×

NTETO INJEGA CIA 2018

Esekiel 43

1
Muntû o ûu nî aambikîrie bwa mpingîro ya bwa gaiti.
2
Nabu weerû bwa kwonania mwago jwa Mûrungu wa Israeli nî bwaarî antû au. Ningî nî bwonekaga buumîte bwa gaiti. Nako kajû ka MWATHANI karuumaga ta ndûûjî inyingî, na nthîgûrû nî yoojûri weerû bwa mwago jwaawe.
3
Mûrungu nî aanguûrîîrie arambonia mantû jau, najo jaakari ta jarîa aambonetie rîrîa eetîte kûthiria ntûûra ya Jerusalemu kana jarîa aanguûrîrîte ndî mûuroone jwa Kebari. Tontû bûû, ndîraigwîthia nthîgûrû ntiirithîtie ûthiû tîîriine, ndîramûthaathayia.
4
Weerû bûu bwa mwago jwa MWATHANI bûratonyeera mpingîroone îîu bwa gaiti bûreeta mwanka kîûrûûne.
5
Roho wa Mûrungu aranjûkia arambikia kîaragoone kîa bwa ndeene. Naani ndatega ndîroona weerû bwa mwago jwa MWATHANI bûûjûrîte kîûrûûne.
6
Muntû ûrîa wathimaga ararûngama rûteere rwaakwa, nawe MWATHANI arambarîria arî kîûrûûne, arambîîra atîrî,
7
“Mûtaana wa muntû rûrû nîru rûriga rwaakwa. Aja nîo ngaatûûraga amwe na antû ba Israeli kenya na kenya. Antû ba Israeli na atongeeria baao batîkoromenithia riîtwa rîaakwa rîrîa rîtheru kaîrî, kana bathaathayia mîrungu ya mîng'uanano beekîrithia riîtwa rîaakwa mûgiro na njîra ya kûthika atongeeria baao akuî na kîûrû.
8
Anene baaciakîîre mîari ya ikaro biaao akuî na mîari ya kîûrû gîaakwa bakîathûranagwa akî nî rûthingo kuuma kîrî ni. Nabo baramenithia riîtwa rîaakwa rîrîtheru nîûntû bwa mantû jarîa baathithagia. Tontû bûû, ndîrabathiria na mûthûûro.
9
Tontû bûû, antû ba Israeli nî babuîrîte kûrita mîrungu yaao ya mîng'uanano na biimba bia anene baao birîa bathikîte akuî na kîûrû. Rîu ngaakaraga amwe nabo magiita jonthe.
10
“Naagwe rî mûtaana wa muntû, îîra antû ba Israeli ûrîa kîûrû kîbuîrîte kwîthîrwa gîkari nîkenda baigua nthao cia maatia jaao.
11
Rîrîa bakairira nîûntû bwa maatia jaao, rîu ûbeere tarîîria ûrîa kîûrû kîbuîrîte gwakwa; na kûrîa antû babuîri gûkûrûkagîîra na mwonekere jwaakîo junthe. Ningî nî babuîrîte kûmenya mawaatho jaakîo na Waatho bunthe bûkîegiî. Ûbuîrîte kûbaandîkîra mantû jau nîkenda boona ûrîa mantû jonthe jabuîrîte kûthithua nîkenda bathingata nkuagaya ciaakîo cionthe.
12
Waatho bwa kîûrû nî atî gûntû kunthe kûrîa kûthiûrûkîrîte kîûrû kûu kîrîmeene nî gûkûtheru.”
13
Ithimi bibi bithingatîte nîbio biaari bia kîritîro kîa igongwana. Nî kwaarî na mûberethi jwaathiûrûkîrîte kîritîro kîa igongwana jwa centimita mîrongo îtaano (50cm) kworokera na waariî bwa centimita mîrongo îtaano (50cm). Ningî nî kîaarî na mûng'eng'a jwa centimita mîrongo îîrî na ithaano (25cm) gwitia.
14
Kuuma kîritîroone bwa îgûrû kwaarî kwa ûraaja bwa mita îmwe (1m). Nî kwaarî na gûntû kûmwe gwacokeete bwa nyuma kuuma mûng'eng'eene. Naku kwaarî kwa centimita mîrongo îtaano (50cm) kûthiûrûka, na ûraaja bwa mita ijîîrî (2m) gwitia bwa îgûrû. Ningî antû au mûng'eng'eene nî gwacokeete bwa nyomba, naku kwaarî kwa centimita mîrongo îtaano (50cm) kûthiûrûka.
