1
Ningî muntû ûu nî aambikîrie kîaragoone kîrîa kîaarî oome aratongeeria arambikia nyomba yaarî rûteereene rwa bwa ûrîo bwa kîûrû. Nayo îtaarî kûraaja na nyomba îrîa yaarî mûthia jwa bwa rûgûrû ya kîûrû.
2
Nyonba îîu yaarî ya ûraaja bwa mita mîrongo îtaano (50m) na wariî bwa mita mîrongo îîrî na ithaano (25m).
3
Rûteere rûmwe rwaayo rwategeete îtîîri rîrîa rîaarî rûteere rwa kîûrû rîa mita îkûmi (10m) na rûteere rwaayo rûngî rwerekerete kajîra karîa geetaga kîaragoone kîa bwa oome. Nayo yaaki ya ngoroba ithatû itigeene ûrîa antû barîngî kwona barîa bangî barî nthîgûrû yaao.
4
Rûteereene rwa bwa ûrîo rwa nyomba îîu nî kwaarî na kajîra ka waariî bwa mita ithaano (5m) na kaarî ka ûraaja bwa mita mîrongo îtaano (50m). Rûteereene rûu nîru nyomba îîu yaarî na mûrango.
5
Tûnyomba tûrîa twaarî ngorobeene ya îgûrû nîtu twaacekei nkûrûki ya twa ngoroba ya gatîgatî na twa ngoroba ya nthîgûrû nîûntû twaaki nyuma ya tûngî.
6
Tûnyomba tûu twa ngoroba tûthatû twaaki tûtîgwatîîri nî itugî ta ûrîa tûngî twagwatîîri.
7
Tûnyomba twa îgûrû twaaki nyuma ya tûnyomba twa gatîgatî na twa gatîgatî twaaki nyuma ya tûrîa twa mbere, mita mîrongo îîrî na ithaano (25m). Naru rwategeene na tûnyomba tûrîa twaarî kîaragoone kîa oome.
8
Oome ya kîarago, nî gwaaki tûnyomba twa ûraaja bwa mita mîrongo îîrî na ithaano (25m). Natu tûnyomba tûrîa twaategeene na kîûrû twaarî twa ûraaja bwa mita mîrongo îtaano (50m).
9
Tûnyomba tûrîa twaarî nthîgûrû nî twaarî na gûntû gwa gûtonyeera rûteereene rwa bwa gaiti muntû aumîte bwa kîarago kîa bwa oome.
10
Arîa rûthingo rwa bwa oome rwaambîîragia bwa ûmotho, rûtegeene na kîarago, nî kwaarî na tûnyomba.
11
Mbere ya tûnyomba tûu nî kwaarî na gûntû gwa gûkûrûkîîra. Tûnyomba tûu twakari ta tûrîa twaarî rûteere bwa ûrîo, na twaarî na ûraaja na waariî bûng'aneene. Ningî mwaakîre jwaatu na mîari yaarî o ûmwe.
12
Rûteereene rwa bwa gaiti arîa rûthingo rwambagîîria nî kwaarî na antû a gûkûrûkîîra, arîa kwaarî nthîgûrû ya tûnyomba tûu gwa ûmotho.
13
Muntû ûu arambîîra atîrî, “Nyomba îîu ya bwa ûrîo na ya bwa ûmotho nî nyomba întheru. Au nîo athînjîri-Mûrungu barîa batumîkagîra MWATHANI barîîjagîra igongwana birîa itheru buru. Nîkwîthîrwa tûnyomba tûu nî tûtûtheru no mwanka athînjîri-Mûrungu baritagîre igongwana birîa bitheru mono ku. Nabio nî igongwana bia irio na bia kûthiria meeyia na bia kûthiria maatia.
14
Athînjîri-Mûrungu bakeenda kuumagara nyomba iu ntheru, nî babuîrîte kûrita nguû iu ciaao itumagîrwa gûtumîkîra kîrî MWATHANI bagaitiga ku, nîûntû nguû iu nî intheru. Nî beekagîre nguû ingî rîrîa beetîte kîrî mwingî.”
15
Muntû ûu aakûthiria kûthima kîûrû ndeene, nî aambikîrie oome ya kîûrû arampumarîîria mpingîroone ya bwa gaiti.
16
Arajûkia kîthimi arathima rûteere rwa bwa gaiti aroona rûrî rwa mita magana jaîrî ja mîrongo îtaano (250m).
17
Ningî aragarûka arathima rûteere rwa bwa ûrîo aroona rûrî rwa mita magana jaîrî ja mîrongo îtaano (250m).
18
Aracoka arathima rûteere rwa bwa ûmotho aroona rûrî rwa mita magana jaîrî ja mîrongo îtaano (250m).
19
Ningî aragarûka arathima rûteere rwa bwa rûgûrû aroona rûrî rwa mita magana jaîrî ja mîrongo îtaano (250m).
20
Tontû bûû, antû au kîûrû kîaarî kwang'aneene nteere cio-inya. O rûteere rwaarî rwa mita magana jaîrî ja mîrongo îtaano (250m). Nî kwaarî na rûthingo rwagaanîtie kûrîa kûtheru na kûrîa gûtaarî gûkûtheru.
Songe Bible 2018
KIMERU BIBLE WITH DC Bible Society of Kenya, 2009, 2018