Mapalal thoda man ando cher e Devleko, ta llinda e direkura, ta o bulipe saia trin pole pe iek rig, ta trin pe ogoia rig kai saia o bulipe katar e chara.
O bulipe katar o udar sai panch pole, ta e riga katar o udar saia len dui pole ta dopas pe suako rig. Ta llinda e pole katar leko lungipe ta saia le bis pole ta des pole ando bulipe saia.
E sobe kai sea pe iek rig sea thode iek upral pe aver trin droma po tranda, avrial katar o zido saia iek thana te sai istardon upral e sobe ta te na cheren zor po zido.
Ta suako soba kai saia upral pe aver saia mai buli iek katar aver, e eskalera e chereki kai llala truial likela chak upre andral katar o cher, goleke, o cher saia mai bulo upre. Katar e soba kai saia tele sai likelape kai e soba kai saia po maskaral, ta kotar sai likelape mai upre.
Suako soba likela karing gua than kai achela, iek udar dela karing o norte, ta aver karing o sur, ta o bulipe katar o than kai achela saia le dui pole ta dopas sogo si truial.
Ta o cher kai saia pe rig kai likel o kham angla o than putardo, saia le tranda ta panch pole ta o zido kai saia truial katar o cher saia le dui pole ta dopas ando bulipe ta saia le saranda ta panch pole ando lungipe.
Mapalal llinda e pole katar o cher, ta saia le pinda pole ando lungipe, ta o than kai saia putardo ta o cher ta leke zidura, ta saia le pinda pole ando lungipe.
Ta llinda o lungipe katar o cher kai saia angla o than putardo kai saia pala le, ta e sobe kai sea pe iek rig ta pe ogoia, ta sea pinda pole, ta o cher e Devleko kai saia andre ta e udara katar e bar.
O than kai delpe andre ta e penllerave tangune ta e sobe kai sea truial po trin iek upral pe aver sea ucharde ande kotora kastune katar e phuv llik kai e penllerave, ta i e penllerave sea ucharde.
O altar saia le iek pola ta dopas llik upre, ta saia le iek pola ando lungipe, ta saia kastuno. Ta o manus phenda mange: Gava si o stali kai si angle o Del.
Pe udara katar o cher e Devleko sea cherde kerubinura ta palmere, sargo gola kai sea pe zidura, ta anglal katar e bar kai si avrial saia iek udar kastuno.