15
Kîritîroone îgûrû au igongwana biaaritagîrwa, kwaarî kwa mita ijîîrî (2m) gwîtia bwa îgûrû. Nteereene cia kîritîro kîu kîa igongwana cio-inya, nî gwookîîrîte ta tûgoji.
16
Kîritîroone kîu kîa igongwana kîaarî na nteere inya ing'aneene. O rûteere rwaarî rwa mita ithanthatû (6m).
17
Gatîgatî ka kîritîro kîu kîa igongwana nî kwaarî na nteere inya; o rûteere rûmwe rwaarî rwa mita mûgwanja (7m). Ningî nî kwaarî na mûng'eng'a jwa centimita mîrongo îîrî na ithaano (25cm) gwitia bwa îgûrû na mûberethi jwa waariî bwa centimita mîrongo îtaano (50cm). Ningî nî kwaarî na tûkinyo tûrîa twaatumagîrwa gwitia kîritîroone kîu, natu twaarî bwa gaiti.
18
MWATHANI Mûrungu nî aambarîîrie arambîîra atîrî, “Mûtaana wa muntû, thikîîra wigue ûrîa ngûkwîra. Rîrîa kîritîro kîa igongwana gîgaakwa, no mwanka ûkîtherie nîkenda kûritagîrwa igongwana bia gwakîîria o na bia gwîtûûrîria tharike ya nyomoo.
19
Athînjîri-Mûrungu ba nchiarwa cia Alawi ba rûrîîjo rwa Zadoki nîbo bagatumîkaga kîritîroone kîu. Nîbo bakaaritaga ndeegwa îrî kîgongwana gîa kûthiria meeyia. Ûu nîu ûûni MWATHANI Mûrungu ndauga.
20
Naagwe ûkaajûkia tharike, ûmîminyirie kooneene cio-inya cia kîritîro kîa igongwana, na ûminyîrie mîthieene yaakîo na gatîgatî gaakîo na kinya mîng'eng'eene yaakîo. Ûu nîu ûkaatheria kîritîro kîu kîa igongwana.
21
Ûcoke ûjûkie ndeegwa îrîa ya kîgongwana gîa kûthiria meeyia, ûmîrite îrî kîgongwana kîa gwakîîria buru antû arîa kûritagîrwa igongwana oome ya kîûrû.
22
Rûûneene ûjûkie nthenge îtî na antû athûûku noo arîkû ûmîrite îrî kîgongwana gîa kûthiria meeyia. Ûcoke ûtherie kîritîro kîa igongwana na tharike yaayo, o ta ûrîa ûraathithîrie na tharike ya ndeegwa.
23
Waathiria kûthithia ûu, ûjûkie kareegwa na gatûrûme gatî na antû athûûku noo arîkû ûbirite birî igongwana.
24
Ûbirite birî kîgongwana kîrî Mûrungu. Nabo athînjîri-Mûrungu baminyaminyîrie igongwana biu chumbî na babirite birî igongwana bia gwakîîria.
25
O ntukû o ntukû, antû a ntukû mûgwanja, bûkaritaga nthenge irî kîgongwana kîa kûthiria meeyia. Ningî bûritage ndeegwa na gatûrûme gatî na antû aathûûku noo arîkû birî kîgongwana.
26
Nabo bakaaromba ntukû mûgwanja bakîrombaga nîûntû bwa kîritîro kîa igongwana nîkenda kîtherua kîîthîrwa kîthuranîri gîa kûritîra igongwana.
27
Nabo baathiria ntukû iu mûgwanja bakîtheragia kîritîro kîa igongwana, ntukû ya inyaanya nîyo athînjîri-Mûrungu bakaambîrîîria kûritagîra igongwana ku. Nabo bakaritîra igongwana bia gwakîîria na bia gûcwaa thîîrî ku, naani ûûni MWATHANI Mûrungu weenu nkaabiîtîkîîria.”
Songe Bible 2018
KIMERU BIBLE WITH DC Bible Society of Kenya, 2009, 2018
:
Save Notes