×

Ika Bible 2018

Izikẹlụ 42

1
Ya okẹnnyẹ hụ nọ weri m kin azụụn ezi-ọgwa ibuzọ Ụlọ-nsọ, nkọ ẹbamịn-ugu. Ọ nọ we m shi mmughẹ ndị rị nfetu ezi-ọgwa rị imẹ, nkọ ẹbamịn-ugu Ụlọ-NSỌ. Ụlọ hụn mmughẹ ndịnị rị bu ihun zinmẹ ibẹka ẹbamịn-ugu hụ. Wẹ lẹ ụlọ ọzọ rị ẹbamịn-ugu ebẹhụ bu ihun zinmẹ ibe wẹ.
2
Ụlọ ẹbụbụọnị wẹ gha ẹbamịn-ugu a banhan rị ụzọ ohu. Usue wẹ wụ ụbụkụ mmisẹn kwasị ọgụn ẹsatọ (175). Ụshịa a wụ ọbụkụ ẹsa lẹ mkpikpi kwasị ọgụn-ẹnọ (87½).
3
Hụnnị bu azụụn zinmẹ ezi-ọgwa rị imẹ, ebe Ụlọ-NSỌ rị — hụn wẹ gi ụbụkụ mmisẹn kwasị ọgụn e fetu; hụn ẹbọ bu azụụn zinmẹ ezi-ọgwa ibuzọ, ebe mgbankpo ibuzọ rị. Ẹtu-ụlọ rịsọnmẹ hụnnị bu ihun zinmẹ ndị rịsọnmẹ hụn-ẹbọ. Wẹ ẹbụbụọ wụ ụlọ elu agba ẹtọ-ẹtọ.
4
Ẹworo-ụzọ rị ihun mmughẹ ndị ahụn, ọnụmụzọ wẹ rị nkọ hụ; ụshịa ẹworo-ụzọ ahụn wụ ụbụkụ mmẹsa lẹ mkpikpi, usue ẹ wụ mmisẹn kwasị ọgụn ẹsatọ (175).
5
Mmughẹ ndị rị ibe elu ashịaruni ndị rị alị, makẹni ẹtu-ụlọ ndị rị ibe elu ka ndị rị ibe alị lẹ ndị rị etintin a shịa.
6
Ọsụọn'a ụlọ-elu agba ẹtọ rọ, adansụn arịa k'o dọn rị ezi-ọgwa; ya haịn hụn rị elu gilẹni shịahan kẹ ndị rị ibe alị lẹ ndị rị etintin.
7
Mgbọn rị ezi, ẹgbata ụlọ-elu hụ mmughẹ ndị hụ rị lẹ ezi-ọgwa ibuzọ; usue ẹ wụ ọbụkụ ẹsa lẹ mkpikpi kwasị ọgụn ẹnọ,
8
makẹni ẹrịra kẹ ụlọ-elu hụ suehan azụụn hụ. Kanị nwẹnẹ ẹ hụn bu ihun zinmẹ ẹ hụn ka a nọkunmẹ Ụlọ-NSỌ wụ ụbụkụ mmisẹn kwasị ọgụn ẹsatọ (175).
9
Ọnụmụzọ hụ nkọ ọwụwa-ẹnyanwụn ụlọ-elu hụ. Ịya kẹ wẹ gha a banye ẹ omẹni ịhịan gha ezi-ọgwa ibuzọ lala.
10
Azụụn hụn ẹbọ, Ẹbamịn ndịdan Ụnọ-NSỌ, mmughẹ rịsọnmẹ ụlọ-elu rịzị arị. Ibẹka hụ, wẹ rịzị nfetu ezi-ọgwa rị imẹ lẹ ihun ụlọ ahụn rị azụụn Ụlọ-NSỌ. Mgbọn rịzị ẹgbata wẹ lẹ ezi-ọgwa rị imẹ;
11
ẹworo-ụzọ w'a gha hụzị ihun wẹ. Wẹ nọ kẹ mmughẹ ndị hụn rị ẹbamịn-ugu: usue wẹ lẹ ụshịa wẹ wụ ohu; ọnụmụzọ wẹ ile wụ ụdị ohu.
12
Ọnụmụzọ hụzị ẹbamịn ọwụwa-ẹnyanwụn hụn wẹ gha a banye ẹwọrọ ụzọ wẹ gha e ru mmughẹ ndịnị ile rị ẹbamịn ndịdan.
13
Ya kẹ okẹnnyẹ ahụn rị a ghọsị m ihiẹn nọ sị m, “Mmughẹ ndịnị rị Ụlọ-NSỌ ẹka-ekpẹn lẹ ẹka-nni wụ mmughẹ nsọ. Imẹ wẹ kẹ ndị nchụn-ẹjan hụn a bịa ebe Osolobuẹ rị d'a rụn ọrụn k'a rị a nọ e ri oyiye ndị ahụn kachanrịn nsọ. Ebahụn kẹ wẹ k'a gha e butọ oyiye ndị ahụn kachanrịn nsọ — hụn wụ oyiye-ọka, ẹjan-njọ lẹ ẹjan-ndọnzi, makẹni ebahụn rị nsọ.
14
Ndị nchụn-ẹjan lakọ ọrụn gha ebe rị nsọ pụha, abanyekọ wẹ ezi-ọgwa ibuzọ mmanị wẹ gbụpụgụ ẹkwa wẹ yi rụn ọrụn tọ mmughẹ ndịnị, makẹni ẹkwa ndị ahụn rị nsọ. Wẹ yirigụ ẹkwa ọzọ wẹ kebe nọkunmẹ ndị mmaka.”
15
Ogẹn o gi machanrịngụ Ụlọ-nsọ lẹ ihiẹn ndị rịn'a, ọ nọ gha ọnụ-mgbọn rị ẹbamịn ọwụwa-ẹnyanwụn dupụha m, ọ nọ nwan mahunmẹ ẹ azụụn ile:
16
O buche ẹgbe hụ o gi a ma ihiẹn, ọ ma a ẹbamịn ọwụwa-ẹnyanwụn, ọ gba ụbụkụ mmisẹn kwasị ọgụn ẹtọ kwasị nnụnaị (875);
17
o buche ẹgbe hụ o gi a ma ihiẹn, ọ ma a ẹbamịn-ugu, ọ gbazị ụbụkụ mmisẹn kwasị ọgụn ẹtọ kwasị nnụnaị (875).
18
Ọ ma a ẹbamịn ndịdan, ụbụkụ mmisẹn kwasị ọgụn ẹtọ kwasị nnụnaị rọ (875).
19
O shi azụụn rị ẹbamịn ọdịdan-ẹnyanwụn. Ọ ma a, ọ gba ụbụkụ mmisẹn kwasị ọgụn ẹtọ kwasị nnụnaị (875).
20
Ọ machanrịn azụụn ẹnịnọ rịn'a. Usue mgbọn ghahunmẹchanrịnn'a wụ ụbụkụ mmisẹn kwasị ọgụn ẹtọ kwasị nnụnaị (875), ụshịa a ụbụkụ mmisẹn kwasị ọgụn ẹtọ kwasị nnụnaị (875). Mgbọn ahụn kebe ebe rị nsọ lẹ ebe wẹ nọ e mẹ ihiẹn mmaka.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes