Kûrî ntukû ya îkûmi ya kîambîrîria kîa mwaka jwa mîrongo îîrî na îtaano kuuma tûgwikua kîthamîrioone na mîaka îkûmi na îna nyuma ya Jerusalemu îgûtawa, o ntukû îîu yongwa, nî ndaaigîrue inya ya mwanya kuuma kîrî MWATHANI, nayo îrankamata.
Nayo mpingîro îîu nî yaarî na tûnyomba tûthatû twa akaria. O kanyomba kaarî ka mita ithatû nteere cio-ijîîrî. Natu tûnyomba tûu twagaanîtue na rûthingo rwa ûmatu bwa mita ijîîrî na nusu (2.5m). Wakûrûka tûnyomba tûu, nî kwaarî na antû gwa gwitîîria kanyomba karîa gaategeene na kîûrû. Antû au gwa gûkûrûkîîra kwaarî kwa ûraaja bwa mita ithatû (3m).
Mbere ya tûnyomba twa akaria nî kwaarî na mûkîîndo. Naju jwaarî jwa nusu mita (0.5m) bwa îgûrû na ûmatu bwa mita ithatû (3m). Nî kwaarî na tûnyomba tûthatû tûng'aneene o kamwe kaarî ka ûraaja bwa mita ithatû na wariî bwa mita ithatû na mita ithatû gwitia.
Tûnyomba tunthe nî twaarî na tûndiricha na kinya nthingo irîa ciagaanîtie tûnyomba nî ciaarî na tûndiricha. Ningî nî kwaarî na maûa ja mîkîndû jaathithîtue nthingoone cia ndeene cia gîkûrûkîîro kîu.
Muntû ûu aracoka arathima arîa gwaakûrûkagîîrwa kuuma ndeene ya mpingîro ya gaiti mwanka mbere ya kîarago kîa ndeene. Naku kwaarî kwa mita mîrongo îtaano (50m).
Tûnyomba tûrîa tûthatû twa gûkaria mpingîro tûrîa twaarî nteere cio-ijîîrî cia mpingîro, na nthingo irîa ciaatûgaanîtie, na kanyomba karîa ka mumaaro, cionthe ciaarî cia ithimi bimwe na mpingîro îrîa yaarî ya mbere. Mpingîro îîu yaarî ya ûraaja bwa mita mîrongo îîrî na ithaano (25m) na waariî bwa mita îkûmi na ijîîrî na nusu (12.5m). Nayo yaarî ya bwa gaiti.
Kanyomba karîa ga gûkûrûkîîra, na ndiricha, na maûa jarîa ja mîkîndû biakari ta birîa bia mpingîro ya bwa gaiti. Ningî nî kwaarî na nkinyo mûgwanja ciaitagîîria mpingîroone îîu. Kanyomba kaayo ga gûkûrûkîîra keerekeene na kîarago.
Tûnyomba twa mpingîro îîu nî twaarî na ndiricha o amwe na kanyomba na arîa gwaakûrûkagîîrwa nî kaarî na ndiricha ikari ûmwe na irîa cia mpingîro ingî. Mpingîro îîu yaarî ya ûraaja bwa mita mîrongo îîrî na ithaano (25m) na waariî bwa mita îkûmi na ijîîrî na nusu (12.5m).
Nî kwaarî na nkinyo mûgwanja irîa ciaitagia mpingîroone îîu. Kanyomba karîa kaarî au gwaakûrûkagîîrwa keerekeene na kîarago. Nthingoone cia mpingîro nî kwathithîtue maûa ja mîkîndû.
Tûnyomba twaayo twa akaria na nthingo irîa ciaatûgaanîtie, na kanyomba karîa gwaakûrûkagîîrwa kaarî na ithimi bimwe na bia mpingîro ingî. Natu nî twaarî na ndiricha kûthiûrûka. Ûraaja bwaarî mita mîrongo îîrî na ithaano (25m) na waariî bwa mita îkûmi na ijîîrî na nusu (12.5m).
Ningî nî kwaarî na nkinyo inyanya cia gwitia mpingîroone îîu. Kanyomba ka arîa gwaakûrûkagîîrwa keerekeene na kîarago kîa oome. Ningî nthingo nî ciaagemetue na maûa ja mîkîndû.
Natu tûnyomba twaayo twa akaria, na kanyomba karîa gaakûrûkagîîrwa na nthingo ciaako cia ndeene ciaarî cia ithimi bimwe na mpingîro irîa ingî. Tûnyomba tûu nî twaarî na ndiricha kunthe. Ithimi biaatu biaarî mita mîrongo îîrî na ithaano kûreea (25m) na waariî bwa mita îkûmi na ijîîrî na nusu (12.5m).
Kanyomba ka gûkûrûkîîra keerekeene na kîarago kîa oome. Nacio nthingo ciaako nî ciaagemetue na maûa ja mîkîndû. Nî kwaarî na nkinyo inyanya irîa ciaitagia ku.
Kinya yo o ûmwe na mpingîro ingî nî yaarî na tûnyomba twa akaria, na kanyomba karîa gwaakûrûkagîîrwa, na nthingo nî ciagemetue, na nî yaarî na ndiricha kûthiûrûka. Ûraaja bwaayo bwaarî mita mîrongo îîrî na ithaano (25m) na waariî bwa mita îkûmi na ijîîrî na nusu (12.5m).
Oome ya nyomba îîu nî kwaarî na meetha ingî inya ciaakari o ûmwe na irîa ingî. Nacio cieeki meetha ijîîrî ijîîrî o rûteere rûmwe rwa mpingîro îîu ya bwa ûrîo.
Aracoka arambikia kanyomba karîa kaarî arîa gwaakûrûkagîîrwa. Arakathima aroona kaarî ka waariî bwa mita mûgwanja (7m) na mita ijîîrî na nusu (2.5m) kwînama bwa nthî. Nthingo cia mpingîro ciaarî na ûmatu bwa mita îmwe na nusu (1.5m).