Pambuyo pake munthuyo adandidzeretsa pa chipata chakumpoto ndipo tidafika kumaso kwa Nyumba ya Mulungu. Kumeneko ndidaona ulemerero wa Chauta utadzaza Nyumba yakeyo. Pamenepo ndidadzigwetsa chafufumimba.
“Tsono zimene ndikunena Ine Ambuye Chauta ndi izi: Mwa alendo amene ali osaumbalidwa mu mtima ndi m'thupi, pasapezeke ndi mmodzi yemwe woloŵa m'malo anga opatulika, ngakhalenso alendo amene amakhala pakati pa Aisraele.
Adzangokhala atumiki chabe ku malo anga opatulika. Adzayang'anira zipata za Nyumba ya Mulungu ndi kugwira ntchito zina zake kumeneko. Adzapha nyama za nsembe zopsereza, ndi za nsembe zina za anthu. Motero adzidzaimirira anthuwo ndi kumaŵatumikira.
Saloledwa kudzafika pafupi ndi Ine, kuti anditumikire ngati ansembe. Sadzayandikira zinthu zanga zopatulika ndi zopereka zoyera kwambiri. Adzachititsidwa manyazi chifukwa cha ntchito zao zonyansa.
“Koma ansembe a fuko la Levi a m'banja la Zadoki, amene adakhalabe okhulupirika pa ntchito zosamala malo anga opatulika nthaŵi imene Aisraele adaasokera ndi kundisiya Ine, okhawo adzasendera kwa Ine kuti anditumikire. Adzabwera kwa Ine kudzapereka nsembe za mafuta ndi magazi. Ndatero Ine Ambuye Chauta.
Pamene aloŵa ku chipata cham'kati, azivala bafuta. Asavale chovala chilichonse cha ubweya wankhosa ponditumikira pa zipata za bwalo lam'kati ndiponso m'kati mwa Nyumba yanga.
“Wansembe asadziipitse pokhudza munthu wakufa, kupatula ngati ndi bambo wake kapena mai wake, mwana wake wamwamuna kapena wamkazi, mbale wake kapena mlongo wake wosakwatiwa.
Iwo azidzadyako za chopereka cha zakudya, za nsembe zopepesera machimo, ndi za nsembe zopepesera kupalamula. Ndipo zonse zoperekedwa kwa Mulungu mu Israele zidzakhala zao.