bäär, mi te mi ce̱tkɛ wec thi̱n kui̱c cuëëcdɛ.
Kä mëë cɛ ɣä naŋ ɛn wani, tëë kɛ wut mi te ɛn wani, mi ce̱t ta̱a̱dɛ kɛ ciɛk in yian, mi tekɛ lath thëm mi gɔaa, kä te tetdɛ kɛ ta̱y thëm mi gɔaa. Kä tëë cuŋä thok kal.
Kä cuɛ ruac kɛ ɣä wëë i̱, “Gat ran, ji̱n gui̱cni kä li̱ŋni agɔaa, kä läthni lɔcdu kä ŋɔak diaal tin bä nyuɔ̱th ji̱, kɛ ɣöö nööŋkɛ ji̱ ɛn guäth ɛmɛ kɛ ɣöö bä ŋɔak ti̱ti̱ ben nyuɔ̱th ji̱. Kä lätni tin diaal tin ci nɛn ji̱ thuɔk duëël I-thɛ-rɛl.”
Ɛn wanɛ mɔ tëë kɛ päny mi ca go̱l ni luaak Kuɔth raar. Kä theem gutdä in te tetdä wutdä bärɛ ɛ jua̱th tetni da̱ŋ bäkɛl ti ba̱r ba̱a̱r. Kä bär kä kɛl ɛ juäth tetdä kɛnɛ pät tetdä. Kä cu dël pa̱a̱ny kɛnɛ bärɛ thɛm, kä cuɛ tekɛ taŋ kɛl.
Kä gëëkdɛ te duël ga̱a̱ŋni thi̱n, kä te duel ɔ kɛ theem taŋ kɛl, kä ɣäp ɣääpdɛ, taŋ kɛl kä bär jɔakdɛ. Kä kam duëli ɛ jua̱th tetni da̱ŋ dhieec. Kä thok pa̱a̱ny in la wä kɛ naath dueel in te rɛci bär jɔakdɛ ɛ taŋ kɛl.
Kä cuɛ kam duëël ga̱a̱ŋni kɛl ɛ wä duëël ga̱a̱ŋni min lot ni jɛ thɛm jɔkɔ, kä cuɛ jɛ jek a jua̱th tetni ti jiɛn da̱ŋ rɛw wi̱cdɛ dhieec kam kalɔ kɛnɛ kalɔ.
Kä cuɛ duel in te rɛci in la wä kɛ naath rɛy kal thɛm. Kä cuɛ jɛ jek ala jua̱th tetni ti jiɛn da̱ŋ rɛw. Kä cu mäni thok in thieek kɛ wääthni kui̱cni diaal.
Kä kɛn duël kɛnɛ wäthnikiɛn tekɛ kɛ wernyini, rɛc ɔ kui̱ thuɔk in wä kɛ naath rɛc kui̱ ni diaal, kä te käl tin te rɛci kɛ wernyini bä. Kä ca wääthni biɛl kɛ jiɛn nööri.
Kä cuɛ ɣä naŋ kɛ duɔ̱ɔ̱p in wäkɛ naath rɛy kal in te raar. Kä ɛn wani te duël thi̱n, kä ca rɛy kal rɔth kɛ päm ni kɛɛliw, kä ca duël ti jiɛn da̱ŋ diɔ̱k car kä ro̱o̱th pa̱a̱m ɛmɔ.
Kä wernyinikɛ kɛnɛ wääthni kɛ jiɛn nöörikɛ päär theemnikiɛn kɛ theemni tëë te peek thuɔk kal in lot ni kui̱c känyä ca̱ŋ. Tëë kɛ ka̱a̱th da̱ŋ bärɔw wädu thok kal nhial, kä te wääthnikɛ rɛci.
Kamä thuɔk kal in lot ni kui̱c caam kɛnɛ thok kal in lot ni kui̱c känyä ca̱ŋ, te thuk ti wä kɛ naath rɛc thi̱n. Cuɛ kam thukni käli thɛm, cuɛ kɛ jek kɛ jua̱th tetni ti kuɔ̱r kɛl.
Kä duël ga̱a̱ŋnikɛ kɛ bäŋdɛ tekɛ kɛ wernyini ti cakɛ go̱l kui̱cni diaal, ce̱tkɛ wernyini kä tin kɔ̱ŋ. Kä bärɛ ɛ jua̱th tetni ti jiɛn dhieec, kä ɣäp ɣääpdɛ kɛ jua̱th tetni ti jiɛn da̱ŋ rɛw wi̱cdɛ dhieec.
Kä te thok kal kuec cuëëc in te rɛci kɛ thi̱i̱k, kä cuɛ jɛ thɛm nikä thi̱i̱k in nhiam a wä kä thi̱i̱k in dɔ̱ŋ peek kuec cuëëc, kä cua jɛ jek kɛ jua̱th tetni ti kuɔ̱r kɛl.
Kä duël ga̱a̱ŋnikɛ kɛnɛ wääthnikɛ kɛ ba̱ŋnikɛ cu theemnikiɛn pa̱a̱r kɛ theemni kä tin kɔ̱kiɛn. Kä tëë kɛ wernyini ti ca go̱o̱l ni jɛ kui̱cni diaal. Kä bärɛ ɛ jua̱th tetni ti jiɛn da̱ŋ dhieec, kä ɣäp ɣääpdɛ ɛ jua̱th tetni ti jiɛn da̱ŋ rɛw wi̱cdɛ dhieec.
Kä tëë kɛ tharbëtni da̱ŋ ŋuaan ti kɔ̱ŋ ti ca la̱t kɛ pääm kɛ kui̱ mucni tin waŋkɛ, kä bäriɛn piny ɛ juäth tetdä kɛl kɛ nuth, kä ɣäp ɣääpdɛ ɛ juäth tetdä kɛl kɛ nuth, bärɛ nhial ɛ juäth tetdä, min la la̱thkɛ kuak tin la ŋuɔ̱tkɛ muc tin waŋkɛ thi̱n.
Kä rar thuɔk kal in te rɛci tëë kɛ duël kɛ kui̱ këëtni din rɛy kal in te rɛci, te kɛl peek thuɔk kal kuec caam, cɛ thokdɛ luɔc kui̱c cuëëc, kä te min dɔ̱ŋ peek kuec känyä ca̱ŋ cɛ thokdɛ luɔc peek kuec caam.
Kä duel in ci thokdɛ luɔc kui̱c caam, ɛ duel bööthni palä tin lät wi̱i̱ yi̱kä. Kä kɛ kɛn kuay Dha-dok, rɛy ji̱ Lii-bay kä rɔ̱ tin bi ben thiäkä kä Kuoth Nhial kɛ ɣöö bikɛ jɛ ben lätikä.”
Kä cuɛ kal thɛm, kä cuɛ tekɛ jua̱th tetni ti kuɔ̱r kɛl luëŋdɛ, kɛ jua̱th tetni ti kuɔ̱r kɛl kä ɣäp ɣääpdɛ, kä jɛn päär tuɔ̱ŋkɛ. Kä yi̱k tëë nhiam luaak Kuɔth.