Kä cuɛ ɣä böth raar naŋ ɛ ɣä peek kal in te raar, kui̱c caam, kä cuɛ ɣä nööŋ duëli tin luɔtkɛ rɔ̱ kɛ kal luaak Kuɔth, kä lotdɛ rɔ kɛ ciëŋ in te kui̱c caam.
Kä kui̱ kɛl in ci nhiamdɛ luɔc dɛɛkä, min thieek kɛ luaak Kuɔth ɛ jua̱th tetni ti jiɛn da̱ŋ rɛw, kä kui̱c in dɔ̱ŋ min lot ni ro̱o̱th kal raar, ca duëlkɛ la̱t ɛ lɔathkɛ rɔ̱, kɛ bëër da̱ŋ diɔ̱k, te mɔ wi̱i̱kä mɔ.
Kɛ ɣöö cakɛ la̱t ala ti̱ec da̱ŋ diɔ̱k ti ca rɔ̱ lɔth kɛɛl. Kä thilɛ kɛ thieer ti ce̱tkɛ thieer tin te ti̱ecni tin kɔ̱ŋ tin te rɛy kal raar. Kɛ kui̱ ɛmɔ, ca kɛn duël nhial la̱t ni jɔk a leny duël piɛny kɛnɛ duël da̱a̱r kɛ.
Kä duël tin te peek kal in te raar tekɛ jua̱th tetni ti jiɛn da̱ŋ dhieec bäriɛn. Kä duël tin luɔtkɛ rɔ̱ kɛ luaak Kuɔth tekɛ kɛ jua̱th tetni ti kuɔ̱r kɛl bäriɛn.
Kä kɛ kui̱ känyä ca̱ŋ kɛ tuk kal in te raar, min lot rɔ kɛ päny luaak Kuɔth min lot rɔ kɛ kal in te raar, ɣäp ɣääpdɛ a wä mäni puɔ̱ny kal, kä tëë kɛ duël
ti tekɛ duɔ̱ɔ̱p nhiamdiɛn. Kä kɛn cäätkɛ kɛ duël tin te kui̱c caam, kä päär bäriɛn kɛnɛ ɣäp ɣääpdiɛn. Kä ɛ jɛn la̱t in ca lät ni thukiɛn diaal amäni thieknikiɛn.
Kä cuɛ ruac kɛ ɣä wëë i̱, “Kɛn duël kuec caam kɛnɛ duël tin te kui̱c cuëëc tin luɔtkɛ rɔ̱ kɛ gua̱a̱th in te baaŋ kɛ duël ti rɛl gɔɔydiɛn rɔ, ti bi bööth palä tin lät nhiam Kuɔth Nhial muc tin rɛl gɔɔydiɛn rɔ a cam thi̱n. Kä bikɛ muc tin rɛl gɔɔydiɛn rɔ la̱th thi̱n muc bɛɛl, kɛnɛ muc dueeri kɛ muc cutdä, kɛ ɣöö ɛn gua̱a̱th rɛl gɔɔydɛ rɔ.
Kä mi wä bööth palä wä guäth in rɛl gɔɔydɛ rɔ, /cikɛ bi luny raar thi̱n a wäkɛ rɛy kal in te raar amäni mi cikɛ bieyni tin lätkɛ kɛ jɔl kɛ wuɔ̱c, kɛ ɣöö kɛ ti rɛl gɔɔydiɛn rɔ. Bikɛn bieyni ti kɔ̱ŋ jɔl kɛ läth pua̱nynikiɛn a ŋot /kenkɛ ni wä guäth in te nɛy diaal thi̱n.”
Kä min cɛ thuɔ̱k kɛ thëm gua̱th in te luaak Kuɔth thi̱n rɛci, cuɛ ɣä naŋ raar kɛ thok kal kuec känyä ca̱ŋ, kä cuɛ gua̱a̱th in te luaak Kuɔth thi̱n ben thɛm ni kɛɛliw.
Kä cuɛ jɛ thɛm peknikɛ da̱ŋ ŋuaan diaal. Kä tëë kɛ päny mi go̱l jɛ, bär jɔakdɛ ɛ jua̱th tetni ti kur dhieec, kä ɣäp ɣääpdɛ ɛ jua̱th tetni ti kur dhieec, päny ɛmɔ dääkɛ gua̱a̱th in rɛl gɔɔydɛ rɔ kɛnɛ gua̱th tin kɔ̱ŋ.