शासन गर्ने राजाचाहिँ मूल-ढोकाको दलानमा मेरो सामुन्ने पवित्र-भोज खानलाई जान सक्छ। मन्दिरपट्टि फर्केको ठूलो कोठाबाट राजा त्यस मूल-ढोकाको दलानमा पस्नेछन् र त्यतैबाट निस्कनेछन्।”
त्यसपछि ती मानिसले मलाई उत्तरको मूल-ढोकाबाट मन्दिरको भित्री चोकमा लगे। यसो हेर्दा परमप्रभुको मन्दिर उहाँको महिमाले भरिएको मैले देखें। म भूइँमा घोप्टो परें।
परमप्रभुले मलाई भन्नुभयो, “ए मरणशील मानिस, तैँले जे-जे देख्छस् र सुन्छस्, ती कुरामा ध्यान दे। म तँलाई मन्दिरका नियमकानुनहरू बताउनेछु। क-कसले मन्दिर भित्र-बाहिर गर्न पाउनेछ र क-कसले गर्न पाउनेछैन, त्यो राम्ररी ख्याल गर्।
पशुहरूको बोसो र रगत बलि चढाउँदैगरेको बेलामा इस्राएलका मानिसहरूले मेरा आज्ञापालन नगर्ने बेखतने विदेशीहरूलाई मन्दिरभित्र पस्न दिएर तिनीहरूले मेरो मन्दिर बिटुलो पारेका छन्। यसरी सबै प्रकारका घिनलाग्दा कामहरू गरेर मेरा प्रजाले मेरो करार तोडेका छन्।
“म सार्वभौम परमप्रभु भन्दछु कि मेरो आज्ञापालन नगर्ने बेखतने विदेशीहरू मेरा मन्दिरमा पस्न पाउनेछैनन्, इस्राएलीहरूकै बीचमा बास गर्ने विदेशीहरू पनि पस्न पाउनेछैनन्।”
पाले भएर वा मन्दिरको अरू साधारण सेवाकार्य गरेर तिनीहरूले मन्दिरमा मेरो सेवा गर्न सक्नेछन्। मानिसहरूले होमबलि र अन्य बलि चढाउन ल्याएका पशुहरू तिनीहरूले मार्न सक्छन् र प्रजाको सेवा गर्न सबै समय तिनीहरू तयार रहनुपर्नेछ।
तर इस्राएलका मानिसहरूका निम्ति तिनीहरूले मूर्तिपूजा गर्ने काम गरेर तिनीहरूलाई पाप गर्न लाएका हुनाले म सार्वभौम परमप्रभु यो गम्भीर शपथ खान्छु कि तिनीहरूले दण्ड पाउनैपर्छ।
तिनीहरूले पूजाहारीका रूपमा मेरो सेवा गर्न पाउनेछैनन्, मेरो निम्ति ठहरिएको कुनै पनि पवित्र थोकको नजिक जान पाउनेछैनन् र महा-पवित्रस्थानको नजिक पनि पस्न पाउनेछैनन्। तिनीहरूले गरेका घिनलाग्दा कुराहरूका निम्ति यही नै तिनीहरूको सजाय हुनेछ।
सार्वभौम परमप्रभुले भन्नुभयो, “इस्राएलका सबै मानिसहरू मबाट टाढा भएर गएका बेलामा पनि लेवी कुलका सादोक वंशका पूजाहारीहरूले विश्वासयोग्य भएर मन्दिरमा मेरो सेवा गरिरहे। त्यसकारण अब, तिनीहरूले नै मेरो सेवा गर्नेछन् र बलि चढाएका पशुहरूका बोसो र रगत मलाई चढाउन तिनीहरू नै मेरो उपस्थितिमा आउनेछन्।
मानिसहरू भेला हुने बाहिरी चोकमा जाँदा तिनीहरूले मन्दिरमा सेवा गरेका बेलामा लाएका पोशाक फुकाली पवित्र कोठाहरूमा राख्नेछन्। ती पोशाक पवित्र भएकोले मानिसहरूलाई हानि नगरून् भनी तिनीहरूले अरू वस्त्र लाउनुपर्नेछ।
पूजाहारीले केवल एउटी इस्राएली कन्ये वा पूजाहारीकी विधवासित मात्र बिहे गर्नेछ। त्यसले अरू विधवा वा श्रीमान्बाट छुट्टिएकी स्त्रीलाई बिहे गर्न पाउनेछैन।
कुनै मुद्दा चल्यो भने पूजाहारीहरूले मेरा कानुनअनुसार फैसला गर्नेछन्। मेरा नियम-कानुनअनुसार तिनीहरूले धार्मिक चाड-बाड मनाउनेछन् र तिनीहरूले विश्राम दिनलाई पवित्र राख्नेछन्।
र त्यसपछि मन्दिरको भित्री चोकमा गई आफ्नो शुद्धीकरणको निम्ति एउटा पापबलि चढाउनुपर्नेछ। त्यसपछि मात्र त्यसले फेरि मन्दिरमा सेवाको कार्य गर्न सक्नेछ। म सार्वभौम परमप्रभु बोलेको छु।
“तिनीहरूका कुनै पैतृक सम्पत्ति हुनेछैन। तिनीहरूका निम्ति पैतृक सम्पत्ति म नै हुँ। तिनीहरूलाई कुनै सम्पत्तिको अधिकार नदिनुको कारण म नै तिनीहरूले पाउने अधिकार हुँ।
खेतबारीका उब्जनीका अगौटे बाली, फलफूल र मलाई भेटी चढाएका अरू सबै थोकको उत्तम-उत्तम चीजहरू पूजाहारीहरूले पाउनेछन्। पिंधेको पिठोबाट बनाएको पहिलो रोटी मानिसहरूले पूजाहारीहरूलाई भेटीको रूपमा दिनेछन् र तिनीहरूका घरहरूमा मेरो आशिष् रहनेछ।