Ago bounindet, kotebe oloto ko u bounindet, si koam amitwogik eng’ taitab Jehovah; wendi orit kobunei oretab keterutab ormarichet, ak komandae oranato.
Yeityo komutwa anyo oret ne bo ormarichet ne bo murot ne bo katam eng’ taitab got; ak kiageer, ogeero, kinyi gotab Jehovah lilindab Jehovah: ak kiabut, kot kotiiny toget ng’ony.
Ak kilenja Jehovah, Ee, weritab chi, nam komie, ak igeer eng’ konyeguk, ak igase itiguk tuguk tugul che amwaun agobo etanutik tugul che bo gotab Jehovah, ak ng’atutikyik tugul; ak inai komie ole kibetitoi got orit, koboto komosta age tugul ne kimandoe eng’ ole tilil.
amu kiomutu kipsagarek, che ma kimuratan mugulelwek, ama kimuratan borwek, kotebe oldanyu ole tilil, si komuruon, noto gonnyu, ye kogoitoi amitwogikyuk, mwanik ak korotik, ak kigobut kayomisennyu, si kotesyi tugukwok tugul che kiwechei.
Mwaei Kiptaiyat Jehovah ko u ni kole, Mawendi oldanyu ne tilil kipsagarindet age tugul ne ma kimuratan muguleldo, ama kimuratan borto, kipsagarindet age tugul ne mi kwenutab lagokab Israel.
Ago egu ichek kiboitinik eng’ oldanyu ne tilil, koripsei eng’ ormarichok che bo got, ak koboisiei eng’ got: enyei kagochinet ne kibeelei ak tiseiywot agobo bik, ak kotononso eng’ taitab bik koboisiechi.
Ama rikyina, si koyaiywa boisietab tisiindet, anan korikyi tugukyuk che tililen alak tugul, korikyi tuguk che tililen mising’: ago ibei kalilanenywa, koboto tugukwak che kiwechei che kigoyai.
Ago bwanei korikyina koboisiewa tisiik Lawik, werikab Sadok, che kiribei boisietab oldanyu ne tilil, ye kingoba lagokab Israel kometa; si kotononso eng’ tainnyu kogona mwanik ak korotik, mwaei Kiptaiyat Jehovah:
Ak ye ba orit kobun ormarichokab seremut ne bo orit, kilaakyin ngoroik che bo katanit; ama ilaachi ichek ngoroikab kororikab kechirek, ye boisiei eng’ seremut ne bo orit, ak eng’ go.
Ak ye mandoi kobendi seremut ne sib kemong’jin, seremut ne sib kemong’jin, agoi ole mi bik, koreegu anyun ngoroichoto kaboisie, ak kogonor eng’ gorik che mengechen che tililen, ak kolaach ngoroik alak, si ma itaban bik eng’ ngoroikwak.
Ak koruokyi che ibeligei; koruokyi ko u kiruogutikyuk: ak korib ng’atutikyuk ak konetisiosiekyuk eng’ igorwekyuk tugul che kiging’at; ak kotaban sabatosiekyuk.
Ama rikyin musto si maing’wanitgei: ago imuchi kong’wanitgei amu kwanda anan kamet, anan werit, anan chepto, anan ng’etab kamet, anan chepkamet ne ma kitun.
Ak bunjin tisiik tongoanik tugul che bo tai che bo kiy age tugul, ak kagochinet age tugul ne kinamjin barak ne bo kiy age tugul, che bo kagochinoikwok tugul che kinamjin barak: ogochini kogeny tisiindet makatinikwok che tuonen che bo tai, si kogochi berurto kotebe gong’ung’.